नृसिंहस्तोत्रम् (देवैः कृतं लिङ्गपुराणान्तर्गतम्) Devaih Kritam Nrisimha Stotram

तं तुष्टुवुः सुरश्रेष्ठा लोका लोकाचले स्थिताः ।सब्रह्मकाः ससाध्याश्च सयमाः समरुद्गणाः ॥ २१॥

taṃ tuṣṭuvuḥ suraśreṣṭhā lokā lokācale sthitāḥ |sabrahmakāḥ sasādhyāśca sayamāḥ samarudgaṇāḥ || 21||

परात्परतरं ब्रह्म तत्त्वात्तत्त्वतमं भवान् ।ज्योतिषां तु परञ्ज्योतिः परमात्मा जगन्मयः ॥ २२॥

parātparataraṃ brahma tattvāttattvatamaṃ bhavān |jyotiṣāṃ tu parañjyotiḥ paramātmā jaganmayaḥ || 22||

स्थूलं सूक्ष्मं सुसूक्ष्मं च शब्दब्रह्ममयः शुभः ।वागतीतो निरालम्बो निर्द्धन्द्वो निरुपप्लवः ॥ २३॥

sthūlaṃ sūkṣmaṃ susūkṣmaṃ ca śabdabrahmamayaḥ śubhaḥ |vāgatīto nirālambo nirddhandvo nirupaplavaḥ || 23||

यज्ञभुग्यज्ञमूर्तिस्त्वं यज्ञिनां फलदः प्रभुः ।भवान्मत्स्याकृतिः कौर्ममास्थाय जगति स्थितः ॥ २४॥

yajñabhugyajñamūrtistvaṃ yajñināṃ phaladaḥ prabhuḥ |bhavānmatsyākṛtiḥ kaurmamāsthāya jagati sthitaḥ || 24||

वाराहिं चैव तां सैंहीमास्थायेह व्यवस्थितः ।देवानां देवरक्षार्थं निहत्य दितिजेश्वरम् ॥ २५॥

vārāhiṃ caiva tāṃ saiṃhīmāsthāyeha vyavasthitaḥ |devānāṃ devarakṣārthaṃ nihatya ditijeśvaram || 25||

द्विजशापच्छलेनैवमवतीर्णोऽसि लीलया ।न दृष्टं यत्त्वदन्यं हि भवान्सर्वञ्चराचरम् ॥ २६॥

dvijaśāpacchalenaivamavatīrṇo'si līlayā |na dṛṣṭaṃ yattvadanyaṃ hi bhavānsarvañcarācaram || 26||

भवान्विष्णुर्भवान् रुद्रो भवानेव पितामहः ।भवानादिर्भवानन्तो भवानेव वयं विभो ॥ २७॥

bhavānviṣṇurbhavān rudro bhavāneva pitāmahaḥ |bhavānādirbhavānanto bhavāneva vayaṃ vibho || 27||

भवानेव जगत्सर्वं प्रलापेन किमीश्वर ।मायया बहुधा संस्थमद्वितीयमयं प्रभो ॥ २८॥

bhavāneva jagatsarvaṃ pralāpena kimīśvara |māyayā bahudhā saṃsthamadvitīyamayaṃ prabho || 28||

स्तोष्यामस्त्वां कथं भासि देवदेव मृगाधिप ।स्तुतोऽपि विविधैः स्तुत्यैर्भावैर्नानाविधैः प्रभुः ॥ २९॥

stoṣyāmastvāṃ kathaṃ bhāsi devadeva mṛgādhipa |stuto'pi vividhaiḥ stutyairbhāvairnānāvidhaiḥ prabhuḥ || 29||

न जगाम द्विजाः शान्तिं मानयन्योनिमात्मनः ।यो नृसिंहस्तवं भक्त्या पठेद्वार्थं विचारयेत् ॥ ३०॥

na jagāma dvijāḥ śāntiṃ mānayanyonimātmanaḥ |yo nṛsiṃhastavaṃ bhaktyā paṭhedvārthaṃ vicārayet || 30||

श्रावयेद्वा द्विजान्सर्वान् विष्णुलोके महीयते ।तदन्तरे शिवं देवाः सेन्द्राः सब्रह्मकाः प्रभुम् ॥ ३१॥

śrāvayedvā dvijānsarvān viṣṇuloke mahīyate |tadantare śivaṃ devāḥ sendrāḥ sabrahmakāḥ prabhum || 31||

सम्प्राप्य तुष्टवुः सर्वं विज्ञाप्य मृगरूपिणः ।ततो ब्रह्मादयस्तूर्णं संस्तूय परमेश्वरम् ॥ ३२॥

samprāpya tuṣṭavuḥ sarvaṃ vijñāpya mṛgarūpiṇaḥ |tato brahmādayastūrṇaṃ saṃstūya parameśvaram || 32||

