सौभाग्यकवचम् २ Shrisaubhagyakavacham 2

ॐ श्रीगणेशाय नमः ।श्रीगुरुभ्योनमः हरिः ॐ ।कैलासशिखरे रम्ये सुखसीनं सुरार्चितम् ।गिरीशं गिरिजा नत्वा स्तोत्रैर्वेदार्थगोचरैः ॥ १॥

oṃ śrīgaṇeśāya namaḥ |śrīgurubhyonamaḥ hariḥ oṃ |kailāsaśikhare ramye sukhasīnaṃ surārcitam |girīśaṃ girijā natvā stotrairvedārthagocaraiḥ || 1||

प्रणम्य परया भक्त्या तमपृच्छत्कृताञ्जलिः ।श्रीदेव्युवाचरहस्यं रक्षणकरं सर्वसम्पत्करं वद ॥ २॥

praṇamya parayā bhaktyā tamapṛcchatkṛtāñjaliḥ |śrīdevyuvācarahasyaṃ rakṣaṇakaraṃ sarvasampatkaraṃ vada || 2||

ईश्वर उवाचएतत्सौभाग्यकवचं रहस्यातिरहस्यकम् ।सौभाग्यकवचं देवि शृणु सौभाग्यदं परम् ॥ ३॥

īśvara uvācaetatsaubhāgyakavacaṃ rahasyātirahasyakam |saubhāgyakavacaṃ devi śṛṇu saubhāgyadaṃ param || 3||

(मूलविद्यया ऋष्यादिन्यासम्)ध्यानम्शोणप्रभं सोमकलावतंसं पाणिस्फुरत्पञ्चशरेक्षुचापम् ।प्राणप्रियं नौमि पिनाकपाणिं कोणत्रयस्थं कुलदैवतं मे ॥इक्षुकोदण्डपुष्पेषुपाशाङ्कुशचतुर्भुजाम् ।उद्यत्सूर्यनिभां वन्दे देवीं त्रिपुरसुन्दरीम् ॥अथ कवचम् ।ॐ शिखायां सततं पातु महात्रिपुरसुन्दरी ।शिरः कमेश्वरी नित्या तत्पूर्वाङ्गं भगमालिनी ॥ १॥

(mūlavidyayā ṛṣyādinyāsam)dhyānamśoṇaprabhaṃ somakalāvataṃsaṃ pāṇisphuratpañcaśarekṣucāpam |prāṇapriyaṃ naumi pinākapāṇiṃ koṇatrayasthaṃ kuladaivataṃ me ||ikṣukodaṇḍapuṣpeṣupāśāṅkuśacaturbhujām |udyatsūryanibhāṃ vande devīṃ tripurasundarīm ||atha kavacam |oṃ śikhāyāṃ satataṃ pātu mahātripurasundarī |śiraḥ kameśvarī nityā tatpūrvāṅgaṃ bhagamālinī || 1||

नित्यक्लिन्ना च तद्दक्षं भेरुण्डा पश्चिमं शिरः ।वह्निवासिन्यस्य वामं वज्रेश्वर्यलकांस्तथा ॥ २॥

nityaklinnā ca taddakṣaṃ bheruṇḍā paścimaṃ śiraḥ |vahnivāsinyasya vāmaṃ vajreśvaryalakāṃstathā || 2||

शिवदूती ललाटं च त्वरिता तस्य दक्षिणम् ।तद्वामपार्श्वमवतात्तथैव कुलसुन्दरी ॥ ३॥

śivadūtī lalāṭaṃ ca tvaritā tasya dakṣiṇam |tadvāmapārśvamavatāttathaiva kulasundarī || 3||

नित्या पातु भ्रुवोर्मध्यं भ्रुवं नीलपताकिनी ।वामभ्रुवं च विजया नयनं सर्वमङ्गला ॥ ४॥

nityā pātu bhruvormadhyaṃ bhruvaṃ nīlapatākinī |vāmabhruvaṃ ca vijayā nayanaṃ sarvamaṅgalā || 4||

