धनलक्ष्मीस्तोत्रम् अथवा धनेश्वरी स्तोत्रम् Shri Dhanalakshmi Stotram

श्रीधनदा उवाचदेवी देवमुपागम्य नीलकण्ठं मम प्रियम् ।कृपया पार्वती प्राह शङ्करं करुणाकरम् ॥ १॥

śrīdhanadā uvācadevī devamupāgamya nīlakaṇṭhaṃ mama priyam |kṛpayā pārvatī prāha śaṅkaraṃ karuṇākaram || 1||

श्रीदेव्युवाचब्रूहि वल्लभ साधूनां दरिद्राणां कुटुम्बिनाम् ।दरिद्रदलनोपायमञ्जसैव धनप्रदम् ॥ २॥

śrīdevyuvācabrūhi vallabha sādhūnāṃ daridrāṇāṃ kuṭumbinām |daridradalanopāyamañjasaiva dhanapradam || 2||

श्रीशिव उवाचपूजयन् पार्वतीवाक्यमिदमाह महेश्वरः ।उचितं जगदम्बासि तव भूतानुकम्पया ॥ ३॥

śrīśiva uvācapūjayan pārvatīvākyamidamāha maheśvaraḥ |ucitaṃ jagadambāsi tava bhūtānukampayā || 3||

ससीतं सानुजं रामं साञ्जनेयं सहानुगम् ।प्रणम्य परमानन्दं वक्ष्येऽहं स्तोत्रमुत्तमम् ॥ ४॥

sasītaṃ sānujaṃ rāmaṃ sāñjaneyaṃ sahānugam |praṇamya paramānandaṃ vakṣye'haṃ stotramuttamam || 4||

धनदं श्रद्दधानानां सद्यः सुलभकारकम् ।योगक्षेमकरं सत्यं सत्यमेव वचो मम ॥ ५॥

dhanadaṃ śraddadhānānāṃ sadyaḥ sulabhakārakam |yogakṣemakaraṃ satyaṃ satyameva vaco mama || 5||

पठन्तः पाठयन्तोऽपि ब्राह्मणैरास्तिकोत्तमैः ।धनलाभो भवेदाशु नाशमेति दरिद्रता ॥ ६॥

paṭhantaḥ pāṭhayanto'pi brāhmaṇairāstikottamaiḥ |dhanalābho bhavedāśu nāśameti daridratā || 6||

भूभवांशभवां भूत्यै भक्तिकल्पलतां शुभाम् ।प्रार्थयेत्तां यथाकामं कामधेनुस्वरूपिणीम् ॥ ७॥

bhūbhavāṃśabhavāṃ bhūtyai bhaktikalpalatāṃ śubhām |prārthayettāṃ yathākāmaṃ kāmadhenusvarūpiṇīm || 7||

धर्मदे धनदे देवि दानशीले दयाकरे ।त्वं प्रसीद महेशानि! यदर्थं प्रार्थयाम्यहम् ॥ ८॥

dharmade dhanade devi dānaśīle dayākare |tvaṃ prasīda maheśāni! yadarthaṃ prārthayāmyaham || 8||

धरामरप्रिये पुण्ये धन्ये धनदपूजिते ।सुधनं धार्मिकं देहि यजमानाय सत्वरम् ॥ ९॥ वर् यजनाय सुसत्वरम्

dharāmarapriye puṇye dhanye dhanadapūjite |sudhanaṃ dhārmikaṃ dehi yajamānāya satvaram || 9|| var yajanāya susatvaram

रम्ये रुद्रप्रिये रूपे रामरूपे रतिप्रिये ।शिखीसखमनोमूर्त्ते प्रसीद प्रणते मयि ॥ १०॥ वर् शशिप्रभमनोमूर्ते

ramye rudrapriye rūpe rāmarūpe ratipriye |śikhīsakhamanomūrtte prasīda praṇate mayi || 10|| var śaśiprabhamanomūrte

आरक्तचरणाम्भोजे सिद्धिसर्वार्थदायिके । वर् सिद्धसर्वाङ्गभूषितेदिव्याम्बरधरे दिव्ये दिव्यमाल्योपशोभिते ॥ ११॥

āraktacaraṇāmbhoje siddhisarvārthadāyike | var siddhasarvāṅgabhūṣitedivyāmbaradhare divye divyamālyopaśobhite || 11||

