बालाकवचम् ३ Shri Bala Kavacham 3

अस्य श्रीबालात्रिपुरसुन्दरीकवचस्तोत्रमहामन्त्रस्य दक्षिणामूर्तिःऋषिः । पङ्क्तिश्छन्दः । बालात्रिपुरसुन्दरी देवता । ऐं बीजम् ।क्लीं शक्तिः सौः कीलकम् । जपे विनियोगः । मूलेन कराङ्ग न्यासौ ।दिग्बन्धः ध्यानं ऐङ्कारासन इत्यादि सञ्चारिणीम् ॥ लमित्यादि ।मन्दिरे सुखमासीनं भैरवं चन्द्रशेखरम् ।बद्धाञ्जलिर्नमस्कृत्य परिपप्रच्छ पार्वती ॥ १॥

asya śrībālātripurasundarīkavacastotramahāmantrasya dakṣiṇāmūrtiḥṛṣiḥ | paṅktiśchandaḥ | bālātripurasundarī devatā | aiṃ bījam |klīṃ śaktiḥ sauḥ kīlakam | jape viniyogaḥ | mūlena karāṅga nyāsau |digbandhaḥ dhyānaṃ aiṅkārāsana ityādi sañcāriṇīm || lamityādi |mandire sukhamāsīnaṃ bhairavaṃ candraśekharam |baddhāñjalirnamaskṛtya paripapraccha pārvatī || 1||

यदि प्रसन्नो देवेश यदिवाऽनुग्रहो मयि ।बालायाः कवचं ब्रूहि सदा कल्याणसौख्यदम् ॥ २॥

yadi prasanno deveśa yadivā'nugraho mayi |bālāyāḥ kavacaṃ brūhi sadā kalyāṇasaukhyadam || 2||

शिव उवाचसाधु साधु महेशानि सम्यक्सम्यक्च पृच्छसि ।यत्प्रसादान्महेशानि लसत्त्रैलोक्यमुत्तमम् ॥ ३॥

śiva uvācasādhu sādhu maheśāni samyaksamyakca pṛcchasi |yatprasādānmaheśāni lasattrailokyamuttamam || 3||

ततश्चराचरं विश्वं यतो ब्रह्मादयोऽमराः ।यद्भ्रूविलासवत्प्रीत्या सिद्धयस्त्वणिमादयः ॥ ४॥

tataścarācaraṃ viśvaṃ yato brahmādayo'marāḥ |yadbhrūvilāsavatprītyā siddhayastvaṇimādayaḥ || 4||

तद्बालापरमेश्वर्याः कवचं सर्वसिद्धिदम् ॥कथयिष्ये शृणुष्व त्वं सर्वसौभाग्यकारकम् ॥ ५॥

tadbālāparameśvaryāḥ kavacaṃ sarvasiddhidam ||kathayiṣye śṛṇuṣva tvaṃ sarvasaubhāgyakārakam || 5||

शिरो रक्षतु मे बाला ललाटे पातु सुन्दरी ।कर्णौ श्रीः सर्वदा पातु नेत्रे कमलवासिनी ॥ ६॥

śiro rakṣatu me bālā lalāṭe pātu sundarī |karṇau śrīḥ sarvadā pātu netre kamalavāsinī || 6||

ओष्ठमध्ये विशालाक्षी जिह्वां पातु सरस्वती ।मुखं मनोरमा पातु चिबुकं मे त्वचञ्चला ॥ ७॥

oṣṭhamadhye viśālākṣī jihvāṃ pātu sarasvatī |mukhaṃ manoramā pātu cibukaṃ me tvacañcalā || 7||

कण्ठं श्रीकालिका पातु बाहू रक्षतु चण्डिका ।करौ षडक्षरी पातु हृदयं हरिवल्लभा ॥ ८॥

kaṇṭhaṃ śrīkālikā pātu bāhū rakṣatu caṇḍikā |karau ṣaḍakṣarī pātu hṛdayaṃ harivallabhā || 8||

मातङ्गी पातु मे मध्यं भवानी जठरं मम ।नाभिं श्रीभैरवी पातु गुह्यं कामेश्वरी तथा ॥ ९॥

mātaṅgī pātu me madhyaṃ bhavānī jaṭharaṃ mama |nābhiṃ śrībhairavī pātu guhyaṃ kāmeśvarī tathā || 9||

कटिं पायात्कामधात्री जानुनी जगदीश्वरी ।जङ्घे मे त्वरिता पातु जङ्घपाश्वेऽश्ववाहिनी ॥ १०॥

kaṭiṃ pāyātkāmadhātrī jānunī jagadīśvarī |jaṅghe me tvaritā pātu jaṅghapāśve'śvavāhinī || 10||

पर्वतस्था पातु पादौ अङ्गुली भूमिवासिनी ।अग्रतस्त्रिपुरा पातु पृष्ठतो मम भैरवी ॥ ११॥

parvatasthā pātu pādau aṅgulī bhūmivāsinī |agratastripurā pātu pṛṣṭhato mama bhairavī || 11||

दक्षिणे सुन्दरी पातु वामे मङ्गलदायिनी ।ऊर्ध्वं ज्योतिष्मती शक्तिः अधोऽनन्तस्वरूपिणी ॥ १२॥

dakṣiṇe sundarī pātu vāme maṅgaladāyinī |ūrdhvaṃ jyotiṣmatī śaktiḥ adho'nantasvarūpiṇī || 12||

सर्वशत्रुहरा दुर्गा पातु मे विजया रणे ।गृहं रक्षेद्भद्रकाली वाचं वाग्वादिनी मम ॥ १३॥

sarvaśatruharā durgā pātu me vijayā raṇe |gṛhaṃ rakṣedbhadrakālī vācaṃ vāgvādinī mama || 13||

ओष्ठौ मे मातृकाः सर्वाः सर्वकार्येषु सर्वदा ।इत्येतत्कवचं प्रोक्तं यः पठेत्सुसमाहितः ॥ १४॥

oṣṭhau me mātṛkāḥ sarvāḥ sarvakāryeṣu sarvadā |ityetatkavacaṃ proktaṃ yaḥ paṭhetsusamāhitaḥ || 14||

दिवा वा यदि वा रात्रौ त्रिसन्ध्यं भक्तिमान्नरः ।ज्ञात्वैतत्कवचं पुण्यं सर्वान्कामानवाप्नुयात् ॥ १५॥

divā vā yadi vā rātrau trisandhyaṃ bhaktimānnaraḥ |jñātvaitatkavacaṃ puṇyaṃ sarvānkāmānavāpnuyāt || 15||

इति श्रीबालाकवचं (३) सम्पूर्णम् ।

iti śrībālākavacaṃ (3) sampūrṇam |