ज्वालामालिन्यक्षि वामं चित्रा रक्षतु नासिकाम् ।दक्षश्रोत्रं तु गणपः स्वयं पातु महोद्यमः ॥ ५॥

jvālāmālinyakṣi vāmaṃ citrā rakṣatu nāsikām |dakṣaśrotraṃ tu gaṇapaḥ svayaṃ pātu mahodyamaḥ || 5||

दक्षसव्यन्तु बटुकः कपोलं क्षेत्रपालकः ।दक्षनासापुटं दुर्गा तदन्यं पातु भारती ॥ ६॥

dakṣasavyantu baṭukaḥ kapolaṃ kṣetrapālakaḥ |dakṣanāsāpuṭaṃ durgā tadanyaṃ pātu bhāratī || 6||

अणिमा दक्षिणं शङ्खं महिमा च तदन्यकम् ।दक्षगण्डं तु गरिमा लधिमा चोत्तरं तथा ॥ ७॥

aṇimā dakṣiṇaṃ śaṅkhaṃ mahimā ca tadanyakam |dakṣagaṇḍaṃ tu garimā ladhimā cottaraṃ tathā || 7||

ऊर्ध्वमोष्ठं प्राप्तिसिद्धिः प्राकाम्यमधरोष्ठकम् ।ईषित्वमूर्ध्वदन्तांश्च वशित्वमधरांस्तथा ॥ ८॥

ūrdhvamoṣṭhaṃ prāptisiddhiḥ prākāmyamadharoṣṭhakam |īṣitvamūrdhvadantāṃśca vaśitvamadharāṃstathā || 8||

इछासिद्धिस्तु रसनां मोक्षसिद्धिस्तु तलुकम् ।तालुमूलद्वयं ब्राह्मी माहेश्वर्यौत्तरक्षताम् ॥ ९॥

ichāsiddhistu rasanāṃ mokṣasiddhistu talukam |tālumūladvayaṃ brāhmī māheśvaryauttarakṣatām || 9||

कुमारी चिबुकं पातु तदधः पातु वैष्णवी ।कण्ठं रक्षतु वाराही इन्द्राणी रक्षतादधः ॥ १०॥

kumārī cibukaṃ pātu tadadhaḥ pātu vaiṣṇavī |kaṇṭhaṃ rakṣatu vārāhī indrāṇī rakṣatādadhaḥ || 10||

कृकाटिकां तु चामुण्डा महालक्ष्मीस्तु सर्वतः ।सर्वसंक्षोभिणीमुद्रा स्कन्धं रक्षतु दक्षिणम् ॥ ११॥

kṛkāṭikāṃ tu cāmuṇḍā mahālakṣmīstu sarvataḥ |sarvasaṃkṣobhiṇīmudrā skandhaṃ rakṣatu dakṣiṇam || 11||

तदन्यं द्राविणीमुद्रा पायादंसद्वयं क्रमात् ।आकर्षवश्यमुद्रे द्वे चोन्मादिन्यथ दक्षिणम् ॥ १२॥

tadanyaṃ drāviṇīmudrā pāyādaṃsadvayaṃ kramāt |ākarṣavaśyamudre dve conmādinyatha dakṣiṇam || 12||

भुजं महाङ्कुशा वामं खेचरी दक्षकक्षकम् ।वामकक्षं बीजमुद्रा योनिःस्थाद्दक्षबाहुकम् ॥ १३॥

bhujaṃ mahāṅkuśā vāmaṃ khecarī dakṣakakṣakam |vāmakakṣaṃ bījamudrā yoniḥsthāddakṣabāhukam || 13||

लसत्त्रिखण्डिनी मुद्रा वामबाहुं प्रपालयेत् ।कामाकर्षिणिका नित्यं रक्षताद्दक्षकूर्परम् ॥ १४॥

lasattrikhaṇḍinī mudrā vāmabāhuṃ prapālayet |kāmākarṣiṇikā nityaṃ rakṣatāddakṣakūrparam || 14||

कूर्परं वाममवताद्बुध्याकर्षिणिका तथा ।अहङ्काराकर्षिणी तु प्रकोष्ठं पातु दक्षिणम् ॥ १५॥

kūrparaṃ vāmamavatādbudhyākarṣiṇikā tathā |ahaṅkārākarṣiṇī tu prakoṣṭhaṃ pātu dakṣiṇam || 15||