समस्तगुणसम्पन्ने सर्वलक्षणलक्षिते ।(अधिकपाठ\। जातरूपमणीन्द्वादिभूषिते भूमिभूषिते ।)शरच्चन्द्रमुखे नीले नीलनीरजलोचने ॥ १२॥

samastaguṇasampanne sarvalakṣaṇalakṣite |(adhikapāṭha\| jātarūpamaṇīndvādibhūṣite bhūmibhūṣite |)śaraccandramukhe nīle nīlanīrajalocane || 12||

चञ्चरीकचमूचारुश्रीहारकुटिलालके ।मत्ते भगवति मातः कलकण्ठरवामृते ॥ १३॥ वर् मुखामृते

cañcarīkacamūcāruśrīhārakuṭilālake |matte bhagavati mātaḥ kalakaṇṭharavāmṛte || 13|| var mukhāmṛte

हासावलोकनैर्दिव्यैर्भक्तचिन्तापहारिके ।रूपलावण्यतारूण्यकारुण्यगुणभाजने ॥ १४॥

hāsāvalokanairdivyairbhaktacintāpahārike |rūpalāvaṇyatārūṇyakāruṇyaguṇabhājane || 14||

क्वणत्कङ्कणमञ्जीरे लसल्लीलाकराम्बुजे ।रुद्रप्रकाशिते तत्त्वे धर्माधारे धरालये ॥ १५॥

kvaṇatkaṅkaṇamañjīre lasallīlākarāmbuje |rudraprakāśite tattve dharmādhāre dharālaye || 15||

प्रयच्छ यजमानाय धनं धर्मैकसाधनम् ।मातस्त्वं मेऽविलम्बेन दिशस्व जगदम्बिके ॥ १६॥ वर् मातर्मे मावि

prayaccha yajamānāya dhanaṃ dharmaikasādhanam |mātastvaṃ me'vilambena diśasva jagadambike || 16|| var mātarme māvi

कृपया करुणागारे प्रार्थितं कुरु मे शुभे ।वसुधे वसुधारूपे वसुवासववन्दिते ॥ १७॥

kṛpayā karuṇāgāre prārthitaṃ kuru me śubhe |vasudhe vasudhārūpe vasuvāsavavandite || 17||

धनदे यजमानाय वरदे वरदा भव । वर् यजनायैवब्रह्मण्यैर्ब्राह्मणैः पूज्ये पार्वतीशिवशङ्करे ॥ १८॥ वर् ब्रह्मण्ये ब्राह्मणे

dhanade yajamānāya varade varadā bhava | var yajanāyaivabrahmaṇyairbrāhmaṇaiḥ pūjye pārvatīśivaśaṅkare || 18|| var brahmaṇye brāhmaṇe

स्तोत्रं दरिद्रताव्याधिशमनं सुधनप्रदम् ।श्रीकरे शङ्करे श्रीदे प्रसीद मयि किङ्करे ॥ १९॥

stotraṃ daridratāvyādhiśamanaṃ sudhanapradam |śrīkare śaṅkare śrīde prasīda mayi kiṅkare || 19||

पार्वतीशप्रसादेन सुरेशकिङ्करेरितम् ।श्रद्धया ये पठिष्यन्ति पाठयिष्यन्ति भक्तितः ॥ २०॥

pārvatīśaprasādena sureśakiṅkareritam |śraddhayā ye paṭhiṣyanti pāṭhayiṣyanti bhaktitaḥ || 20||

सहस्रमयुतं लक्षं धनलाभो भवेद् ध्रुवम् ।धनदाय नमस्तुभ्यं निधिपद्माधिपाय च ।भवन्तु त्वत्प्रसादान्मे धनधान्यादिसम्पदः ॥ २१॥

sahasramayutaṃ lakṣaṃ dhanalābho bhaved dhruvam |dhanadāya namastubhyaṃ nidhipadmādhipāya ca |bhavantu tvatprasādānme dhanadhānyādisampadaḥ || 21||

॥ इति श्रीधनलक्ष्मीस्तोत्रं अथवा धनेश्वरी सम्पूर्णम् ॥

|| iti śrīdhanalakṣmīstotraṃ athavā dhaneśvarī sampūrṇam ||