विष्णुकवचम् अथवा त्रैलोक्यमङ्गलकवचम् Vishnukavacham or Trailokyamangalakavacham from Naradapancharatra

श्रीगणेशाय नमः ॥नारद उवाच ।भगवन्सर्वधर्मज्ञ कवचं यत्प्रकाशितम् ।त्रैलोक्यमङ्गलं नाम कृपया कथय प्रभो ॥ १॥

śrīgaṇeśāya namaḥ ||nārada uvāca |bhagavansarvadharmajña kavacaṃ yatprakāśitam |trailokyamaṅgalaṃ nāma kṛpayā kathaya prabho || 1||

सनत्कुमार उवाच ।शृणु वक्ष्यामि विप्रेन्द्र कवचं परमाद्भुतम् ।नारायणेन कथितं कृपया ब्रह्मणे पुरा ॥ २॥

sanatkumāra uvāca |śṛṇu vakṣyāmi viprendra kavacaṃ paramādbhutam |nārāyaṇena kathitaṃ kṛpayā brahmaṇe purā || 2||

ब्रह्मणा कथितं मह्यं परं स्नेहाद्वदामि ते ।अति गुह्यतरं तत्त्वं ब्रह्ममन्त्रौघविग्रहम् ॥ ३॥

brahmaṇā kathitaṃ mahyaṃ paraṃ snehādvadāmi te |ati guhyataraṃ tattvaṃ brahmamantraughavigraham || 3||

यद्धृत्वा पठनाद्ब्रह्मा सृष्टिं वितनुते ध्रुवम् ।यद्धृत्वा पठनात्पाति महालक्ष्मीर्जगत्त्रयम् ॥ ४॥

yaddhṛtvā paṭhanādbrahmā sṛṣṭiṃ vitanute dhruvam |yaddhṛtvā paṭhanātpāti mahālakṣmīrjagattrayam || 4||

पठनाद्धारणाच्छम्भुः संहर्ता सर्वमन्त्रवित् ।त्रैलोक्यजननी दुर्गा महिषादिमहासुरान् ॥ ५॥

paṭhanāddhāraṇācchambhuḥ saṃhartā sarvamantravit |trailokyajananī durgā mahiṣādimahāsurān || 5||

वरदृप्तान् जघानैव पठनाद्धारणाद्यतः ।एवमिन्द्रादयः सर्वे सर्वैश्वर्यमवाप्नुयुः ॥ ६॥

varadṛptān jaghānaiva paṭhanāddhāraṇādyataḥ |evamindrādayaḥ sarve sarvaiśvaryamavāpnuyuḥ || 6||

इदं कवचमत्यन्तगुप्तं कुत्रापि नो वदेत् ।शिष्याय भक्तियुक्ताय साधकाय प्रकाशयेत् ॥ ७॥

idaṃ kavacamatyantaguptaṃ kutrāpi no vadet |śiṣyāya bhaktiyuktāya sādhakāya prakāśayet || 7||

शठाय परशिष्याय दत्वा मृत्युमवाप्नुयात् ।त्रैलोक्यमङ्गलस्यास्य कवचस्य प्रजापतिः ॥ ८॥

śaṭhāya paraśiṣyāya datvā mṛtyumavāpnuyāt |trailokyamaṅgalasyāsya kavacasya prajāpatiḥ || 8||

ऋषिश्छन्दश्च गायत्री देवो नारायणस्स्वयम् ।धर्मार्थकाममोक्षेषु विनियोगः प्रकीर्तितः ॥ ९॥

ṛṣiśchandaśca gāyatrī devo nārāyaṇassvayam |dharmārthakāmamokṣeṣu viniyogaḥ prakīrtitaḥ || 9||

प्रणवो मे शिरः पातु नमो नारायणाय च ।भालं मे नेत्रयुगलमष्टार्णो भुक्तिमुक्तिदः ॥ १०॥

praṇavo me śiraḥ pātu namo nārāyaṇāya ca |bhālaṃ me netrayugalamaṣṭārṇo bhuktimuktidaḥ || 10||