शब्दाकर्षिणिका वामं स्पर्शाकर्षिणिकावतु ।तन्मध्यं दक्षिणं पातु रूपाकर्षिणिकेतरम् ॥ १६॥

śabdākarṣiṇikā vāmaṃ sparśākarṣiṇikāvatu |tanmadhyaṃ dakṣiṇaṃ pātu rūpākarṣiṇiketaram || 16||

रसाकर्षिणिका पातु मणिबन्धं च दक्षिणम् ।गन्धाकर्षिणिका वामं चित्ताकर्षिणिकावतु ॥ १७॥

rasākarṣiṇikā pātu maṇibandhaṃ ca dakṣiṇam |gandhākarṣiṇikā vāmaṃ cittākarṣiṇikāvatu || 17||

करभं दक्षिणं धैर्याकर्षिणी पातु वामकम् ।स्मृत्याकर्षिण्यसौ पाणिं नामाकर्षिणि दक्षिणम् ॥ १८॥

karabhaṃ dakṣiṇaṃ dhairyākarṣiṇī pātu vāmakam |smṛtyākarṣiṇyasau pāṇiṃ nāmākarṣiṇi dakṣiṇam || 18||

बीजाकर्षिण्यसौ पायात्सततं दक्षिणाङ्गुलीः ।आत्माकर्षिण्यदक्षिण्याममृताकर्षिणी नखान् ॥ १९॥

bījākarṣiṇyasau pāyātsatataṃ dakṣiṇāṅgulīḥ |ātmākarṣiṇyadakṣiṇyāmamṛtākarṣiṇī nakhān || 19||

शरीराकर्षिणी वामनखान् रक्षतु सर्वदा ।अनङ्गकुसुमा शक्तिः पातु दक्षस्तनोपरि ॥ २०॥

śarīrākarṣiṇī vāmanakhān rakṣatu sarvadā |anaṅgakusumā śaktiḥ pātu dakṣastanopari || 20||

अनङ्गमेखला चान्यस्तनोर्ध्वमभिरक्षतु ।अनङ्गमदना दक्षस्तनं तच्चूचुकं पुनः ॥ २१॥

anaṅgamekhalā cānyastanordhvamabhirakṣatu |anaṅgamadanā dakṣastanaṃ taccūcukaṃ punaḥ || 21||

रक्षतादनिशं देवी अनङ्गमदनातुरा ।स्तनयोर्मध्यमं पायादनङ्गमदनातुराअनङ्गरेखा वामञ्च वक्षोजं तस्य चूचुकम् ॥ २२॥

rakṣatādaniśaṃ devī anaṅgamadanāturā |stanayormadhyamaṃ pāyādanaṅgamadanāturāanaṅgarekhā vāmañca vakṣojaṃ tasya cūcukam || 22||

अनङ्गवेगिनी क्रोडामनङ्गस्याङ्कुशावतु ।अनङ्गमालिनी पायाद्वक्षस्थलमहर्निशम् ॥ २३॥

anaṅgaveginī kroḍāmanaṅgasyāṅkuśāvatu |anaṅgamālinī pāyādvakṣasthalamaharniśam || 23||

सर्वसंक्षोभिणी हृच्च सर्वविद्राविणी परा ।कुक्षिं सर्वाकर्षिणी पातु पातु पार्श्वं तु दक्षिणम् ॥ २४॥

sarvasaṃkṣobhiṇī hṛcca sarvavidrāviṇī parā |kukṣiṃ sarvākarṣiṇī pātu pātu pārśvaṃ tu dakṣiṇam || 24||

आह्लादिनी वामपार्श्वं मध्यं सम्मोहिनी परा ।सा सर्वस्तम्भिनी पृष्ठं नाभिं वै सर्वजृम्भिणी ॥ २५॥

āhlādinī vāmapārśvaṃ madhyaṃ sammohinī parā |sā sarvastambhinī pṛṣṭhaṃ nābhiṃ vai sarvajṛmbhiṇī || 25||

