बालादेवीप्रार्थना Shri Bala Devi Prarthana

देवि प्रसीद ।देवि! यातं वयः । कालो जरादूतः प्रतीक्षते ।अनुध्यायन् कर्म कृतं उदीक्षे जन्मसन्ततिम् ॥ १॥

devi prasīda |devi! yātaṃ vayaḥ | kālo jarādūtaḥ pratīkṣate |anudhyāyan karma kṛtaṃ udīkṣe janmasantatim || 1||

जन्मन्यस्मिन्मत्पितरौ बन्धवो गुरुसत्तमाः ।त्वदन्ति विद्याविनयशीलाढ्यं मामुपानयन् ॥ २॥

janmanyasminmatpitarau bandhavo gurusattamāḥ |tvadanti vidyāvinayaśīlāḍhyaṃ māmupānayan || 2||

स्मरामि सर्वदा देवि तानव्याजकृपार्द्रितान् ।एतज्जन्म कृतार्थं मे लब्धात्त्वत्पादसेवनात् ॥ ३॥

smarāmi sarvadā devi tānavyājakṛpārdritān |etajjanma kṛtārthaṃ me labdhāttvatpādasevanāt || 3||

देहो वाणी मनो धीश्च कृतार्था मम भाग्यतः ।विधेहि जीवितस्यान्ते त्वल्लग्ना वासनाः शुभाः ॥ ४॥

deho vāṇī mano dhīśca kṛtārthā mama bhāgyataḥ |vidhehi jīvitasyānte tvallagnā vāsanāḥ śubhāḥ || 4||

प्रसीद तत्त्वत्कृपया स्थिरत्वत्पदचिन्तनः ।प्रसन्नधीरसम्मोहो नयेयं क्षणमन्तिमम् ॥ ५॥

prasīda tattvatkṛpayā sthiratvatpadacintanaḥ |prasannadhīrasammoho nayeyaṃ kṣaṇamantimam || 5||

लभेय जन्म यत्किञ्चित् यस्मिन्यायां त्वदन्तिकम् ।विन्देय तादृशांस्तान्वा देशिकान्मद्धिते रतान् ॥ ६॥

labheya janma yatkiñcit yasminyāyāṃ tvadantikam |vindeya tādṛśāṃstānvā deśikānmaddhite ratān || 6||

इति श्रीबालादेविप्रार्थना समाप्ता ।

iti śrībālādeviprārthanā samāptā |