क्लीं पायाच्छ्रोत्रयुग्मं चैकाक्षरः सर्वमोहनः ।क्लीं कृष्णाय सदा घ्राणं गोविन्दायेति जिह्विकाम् ॥ ११॥

klīṃ pāyācchrotrayugmaṃ caikākṣaraḥ sarvamohanaḥ |klīṃ kṛṣṇāya sadā ghrāṇaṃ govindāyeti jihvikām || 11||

गोपीजनपदवल्लभाय स्वाहाननं मम ।अष्टादशाक्षरो मन्त्रः कण्ठं पातु दशाक्षरः ॥ १२॥

gopījanapadavallabhāya svāhānanaṃ mama |aṣṭādaśākṣaro mantraḥ kaṇṭhaṃ pātu daśākṣaraḥ || 12||

गोपीजनवल्लभाय स्वाहा भुजद्वयम् ।क्लीं ग्लैं क्लीं श्यामलाङ्गाय नमः स्कन्धौ दशाक्षरः ॥ १३॥

gopījanavallabhāya svāhā bhujadvayam |klīṃ glaiṃ klīṃ śyāmalāṅgāya namaḥ skandhau daśākṣaraḥ || 13||

क्लीं कृष्णः क्लीं करौ पायात् क्लीं कृष्णो मां गतोऽवतु ।हृदयं भुवनेशानः क्लीं कृष्णः क्लीं स्तनौ मम ॥ १४॥

klīṃ kṛṣṇaḥ klīṃ karau pāyāt klīṃ kṛṣṇo māṃ gato'vatu |hṛdayaṃ bhuvaneśānaḥ klīṃ kṛṣṇaḥ klīṃ stanau mama || 14||

गोपालायाग्निजायान्तं कुक्षियुग्मं सदाऽवतु ।क्लीं कृष्णाय सदा पातु पार्श्वयुग्ममनुत्तमः ॥ १५॥

gopālāyāgnijāyāntaṃ kukṣiyugmaṃ sadā'vatu |klīṃ kṛṣṇāya sadā pātu pārśvayugmamanuttamaḥ || 15||

कृष्णगोविन्दकौ पातां स्मराद्यौ ङेयुतौ मनुः । ?अष्टाक्षरः पातु नाभिं कृष्णेति द्वयाक्षरोऽवतु ॥ १६॥

kṛṣṇagovindakau pātāṃ smarādyau ṅeyutau manuḥ | ?aṣṭākṣaraḥ pātu nābhiṃ kṛṣṇeti dvayākṣaro'vatu || 16||

पृष्ठं क्लीं कृष्णकं गल्लं क्लीं कृष्णाय द्विठान्तकः ।सक्थिनी सततं पातु श्रीं ह्रीं क्लीं कृष्णठद्वयम् ॥ १७॥?ठ

pṛṣṭhaṃ klīṃ kṛṣṇakaṃ gallaṃ klīṃ kṛṣṇāya dviṭhāntakaḥ |sakthinī satataṃ pātu śrīṃ hrīṃ klīṃ kṛṣṇaṭhadvayam || 17||?ṭha

ऊरू सप्ताक्षरः पायात्त्रयोदशाक्षरोऽवतु ।श्रीं ह्रीं क्लीं पदतो गोपीजनवल्लभदन्ततः ॥ १८॥

ūrū saptākṣaraḥ pāyāttrayodaśākṣaro'vatu |śrīṃ hrīṃ klīṃ padato gopījanavallabhadantataḥ || 18||

भाय स्वाहेति पायुं वै क्लीं ह्रीं श्रीं सदशार्णकः ।जानुनी च सदा पातु ह्रीं श्रीं क्लीं च दशाक्षरः ॥ १९॥

bhāya svāheti pāyuṃ vai klīṃ hrīṃ śrīṃ sadaśārṇakaḥ |jānunī ca sadā pātu hrīṃ śrīṃ klīṃ ca daśākṣaraḥ || 19||

त्रयोदशाक्षरः पातु जङ्घे चक्राद्युदायुधः ।अष्टादशाक्षरो ह्रीं श्रीं पूर्वको विंशदर्णकः ॥ २०॥

trayodaśākṣaraḥ pātu jaṅghe cakrādyudāyudhaḥ |aṣṭādaśākṣaro hrīṃ śrīṃ pūrvako viṃśadarṇakaḥ || 20||