वशङ्करी वस्तिदेशं कटिं सा सर्वरञ्जिनी ।उन्मादिनी तु सर्वाद्या पायाज्जघनमण्डलम् ॥ २६॥

vaśaṅkarī vastideśaṃ kaṭiṃ sā sarvarañjinī |unmādinī tu sarvādyā pāyājjaghanamaṇḍalam || 26||

सर्वार्थसाधिनीशक्तिर्नितम्बं रक्षतादथ ।दक्षस्फिचं सदा पातु सर्वसम्पत्प्रपूरिणी ॥ २७॥

sarvārthasādhinīśaktirnitambaṃ rakṣatādatha |dakṣasphicaṃ sadā pātu sarvasampatprapūriṇī || 27||

सर्वमन्त्रमयीशक्तिः पातु वामस्फिचं मम ।पायात्ककुन्दरद्वन्द्वं सर्वद्वन्द्वक्षयङ्करी ॥ ३१॥

sarvamantramayīśaktiḥ pātu vāmasphicaṃ mama |pāyātkakundaradvandvaṃ sarvadvandvakṣayaṅkarī || 31||

सर्वसिद्धिप्रदा देवी वृषणं पातु दक्षिणम् ।सर्वसम्पत्प्रदा देवी वृषणं पातु वामकम् ॥ ३२॥

sarvasiddhipradā devī vṛṣaṇaṃ pātu dakṣiṇam |sarvasampatpradā devī vṛṣaṇaṃ pātu vāmakam || 32||

सर्वप्रियङ्करी देवी गुह्यं रक्षतु मे सदा ।मेढ्रं रक्षतु मे देवी सर्वमङ्गलकारिणी ॥ ३३॥

sarvapriyaṅkarī devī guhyaṃ rakṣatu me sadā |meḍhraṃ rakṣatu me devī sarvamaṅgalakāriṇī || 33||

सर्वकामप्रदा देवी पातु मुष्कं तु दक्षिणम् ।तयोर्मद्।ह्ध्यं सदा पातु सर्वकामफलप्रदा ।पायात्तदन्यं देवी तु सर्वदुःखविमोचिनी ॥ ३४॥

sarvakāmapradā devī pātu muṣkaṃ tu dakṣiṇam |tayormad|hdhyaṃ sadā pātu sarvakāmaphalapradā |pāyāttadanyaṃ devī tu sarvaduḥkhavimocinī || 34||

सर्वमृत्युप्रशमनी देवी पातु गुदं मम ।पातु देवी देहमद्।ह्ध्यं सर्वविघ्ननिवारिणी ॥ ३५॥

sarvamṛtyupraśamanī devī pātu gudaṃ mama |pātu devī dehamad|hdhyaṃ sarvavighnanivāriṇī || 35||

सर्वाङ्गसुन्दरी देवी रक्षताद्दक्षसक्थिकम् ।वामसक्थितलं पायत्सर्वसौभाग्यदायिनी ॥ ३६॥

sarvāṅgasundarī devī rakṣatāddakṣasakthikam |vāmasakthitalaṃ pāyatsarvasaubhāgyadāyinī || 36||

अष्ठीवं मम सर्वज्ञा देवी रक्षतु दक्षिणम् ।अन्यष्ठीवं सर्वशक्तिर्देवी पातु चिरं मम ॥ ३७॥

aṣṭhīvaṃ mama sarvajñā devī rakṣatu dakṣiṇam |anyaṣṭhīvaṃ sarvaśaktirdevī pātu ciraṃ mama || 37||

सर्वैश्वर्यप्रदा देवी दक्षजानुं सदावतु ।सर्वज्ञानमयी देवी तदन्यज्जानु रक्षतु ॥ ३८॥

sarvaiśvaryapradā devī dakṣajānuṃ sadāvatu |sarvajñānamayī devī tadanyajjānu rakṣatu || 38||

अव्यादियं दक्षजङ्घां सर्वव्याधिविनाशिनी ।तदन्यं पातु देवी च सर्वाधारस्वरूपिणी ॥ ३९॥

avyādiyaṃ dakṣajaṅghāṃ sarvavyādhivināśinī |tadanyaṃ pātu devī ca sarvādhārasvarūpiṇī || 39||