आत्मत्राणाय शरणं जग्मुः परमकारणम् ।मन्दरस्थं महादेवं क्रीडमानं सहोमया ॥ ३३॥

ātmatrāṇāya śaraṇaṃ jagmuḥ paramakāraṇam |mandarasthaṃ mahādevaṃ krīḍamānaṃ sahomayā || 33||

सेवितं गणगन्धर्वैः सिद्धैरप्सरसां गणैः ।देवताभिः सह ब्रह्मा भीतभीतः सगद्गदम् ।प्रणम्य दण्डवद्भूमौ तुष्टाव परमेश्वरम् ॥ ३४॥

sevitaṃ gaṇagandharvaiḥ siddhairapsarasāṃ gaṇaiḥ |devatābhiḥ saha brahmā bhītabhītaḥ sagadgadam |praṇamya daṇḍavadbhūmau tuṣṭāva parameśvaram || 34||

ब्रह्मोवाच ।नमस्ते कालकालाय नमस्ते रुद्र मन्यवे ।नमः शिवाय रुद्राय शङ्कराय शिवाय ते ॥ ३५॥

brahmovāca |namaste kālakālāya namaste rudra manyave |namaḥ śivāya rudrāya śaṅkarāya śivāya te || 35||

उग्रोऽसि सर्वभूतानां नियन्तासि शिवोऽसि नः ।नमः शिवाय शर्वाय शङ्करायार्त्तिहारिणे ॥ ३६॥

ugro'si sarvabhūtānāṃ niyantāsi śivo'si naḥ |namaḥ śivāya śarvāya śaṅkarāyārttihāriṇe || 36||

मयस्कराय विश्वाय विष्णवे ब्रह्मणे नमः ।अन्तकाय नमस्तुभ्यमुमायाः पतये नमः ॥ ३७॥

mayaskarāya viśvāya viṣṇave brahmaṇe namaḥ |antakāya namastubhyamumāyāḥ pataye namaḥ || 37||

हिरण्यबाहवे साक्षाद्धिरण्यपतये नमः ।शर्वाय सर्वरूपाय पुरुषाय नमो नमः ॥ ३८॥

hiraṇyabāhave sākṣāddhiraṇyapataye namaḥ |śarvāya sarvarūpāya puruṣāya namo namaḥ || 38||

सदसद्व्यक्तिहीनाय महतः कारणाय ते ।नित्याय विश्वरूपाय जायमानाय ते नमः ॥ ३९॥

sadasadvyaktihīnāya mahataḥ kāraṇāya te |nityāya viśvarūpāya jāyamānāya te namaḥ || 39||

जाताय बहुधा लोके प्रभूताय नमो नमः ।रुद्राय नीलरुद्राय कद्रुद्राय प्रचेतसे ॥ ४०॥

jātāya bahudhā loke prabhūtāya namo namaḥ |rudrāya nīlarudrāya kadrudrāya pracetase || 40||

कालाय कालरूपाय नमः कालाङ्गहारिणे ।मीढुष्टमाय देवाय शितिकण्ठाय ते नमः ॥ ४१॥

kālāya kālarūpāya namaḥ kālāṅgahāriṇe |mīḍhuṣṭamāya devāya śitikaṇṭhāya te namaḥ || 41||

महीयसे नमस्तुभ्यं हन्त्रे देवारिणां सदा ।ताराय च सुताराय तारणाय नमो नमः ॥ ४२॥

mahīyase namastubhyaṃ hantre devāriṇāṃ sadā |tārāya ca sutārāya tāraṇāya namo namaḥ || 42||

हरिकेशाय देवाय शम्भवे परमात्मने ।देवानां शम्भवे तुभ्यं भूतानां शम्भवे नमः ॥ ४३॥

harikeśāya devāya śambhave paramātmane |devānāṃ śambhave tubhyaṃ bhūtānāṃ śambhave namaḥ || 43||

शम्भवे हैमवत्याश्च मन्यवे रुद्ररूपिणे ।कपर्दिने नमस्तुभ्यं कालकण्ठाय ते नमः ॥ ४४॥

śambhave haimavatyāśca manyave rudrarūpiṇe |kapardine namastubhyaṃ kālakaṇṭhāya te namaḥ || 44||

हिरण्याय महेशाय श्रीकण्ठाय नमो नमः ।भस्मदिग्धशरीराय दण्डमुण्डीश्वराय च ॥ ४५॥

hiraṇyāya maheśāya śrīkaṇṭhāya namo namaḥ |bhasmadigdhaśarīrāya daṇḍamuṇḍīśvarāya ca || 45||

नमो ह्रस्वाय दीर्घाय वामनाय नमो नमः ।नम उग्रत्रिशूलाय उग्राय च नमो नमः ॥ ४६॥

namo hrasvāya dīrghāya vāmanāya namo namaḥ |nama ugratriśūlāya ugrāya ca namo namaḥ || 46||

