बालाकवचम् ४ दुःस्वप्ननाशक Shri Bala Duhsvapnanashaka Kavacham 4

बालार्कमण्डलाभासां चतुर्बाहुं त्रिलोचनाम् ।पाशाङ्कुशवराभीतीर्धारयन्तीं शिवां भजे ॥ १॥

bālārkamaṇḍalābhāsāṃ caturbāhuṃ trilocanām |pāśāṅkuśavarābhītīrdhārayantīṃ śivāṃ bhaje || 1||

पुर्वस्यां भैरवी पातु बाला मां पातु दक्षिणे ।मालिनी पश्चिमे पातु वासिनी चोत्तरेऽवतु ॥ २॥

purvasyāṃ bhairavī pātu bālā māṃ pātu dakṣiṇe |mālinī paścime pātu vāsinī cottare'vatu || 2||

ऊर्ध्वं पातु महादेवी श्रीबाला त्रिपुरेश्वरी ।अधस्तात् पातु देवेशी पातालतलवासिनी ॥ ३॥

ūrdhvaṃ pātu mahādevī śrībālā tripureśvarī |adhastāt pātu deveśī pātālatalavāsinī || 3||

आधारे वाग्भवः पातु कामराजस्तथा हृदि ।महाविद्या भगवती पातु मां परमेश्वरी ॥ ४॥

ādhāre vāgbhavaḥ pātu kāmarājastathā hṛdi |mahāvidyā bhagavatī pātu māṃ parameśvarī || 4||

ऐं लं ललाटे मां पायात् ह्रौं ह्रीं हंसश्च नेत्रयोः ।नासिकाकर्णयोः पातु ह्रीं ह्रैं तु चिबुके तथा ॥ ५॥

aiṃ laṃ lalāṭe māṃ pāyāt hrauṃ hrīṃ haṃsaśca netrayoḥ |nāsikākarṇayoḥ pātu hrīṃ hraiṃ tu cibuke tathā || 5||

सौः पातु मे हृदि गले ह्रीं ह्रः नाभिदेशके ।सौः क्लीं श्रीं गुह्यदेशे तु ऐं ह्रीं पातु च पादयोः ॥ ६॥

sauḥ pātu me hṛdi gale hrīṃ hraḥ nābhideśake |sauḥ klīṃ śrīṃ guhyadeśe tu aiṃ hrīṃ pātu ca pādayoḥ || 6||

ह्रीं क्लीं मां सर्वतः पातु सौः पायात् पदसन्धिषु ।जले स्थले तथा कोशे देवराजगृहे तथा ॥ ७॥

hrīṃ klīṃ māṃ sarvataḥ pātu sauḥ pāyāt padasandhiṣu |jale sthale tathā kośe devarājagṛhe tathā || 7||

क्षें क्षें मां त्वरिता पातु मां चक्री सौः मनोभवा ।हंसौः पायान्महादेवी परं निष्कलदेवता ॥ ८॥

kṣeṃ kṣeṃ māṃ tvaritā pātu māṃ cakrī sauḥ manobhavā |haṃsauḥ pāyānmahādevī paraṃ niṣkaladevatā || 8||

विजया मङ्गला दूती कल्पा मां भगमालिनी ।ज्वालामालिनी नित्या सर्वदा पातु मां शिवा ॥ ९॥

vijayā maṅgalā dūtī kalpā māṃ bhagamālinī |jvālāmālinī nityā sarvadā pātu māṃ śivā || 9||

इतीदं कवचं देवि देवानामपि दुर्लभम् ।तव प्रीत्या समाख्यातं गोपनीयं प्रयत्नतः ॥ १०॥

itīdaṃ kavacaṃ devi devānāmapi durlabham |tava prītyā samākhyātaṃ gopanīyaṃ prayatnataḥ || 10||

इदं रहस्यं परमं गुह्याद्गुह्यतरं प्रिये ।धन्यं प्रशस्यमायुष्यं भोगमोक्षप्रदं शिवम् ॥ ११॥

idaṃ rahasyaṃ paramaṃ guhyādguhyataraṃ priye |dhanyaṃ praśasyamāyuṣyaṃ bhogamokṣapradaṃ śivam || 11||

इति श्रीबाला दुःस्वप्ननाशककवचं (४) सम्पूर्णम् ।

iti śrībālā duḥsvapnanāśakakavacaṃ (4) sampūrṇam |