सर्वपापहरा देवी दक्षगुल्भं सदावतु ।सर्वानन्दमयी देवी वामगुल्फं सदावतु ॥ ४०॥

sarvapāpaharā devī dakṣagulbhaṃ sadāvatu |sarvānandamayī devī vāmagulphaṃ sadāvatu || 40||

पार्ष्णिं मे दक्षिणं पायात्सर्वरक्षास्वरूपिणी ।अव्यात्सव्यं सदा पार्ष्णिं सर्वेप्सितफलप्रदा ॥ ४१॥

pārṣṇiṃ me dakṣiṇaṃ pāyātsarvarakṣāsvarūpiṇī |avyātsavyaṃ sadā pārṣṇiṃ sarvepsitaphalapradā || 41||

दक्षाङ्घ्रिं वशिनी पातु पूर्वं वाग्देवता मम ।सर्वकामेश्वरी पुर्वं सदा वाग्देवतोत्तरम् ॥ ४२॥

dakṣāṅghriṃ vaśinī pātu pūrvaṃ vāgdevatā mama |sarvakāmeśvarī purvaṃ sadā vāgdevatottaram || 42||

मोदिनी प्रपदं पातु दक्षिणं विमलेतरम् ।अङ्गुलीररुणा पातु दक्षपादनखोज्ज्वला ॥ ४३॥

modinī prapadaṃ pātu dakṣiṇaṃ vimaletaram |aṅgulīraruṇā pātu dakṣapādanakhojjvalā || 43||

तदन्यं जयिनी पायात्सदा वाग्देवतेतरम् ।दक्षपादलं सर्वेश्वरी वाग्देवता मुदा ॥ ४४॥

tadanyaṃ jayinī pāyātsadā vāgdevatetaram |dakṣapādalaṃ sarveśvarī vāgdevatā mudā || 44||

वामपादतलं पायात्कौलिनी देवता मम ।कुर्वन्तु जृम्भणा बाणास्त्रैलोक्यकर्षणं मम ॥ ४५॥

vāmapādatalaṃ pāyātkaulinī devatā mama |kurvantu jṛmbhaṇā bāṇāstrailokyakarṣaṇaṃ mama || 45||

मोहं संहरताद्दिक्षु कोदण्डं भृङ्गमौर्विकम् ।करोतु सततं पाशी वशीकरणमुत्तमम् ॥ ४६॥

mohaṃ saṃharatāddikṣu kodaṇḍaṃ bhṛṅgamaurvikam |karotu satataṃ pāśī vaśīkaraṇamuttamam || 46||

विदधात्वङ्कुशा नित्यं स्तम्भनं शत्रुसङ्गरे ।पीठं मे कामरूपाख्या पातु कामान्निकामतः ॥ ४७॥

vidadhātvaṅkuśā nityaṃ stambhanaṃ śatrusaṅgare |pīṭhaṃ me kāmarūpākhyā pātu kāmānnikāmataḥ || 47||

पूर्णं पूर्णगिरेः पीठं पायादर्थं मदीयकम् ।जालन्धरस्य जालन्ध्रं पीठं रक्षतु मे सदा ॥ ४८॥

pūrṇaṃ pūrṇagireḥ pīṭhaṃ pāyādarthaṃ madīyakam |jālandharasya jālandhraṃ pīṭhaṃ rakṣatu me sadā || 48||

(/पूर्णं पुर्णागिरीपीठं पयादर्थं मदीयकम् ॥ ४८॥)

(/pūrṇaṃ purṇāgirīpīṭhaṃ payādarthaṃ madīyakam || 48||)

सायुज्यं तनुतां प्राज्यं श्रीपीठं श्रीकरं मम ।कामेश्वरी चात्मतत्त्वं रक्षेद्वज्रेश्वरी च माम् ॥ ४९॥

sāyujyaṃ tanutāṃ prājyaṃ śrīpīṭhaṃ śrīkaraṃ mama |kāmeśvarī cātmatattvaṃ rakṣedvajreśvarī ca mām || 49||

