दुर्गाष्टकम् २ Durga Ashtakam

कात्यायनि महामाये खड्गबाणधनुर्धरे ।खड्गधारिणि चण्डि दुर्गादेवि नमोऽस्तु ते ॥ १॥

kātyāyani mahāmāye khaḍgabāṇadhanurdhare |khaḍgadhāriṇi caṇḍi durgādevi namo'stu te || 1||

वसुदेवसुते कालि वासुदेवसहोदरि ।वसुन्धराश्रिये नन्दे दुर्गादेवि नमोऽस्तु ते ॥ २॥

vasudevasute kāli vāsudevasahodari |vasundharāśriye nande durgādevi namo'stu te || 2||

योगनिद्रे महानिद्रे योगमाये महेश्वरि ।योगसिद्धिकरी शुद्धे दुर्गादेवि नमोऽस्तु ते ॥ ३॥

yoganidre mahānidre yogamāye maheśvari |yogasiddhikarī śuddhe durgādevi namo'stu te || 3||

शङ्खचक्रगदापाणे शार्ङ्गज्यायतबाहवे ।पीताम्बरधरे धन्ये दुर्गादेवि नमोऽस्तु ते ॥ ४॥

śaṅkhacakragadāpāṇe śārṅgajyāyatabāhave |pītāmbaradhare dhanye durgādevi namo'stu te || 4||

ऋग्यजुस्सामाथर्वाणश्चतुस्सामन्तलोकिनि ।ब्रह्मस्वरूपिणि ब्राह्मि दुर्गादेवि नमोऽस्तु ते ॥ ५॥

ṛgyajussāmātharvāṇaścatussāmantalokini |brahmasvarūpiṇi brāhmi durgādevi namo'stu te || 5||

वृष्णीनां कुलसम्भूते विष्णुनाथसहोदरि ।वृष्णिरूपधरे धन्ये दुर्गादेवि नमोऽस्तु ते ॥ ६॥

vṛṣṇīnāṃ kulasambhūte viṣṇunāthasahodari |vṛṣṇirūpadhare dhanye durgādevi namo'stu te || 6||

सर्वज्ञे सर्वगे शर्वे सर्वेशे सर्वसाक्षिणि ।सर्वामृतजटाभारे दुर्गादेवि नमोऽस्तु ते ॥ ७॥

sarvajñe sarvage śarve sarveśe sarvasākṣiṇi |sarvāmṛtajaṭābhāre durgādevi namo'stu te || 7||

अष्टबाहु महासत्त्वे अष्टमी नवमि प्रिये ।अट्टहासप्रिये भद्रे दुर्गादेवि नमोऽस्तु ते ॥ ८॥

aṣṭabāhu mahāsattve aṣṭamī navami priye |aṭṭahāsapriye bhadre durgādevi namo'stu te || 8||

दुर्गाष्टकमिदं पुण्यं भक्तितो यः पठेन्नरः ।सर्वकाममवाप्नोति दुर्गालोकं स गच्छति ॥ ९॥

durgāṣṭakamidaṃ puṇyaṃ bhaktito yaḥ paṭhennaraḥ |sarvakāmamavāpnoti durgālokaṃ sa gacchati || 9||

इति श्रीदुर्गाष्टकं सम्पूर्णम् ।

iti śrīdurgāṣṭakaṃ sampūrṇam |