सर्वाङ्गं मे सदा पातु द्वारकानायको बली ।नमो भगवते पश्चाद्वासुदेवाय तत्परम् ॥ २१॥

sarvāṅgaṃ me sadā pātu dvārakānāyako balī |namo bhagavate paścādvāsudevāya tatparam || 21||

ताराद्यो द्वादशार्णोऽयं प्राच्यां मां सर्वदाऽवतु ।श्रीं ह्रीं क्लीं च दशार्णस्तु ह्रीं क्लीं श्रीं षोडशार्णकः ॥ २२॥

tārādyo dvādaśārṇo'yaṃ prācyāṃ māṃ sarvadā'vatu |śrīṃ hrīṃ klīṃ ca daśārṇastu hrīṃ klīṃ śrīṃ ṣoḍaśārṇakaḥ || 22||

गदाद्यायुधो विष्णुर्मामग्नेर्दिशि रक्षतु ।ह्रीं श्रीं दशाक्षरो मन्त्रो दक्षिणे मां सदाऽवतु ॥ २३॥

gadādyāyudho viṣṇurmāmagnerdiśi rakṣatu |hrīṃ śrīṃ daśākṣaro mantro dakṣiṇe māṃ sadā'vatu || 23||

तारो नमो भगवते रुक्मिणीवल्लभाय च ।स्वाहेति षोडशार्णोऽयं नैरृत्यां दिशि रक्षतु ॥ २४॥

tāro namo bhagavate rukmiṇīvallabhāya ca |svāheti ṣoḍaśārṇo'yaṃ nairṛtyāṃ diśi rakṣatu || 24||

क्लीं हृषीके पदं शाय नमो मां वारुणोऽवतु । ?शायअष्टादषार्णः कामान्तो वायव्ये मां सदाऽवतु ॥ २५॥

klīṃ hṛṣīke padaṃ śāya namo māṃ vāruṇo'vatu | ?śāyaaṣṭādaṣārṇaḥ kāmānto vāyavye māṃ sadā'vatu || 25||

श्रीं मायाकामकृष्णाय गोविन्दाय द्विठो मनुः ।द्वादशार्णात्मको विष्णुरुत्तरे मां सदाऽवतु ॥ २६॥

śrīṃ māyākāmakṛṣṇāya govindāya dviṭho manuḥ |dvādaśārṇātmako viṣṇuruttare māṃ sadā'vatu || 26||

वाग्भयं कामकृष्णाय ह्रीं गोविन्दाय तत्परम् ।श्री गोपीजनवल्लभान्ताय स्वाहा हस्तौ ततः ॥ २७॥

vāgbhayaṃ kāmakṛṣṇāya hrīṃ govindāya tatparam |śrī gopījanavallabhāntāya svāhā hastau tataḥ || 27||

द्वाविंशत्यक्षरो मन्त्रो मामैशान्ये सदाऽवतु ।कालियस्य फणामध्ये दिव्यं नृत्यं करोति तम् ॥ २८॥

dvāviṃśatyakṣaro mantro māmaiśānye sadā'vatu |kāliyasya phaṇāmadhye divyaṃ nṛtyaṃ karoti tam || 28||

नमामि देवकीपुत्रं नृत्यराजानमच्युतम् ।द्वात्रिंशदक्षरो मन्त्रोऽप्यधो मां सर्वदाऽवतु ॥ २९॥

namāmi devakīputraṃ nṛtyarājānamacyutam |dvātriṃśadakṣaro mantro'pyadho māṃ sarvadā'vatu || 29||

कामदेवाय विद्महे पुष्पबाणाय धीमहि ।तन्नोऽनङ्गः प्रचोदयादेषा मां पातुचोर्ध्वतः ॥ ३०॥

kāmadevāya vidmahe puṣpabāṇāya dhīmahi |tanno'naṅgaḥ pracodayādeṣā māṃ pātucordhvataḥ || 30||

इति ते कथितं विप्र ब्रह्ममन्त्रौघविग्रहम् ।त्रैलोक्यमङ्गलं नाम कवचं ब्रह्मरूपकम् ॥ ३१॥

iti te kathitaṃ vipra brahmamantraughavigraham |trailokyamaṅgalaṃ nāma kavacaṃ brahmarūpakam || 31||