विद्यातत्त्वं शैवतत्त्वं पायाच्छ्री भगमालिनी ।कामं छिन्द्यान्महाशत्रुममृतार्णवमासनम् ॥ ५०॥

vidyātattvaṃ śaivatattvaṃ pāyācchrī bhagamālinī |kāmaṃ chindyānmahāśatrumamṛtārṇavamāsanam || 50||

क्रोधं बोधापहं हन्याद्रक्तपोताम्बुजासनम् ।लोभं दिव्यासनं भिन्द्याद्देव्यात्मा दिव्यरूपभाक् ॥ ५१॥

krodhaṃ bodhāpahaṃ hanyādraktapotāmbujāsanam |lobhaṃ divyāsanaṃ bhindyāddevyātmā divyarūpabhāk || 51||

मोहं संहरताच्चक्रं मदं मन्त्रासनं महत् ।मात्सर्यं नाशयेन्नित्यं मम साध्यासनं जवात् ॥ ५२॥

mohaṃ saṃharatāccakraṃ madaṃ mantrāsanaṃ mahat |mātsaryaṃ nāśayennityaṃ mama sādhyāsanaṃ javāt || 52||

आधारं त्रिपुरा रक्षेत्स्वाधिष्ठानं पुरेश्वरी ।मणिपूरं मणिद्योतं पायात्त्रिपुरसुन्दरी ॥ ५३॥

ādhāraṃ tripurā rakṣetsvādhiṣṭhānaṃ pureśvarī |maṇipūraṃ maṇidyotaṃ pāyāttripurasundarī || 53||

अव्यादनाहतं भव्यं नित्यं त्रिपुरवासिनी ।विशुद्धं त्रिपुराश्रीश्च आज्ञा त्रिपुरमालिनी ॥ ५४॥

avyādanāhataṃ bhavyaṃ nityaṃ tripuravāsinī |viśuddhaṃ tripurāśrīśca ājñā tripuramālinī || 54||

इडां मे त्रिपुरा सिद्धा त्रिपुराम्बा च पिङ्गलाम् ।सुषुम्नां पातु मे नित्यं महात्रिपुरसुन्दरी ॥ ५५॥

iḍāṃ me tripurā siddhā tripurāmbā ca piṅgalām |suṣumnāṃ pātu me nityaṃ mahātripurasundarī || 55||

त्रैलोक्यमोहनं चक्रं रोमकूपांश्च पातु मे ।सर्वाशापूरकं चक्रं सप्तधातूंश्च रक्षतु ॥ ५६॥

trailokyamohanaṃ cakraṃ romakūpāṃśca pātu me |sarvāśāpūrakaṃ cakraṃ saptadhātūṃśca rakṣatu || 56||

सर्वसंक्षोभणं चक्रं प्राणाद्यं वायुपञ्चकम् ।सौभाग्यदायकं चक्रं नागाद्यानिलपञ्चकम् ॥ ५७॥

sarvasaṃkṣobhaṇaṃ cakraṃ prāṇādyaṃ vāyupañcakam |saubhāgyadāyakaṃ cakraṃ nāgādyānilapañcakam || 57||

सर्वार्थसाधकं चान्तःकरणानां चतुष्टयम् ।सर्वरक्षाकरं चक्रं पायात्पूर्तेष्टकं च मे ॥ ५८॥

sarvārthasādhakaṃ cāntaḥkaraṇānāṃ catuṣṭayam |sarvarakṣākaraṃ cakraṃ pāyātpūrteṣṭakaṃ ca me || 58||

सर्वरोगहरं चक्रं रक्षतान्मे गुणत्रयम् ।सर्वसिद्धिप्रदं चक्रं ममाव्यात्कोशपञ्चकम् ॥ ५९॥

sarvarogaharaṃ cakraṃ rakṣatānme guṇatrayam |sarvasiddhipradaṃ cakraṃ mamāvyātkośapañcakam || 59||

सर्वानन्दमयं चक्रं यशः कीर्तिं च रक्षतु ।सौन्दर्यमन्मथः पायाद्रतिः पातु रतिं मम ॥ ६०॥

sarvānandamayaṃ cakraṃ yaśaḥ kīrtiṃ ca rakṣatu |saundaryamanmathaḥ pāyādratiḥ pātu ratiṃ mama || 60||

