दशावतारस्तुतिः २ Dashavatara Stutih 2

अशेषविश्ववैचित्र्यरचनारुचये नमः ।मायागहनगूढाय नानारूपाय विष्णवे ॥ १॥

aśeṣaviśvavaicitryaracanārucaye namaḥ |māyāgahanagūḍhāya nānārūpāya viṣṇave || 1||

देवः पायादपायात् त्रिभुवनभवनस्तम्भभूतः स युष्मानायुष्मान् यस्य भक्त्या प्रभवति पुरुषः स्वर्गमार्गेऽपवर्गे ।मत्स्यः कूर्मो वराहः पुरुषहरिवपुर्वामनो जामदग्न्यःकाकुत्स्थः कंसहन्ता स च सुगतमुनिः कर्किनामा च विष्णुः ॥ २॥

devaḥ pāyādapāyāt tribhuvanabhavanastambhabhūtaḥ sa yuṣmānāyuṣmān yasya bhaktyā prabhavati puruṣaḥ svargamārge'pavarge |matsyaḥ kūrmo varāhaḥ puruṣaharivapurvāmano jāmadagnyaḥkākutsthaḥ kaṃsahantā sa ca sugatamuniḥ karkināmā ca viṣṇuḥ || 2||

आदि मत्स्यः स जयताद् यः श्वासोच्छ्रवासितैर्जलैः ।गगने विदधेऽम्भोधिं गगनं च महोदधौ ॥ ३॥

ādi matsyaḥ sa jayatād yaḥ śvāsocchravāsitairjalaiḥ |gagane vidadhe'mbhodhiṃ gaganaṃ ca mahodadhau || 3||

तं नमस्कुर्महे कूर्मं यः कवाटमसङ्कटम् ।अतीतसर्वब्रह्माण्डमवशेषमिवावहत् ॥ ४॥

taṃ namaskurmahe kūrmaṃ yaḥ kavāṭamasaṅkaṭam |atītasarvabrahmāṇḍamavaśeṣamivāvahat || 4||

वराहं नौमि सानन्ता येनोत्क्षिप्ता क्षितिः परम् ।अधोधृतार्धच्छत्रेव तलस्थार्कातपासहा ॥ ५॥

varāhaṃ naumi sānantā yenotkṣiptā kṣitiḥ param |adhodhṛtārdhacchatreva talasthārkātapāsahā || 5||

जयाय नृहरिर्वोऽस्तु दैत्योरः शोणितार्णवे ।हारमौक्तिकगर्भास्ताश्चेरुर्यन्नखशुक्तयः ॥ ६॥

jayāya nṛharirvo'stu daityoraḥ śoṇitārṇave |hāramauktikagarbhāstāśceruryannakhaśuktayaḥ || 6||

त्रिविक्रमोऽस्तु भूत्यै वः प्राग् लघ्वी मध्यमा ततः ।यस्य पश्चादनन्ताभूत् सत्सङ्गतिरिवाकृतिः ॥ ७॥

trivikramo'stu bhūtyai vaḥ prāg laghvī madhyamā tataḥ |yasya paścādanantābhūt satsaṅgatirivākṛtiḥ || 7||

अभग्नं जामदग्न्यो वः प्रयच्छतु जयोदयम् ।यत्कुठारकठोराग्नौ भूपालैः शलभायितम् ॥ ८॥

abhagnaṃ jāmadagnyo vaḥ prayacchatu jayodayam |yatkuṭhārakaṭhorāgnau bhūpālaiḥ śalabhāyitam || 8||

नौमि रामं रिपोश्चक्रे यः काञ्चननिभैः शरैः ।होमानलशिखारूढमिव वक्त्रवनं पुनः ॥ ९॥

naumi rāmaṃ ripoścakre yaḥ kāñcananibhaiḥ śaraiḥ |homānalaśikhārūḍhamiva vaktravanaṃ punaḥ || 9||

शौरिर्जयति कंसस्य जीवितप्रथमातिथिः ।यश्चक्रे चक्रदानेन बाणबाहुप्रतिग्रहम् ॥ १०॥

śaurirjayati kaṃsasya jīvitaprathamātithiḥ |yaścakre cakradānena bāṇabāhupratigraham || 10||

यस्य सभ्रूभ्रमाकम्पा माररामाः ससैनिकाः ।चक्रुर्न रागं न द्वेषं स शान्त्यै सुगतोऽस्तु वः ॥ ११॥

yasya sabhrūbhramākampā mārarāmāḥ sasainikāḥ |cakrurna rāgaṃ na dveṣaṃ sa śāntyai sugato'stu vaḥ || 11||

स्वच्छन्दप्रोच्छलन्म्लेच्छतिमिरोद्भेदसच्छविः ।कर्किविष्णुः प्रकाशाय प्रभातार्क इवास्तु वः ॥ १२॥

svacchandaprocchalanmlecchatimirodbhedasacchaviḥ |karkiviṣṇuḥ prakāśāya prabhātārka ivāstu vaḥ || 12||

अवतारकथायुक्त्या भक्त्या भगवतो हरेः ।श्रीव्यासदासः क्षेमेन्द्रः कुरुते सरसां स्तुतिम् ॥ १३॥

avatārakathāyuktyā bhaktyā bhagavato hareḥ |śrīvyāsadāsaḥ kṣemendraḥ kurute sarasāṃ stutim || 13||

इति महाकविश्रीक्षेमेन्द्रविरचिते दशावतारचरितेदशावतारस्तुतिः समाप्ता ॥ (१।११३)

iti mahākaviśrīkṣemendraviracite daśāvatāracaritedaśāvatārastutiḥ samāptā || (1|113)