ब्रह्मणा कथितं पूर्वं नारायणमुखाच्छ्रुतम् ।तव स्नेहान्मयाख्यातं प्रवक्तव्यं न कस्यचित् ॥ ३२॥

brahmaṇā kathitaṃ pūrvaṃ nārāyaṇamukhācchrutam |tava snehānmayākhyātaṃ pravaktavyaṃ na kasyacit || 32||

गुरुं प्रणम्य विधिवत्कवचं प्रपठेत्ततः ।सकृद्द्विस्त्रिर्यथाज्ञानं स हि सर्वतपोमयः ॥ ३३॥

guruṃ praṇamya vidhivatkavacaṃ prapaṭhettataḥ |sakṛddvistriryathājñānaṃ sa hi sarvatapomayaḥ || 33||

मन्त्रेषु सकलेष्वेव देशिको नात्र संशयः ।शतमष्टोत्तरं चास्य पुरश्चर्या विधिः स्मृतः ॥ ३४॥

mantreṣu sakaleṣveva deśiko nātra saṃśayaḥ |śatamaṣṭottaraṃ cāsya puraścaryā vidhiḥ smṛtaḥ || 34||

हवनादीन्दशांशेन कृत्वा तत्साधयेद्ध्रुवम् ।यदि स्यात्सिद्धकवचो विष्णुरेव भवेत्स्वयम् ॥ ३५॥

havanādīndaśāṃśena kṛtvā tatsādhayeddhruvam |yadi syātsiddhakavaco viṣṇureva bhavetsvayam || 35||

मन्त्रसिद्धिर्भवेत्तस्य पुरश्चर्याविधानतः ।स्पर्धामुद्धूय सततं लक्ष्मीर्वाणी वसेत्ततः ॥ ३६॥

mantrasiddhirbhavettasya puraścaryāvidhānataḥ |spardhāmuddhūya satataṃ lakṣmīrvāṇī vasettataḥ || 36||

पुष्पाञ्जल्यष्टकं दत्वा मूलेनैव पठेत्सकृत् ।दशवर्षसहस्राणि पूजायाः फलमाप्नुयात् ॥ ३७॥

puṣpāñjalyaṣṭakaṃ datvā mūlenaiva paṭhetsakṛt |daśavarṣasahasrāṇi pūjāyāḥ phalamāpnuyāt || 37||

भूर्जे विलिख्याङ्गुलिकां स्वर्णस्थां धारयेद्यदि ।कण्ठे वा दक्षिणे बाहौ सोऽपि विष्णुर्न संशयः ॥ ३८॥

bhūrje vilikhyāṅgulikāṃ svarṇasthāṃ dhārayedyadi |kaṇṭhe vā dakṣiṇe bāhau so'pi viṣṇurna saṃśayaḥ || 38||

अश्वमेधसहस्राणि वाजपेयशतानि च ।महादानानि यान्येव प्रादक्षिण्यं भुवस्तथा ॥ ३९॥

aśvamedhasahasrāṇi vājapeyaśatāni ca |mahādānāni yānyeva prādakṣiṇyaṃ bhuvastathā || 39||

कलां नार्हन्ति तान्येव सकृदुच्चारणात्ततः ।कवचस्य प्रसादेन जीवन्मुक्तो भवेन्नरः ॥ ४०॥

kalāṃ nārhanti tānyeva sakṛduccāraṇāttataḥ |kavacasya prasādena jīvanmukto bhavennaraḥ || 40||

त्रैलोक्यं क्षोभयत्येव त्रैलोक्यविजयी भवेत् ।इदं कवचमज्ञात्वा यजेद्यः पुरुषोत्तमम् ।शतलक्षं प्रजप्तोऽपि न मन्त्रस्तस्य सिद्ध्यति ॥ ४१॥

trailokyaṃ kṣobhayatyeva trailokyavijayī bhavet |idaṃ kavacamajñātvā yajedyaḥ puruṣottamam |śatalakṣaṃ prajapto'pi na mantrastasya siddhyati || 41||

इति श्री नारदपञ्चरात्रे ज्ञानामृतसारे त्रैलोक्यमङ्गलंनाम विष्णुकवचं सम्पूर्णम् ॥

iti śrī nāradapañcarātre jñānāmṛtasāre trailokyamaṅgalaṃnāma viṣṇukavacaṃ sampūrṇam ||