प्रीतिर्मे पातु सा प्रीतिरुत्साहं च वसन्तकः ।सङ्कल्पं कल्पकोद्यानं महालक्ष्मीर्मम श्रियम् ॥ ६१॥

prītirme pātu sā prītirutsāhaṃ ca vasantakaḥ |saṅkalpaṃ kalpakodyānaṃ mahālakṣmīrmama śriyam || 61||

कान्तिं कपालिनी रक्षेन्मन्दिरं मम मन्डपम् ।पुत्रान् शङ्खनिधिः पायाद्भार्यां पद्मनिधिस्तथा ॥ ६२॥

kāntiṃ kapālinī rakṣenmandiraṃ mama manḍapam |putrān śaṅkhanidhiḥ pāyādbhāryāṃ padmanidhistathā || 62||

मार्गे मां भैरवी रक्षेन्मातङ्गी मुकुटं सदा ।अष्टदिक्षु महेन्द्राद्याः सायुधाःपान्तु मां सदा ॥ ६३॥

mārge māṃ bhairavī rakṣenmātaṅgī mukuṭaṃ sadā |aṣṭadikṣu mahendrādyāḥ sāyudhāḥpāntu māṃ sadā || 63||

पायादूर्ध्वदिशं ब्रह्मा विष्णुश्चक्रायुधो त्वधः ।अनावृतानि स्थानानि कवचेन तु यानि मे ॥ ६४॥

pāyādūrdhvadiśaṃ brahmā viṣṇuścakrāyudho tvadhaḥ |anāvṛtāni sthānāni kavacena tu yāni me || 64||

तानि रक्षन्तु सततं शिवादि गुरवः क्रमात् ।एतत्सौभाग्यकवचं स्वकरे यस्तु धारयेत् ॥ ६५॥

tāni rakṣantu satataṃ śivādi guravaḥ kramāt |etatsaubhāgyakavacaṃ svakare yastu dhārayet || 65||

त्रिसन्ध्यं पठति प्रीत्या शृणुयाद्वा समाहितः ।तस्य शीघ्रेण सिध्यन्ति सिद्धयस्त्वणिमादयः ॥ ६७॥

trisandhyaṃ paṭhati prītyā śṛṇuyādvā samāhitaḥ |tasya śīghreṇa sidhyanti siddhayastvaṇimādayaḥ || 67||

ब्रह्मवित्तु गिरीशेन्द्रकन्र्परविभिः समः ।विहरत्खिलान् लोकान् सिद्धगन्धर्वसेवितः ॥ ६८॥

brahmavittu girīśendrakanrparavibhiḥ samaḥ |viharatkhilān lokān siddhagandharvasevitaḥ || 68||

तस्य स्मरणमात्रेण महाभूतपिशाचकाः ।कीटवत्प्रपलायन्ते कूषमाण्डा भैरवादयः ॥ ६९॥

tasya smaraṇamātreṇa mahābhūtapiśācakāḥ |kīṭavatprapalāyante kūṣamāṇḍā bhairavādayaḥ || 69||

तस्याङ्घ्रितोयपतनात् प्रशाम्यन्ति महारुजः ।तत्पादकमलासक्तरजोलेशाभिमर्शनात् ॥ ७०॥

tasyāṅghritoyapatanāt praśāmyanti mahārujaḥ |tatpādakamalāsaktarajoleśābhimarśanāt || 70||

वश्यं भवति शीघ्रेण त्रैलोक्यं सचराचरम् ।भूपालमहिला भूपाः किमु माया विमोहिताः ॥ ७१॥

vaśyaṃ bhavati śīghreṇa trailokyaṃ sacarācaram |bhūpālamahilā bhūpāḥ kimu māyā vimohitāḥ || 71||

इति श्रीवामकेश्वरतन्त्रे नित्या षोडशार्णवरसौभाग्यकवचं समाप्तम् ।शुभमस्तु ।श्रीशुभम् ।

iti śrīvāmakeśvaratantre nityā ṣoḍaśārṇavarasaubhāgyakavacaṃ samāptam |śubhamastu |śrīśubham |