भीमाय भीमरूपाय भीमकर्मरताय ते ।अग्रेवधाय वै भूत्वा नमो दूरेवधाय च ॥ ४७॥

bhīmāya bhīmarūpāya bhīmakarmaratāya te |agrevadhāya vai bhūtvā namo dūrevadhāya ca || 47||

धन्विने शूलिने तुभ्यं गदिने हलिने नमः ।चक्रिणे वर्मिणे नित्यं दैत्यानां कर्मभेदिने ॥ ४८॥

dhanvine śūline tubhyaṃ gadine haline namaḥ |cakriṇe varmiṇe nityaṃ daityānāṃ karmabhedine || 48||

सद्याय सद्यरूपाय सद्योजाताय ते नमः ।वामाय वामरूपाय वामनेत्राय ते नमः ॥ ४९॥

sadyāya sadyarūpāya sadyojātāya te namaḥ |vāmāya vāmarūpāya vāmanetrāya te namaḥ || 49||

अघोररूपाय विकटाय विकटशरीराय ते नामः ।पुरुषरूपाय पुरुषैकतत्पुरुषाय वै नमः ॥ ५०॥

aghorarūpāya vikaṭāya vikaṭaśarīrāya te nāmaḥ |puruṣarūpāya puruṣaikatatpuruṣāya vai namaḥ || 50||

पुरुषार्थप्रदानाय पतये परमेष्ठिने ।ईशानाय नमस्तुभ्यमीश्वराय नमो नमः ॥ ५१॥

puruṣārthapradānāya pataye parameṣṭhine |īśānāya namastubhyamīśvarāya namo namaḥ || 51||

ब्रह्मणे ब्रह्मरूपाय नमः साक्षाच्छिवाय ते ।सर्वविष्णुर्नृसिंहस्य रूपमास्थाय विश्वकृत् ॥ ५२॥

brahmaṇe brahmarūpāya namaḥ sākṣācchivāya te |sarvaviṣṇurnṛsiṃhasya rūpamāsthāya viśvakṛt || 52||

हिरण्यकशिपुं हत्वा करजैर्निशितैः स्वयम् ।दैत्येन्द्रैर्बहुभिः सार्धं हितार्थं जगतां प्रभुः ॥ ५३॥

hiraṇyakaśipuṃ hatvā karajairniśitaiḥ svayam |daityendrairbahubhiḥ sārdhaṃ hitārthaṃ jagatāṃ prabhuḥ || 53||

सैंहीं समानयन्योनिं बाधते निखिलं जगत् ।यत्कृत्यमत्र देवेश तत्कुरुष्व भवानिह ॥ ५४॥

saiṃhīṃ samānayanyoniṃ bādhate nikhilaṃ jagat |yatkṛtyamatra deveśa tatkuruṣva bhavāniha || 54||

उग्रोऽसि सर्वदुष्टानां नियन्तासि शिवोऽसि नः ।कालकूटादिवपुषा त्राहि नः शरणागतान् ॥ ५५॥

ugro'si sarvaduṣṭānāṃ niyantāsi śivo'si naḥ |kālakūṭādivapuṣā trāhi naḥ śaraṇāgatān || 55||

शुक्रं तु वृत्तं विश्वेश क्रीडा वै केवलं वयम् ।तवोन्मेषनिमेषाभ्यामस्माकं प्रलयोदयौ ॥ ५६॥

śukraṃ tu vṛttaṃ viśveśa krīḍā vai kevalaṃ vayam |tavonmeṣanimeṣābhyāmasmākaṃ pralayodayau || 56||

उन्मीलये त्वयि ब्रह्मन्विनाशोऽस्ति न ते शिव ।सन्तप्ताः स्मो वयं देव हरिणामिततेजसा ॥ ५७॥

unmīlaye tvayi brahmanvināśo'sti na te śiva |santaptāḥ smo vayaṃ deva hariṇāmitatejasā || 57||

सर्वलोकहितायैनं तत्त्वं संहर्त्तुमिच्छसि ।इति श्रीलिङ्गमहापुराणे पूर्वभागे पञ्चनवतितमाध्यायान्तर्गतंदेवैः कृतं नृसिंहस्तोत्रं समाप्तम् ।लिङ्गपुराण । पूर्वभाग । अध्याय ९५/२२३०॥लिन्गपुराण । पूर्वभाग । अध्याय ९५/२२-३०॥

sarvalokahitāyainaṃ tattvaṃ saṃharttumicchasi |iti śrīliṅgamahāpurāṇe pūrvabhāge pañcanavatitamādhyāyāntargataṃdevaiḥ kṛtaṃ nṛsiṃhastotraṃ samāptam |liṅgapurāṇa | pūrvabhāga | adhyāya 95/2230||lingapurāṇa | pūrvabhāga | adhyāya 95/22-30||