विठ्ठलाष्टोत्तरशतनामस्तोत्रम् Shriviththalashtottarashatanamastotram

श्रुत्वा नामसहस्रं श्रीविठ्ठलस्य गुणान्वितम् ।पार्वती परिपप्रच्छ शङ्करं लोकशङ्करम् ॥ १॥

śrutvā nāmasahasraṃ śrīviṭhṭhalasya guṇānvitam |pārvatī paripapraccha śaṅkaraṃ lokaśaṅkaram || 1||

श्रीपार्वत्युवाच ॥देवदेव महादेव देवानुग्रहविग्रह ।अष्टोत्तरशतं नाम्नां तस्य देवस्य मे वद ॥ २॥

śrīpārvatyuvāca ||devadeva mahādeva devānugrahavigraha |aṣṭottaraśataṃ nāmnāṃ tasya devasya me vada || 2||

जनः कलिमलादिग्धोऽलसः कामाविलो जडः ।पाठाद्यस्य सकृद्वापि सौशील्यादियुतो भवेत् ॥ ३॥

janaḥ kalimalādigdho'lasaḥ kāmāvilo jaḍaḥ |pāṭhādyasya sakṛdvāpi sauśīlyādiyuto bhavet || 3||

तदहं श्रेतुमिच्छामि तवाज्ञातं न विद्यते ।इत्युक्तो भार्यया शम्भुः संस्मरन् पुरुषोत्तमम् ॥ ४॥

tadahaṃ śretumicchāmi tavājñātaṃ na vidyate |ityukto bhāryayā śambhuḥ saṃsmaran puruṣottamam || 4||

कटिस्थितकरद्वन्द्वं जगाद नगपुत्रिकाम् ।श्रीशङ्कर उवाचदेवि लोकोपकाराय कृतः प्रश्नस्त्वयानघे ॥ ५॥

kaṭisthitakaradvandvaṃ jagāda nagaputrikām |śrīśaṅkara uvācadevi lokopakārāya kṛtaḥ praśnastvayānaghe || 5||

हिताय सर्वजन्तूनां नाम्नामष्टोत्तरं शतम् ।श्रीविठ्ठलस्य देवस्य वाग्मिसिद्धिप्रदं नृणाम् ॥ ६॥

hitāya sarvajantūnāṃ nāmnāmaṣṭottaraṃ śatam |śrīviṭhṭhalasya devasya vāgmisiddhipradaṃ nṛṇām || 6||

अष्टोत्तरशतस्याहमृषिः प्रोक्तो मनीषिभिः ।छन्दोऽनुष्टुब्देवता श्रीविठ्ठलः परिकीर्तितः ॥ ७॥

aṣṭottaraśatasyāhamṛṣiḥ prokto manīṣibhiḥ |chando'nuṣṭubdevatā śrīviṭhṭhalaḥ parikīrtitaḥ || 7||

ध्यायेच्छ्रीविठ्ठलाख्यं समपदकमलं पद्मपत्रायताक्षंगम्भीरस्निग्धहासं कटिनिहितकरं नीलमेघावभासम् ।विद्युद्वासो वसानं मणिमयमकुटं कुण्डलोद्भासिगण्डंमायूरस्रग्विभूषाभयवरसहितं कौस्तुभोद्भासिताङ्गम् ॥ ८॥

dhyāyecchrīviṭhṭhalākhyaṃ samapadakamalaṃ padmapatrāyatākṣaṃgambhīrasnigdhahāsaṃ kaṭinihitakaraṃ nīlameghāvabhāsam |vidyudvāso vasānaṃ maṇimayamakuṭaṃ kuṇḍalodbhāsigaṇḍaṃmāyūrasragvibhūṣābhayavarasahitaṃ kaustubhodbhāsitāṅgam || 8||

ॐ क्लीं विठ्ठलः पुण्डरीकाक्षः पुण्डरीकनिभेक्षणः ।पुण्डरीकाश्रमपदः पुण्डरीकजलाप्लुतः ॥ ९॥

oṃ klīṃ viṭhṭhalaḥ puṇḍarīkākṣaḥ puṇḍarīkanibhekṣaṇaḥ |puṇḍarīkāśramapadaḥ puṇḍarīkajalāplutaḥ || 9||

पुण्डरीकक्षेत्रवासः पुण्डरीकवरप्रदः ।शारदाधिष्ठितद्वारः शारदेन्दुनिभाननः ॥ १०॥

puṇḍarīkakṣetravāsaḥ puṇḍarīkavarapradaḥ |śāradādhiṣṭhitadvāraḥ śāradendunibhānanaḥ || 10||

नारदाधिष्ठितद्वारो नारदेशप्रपूजितः ।भुवनाधीश्वरीद्वारो भुवनाधीश्वरीश्वरः ॥ ११॥

nāradādhiṣṭhitadvāro nāradeśaprapūjitaḥ |bhuvanādhīśvarīdvāro bhuvanādhīśvarīśvaraḥ || 11||

दुर्गाश्रितोत्तरद्वारो दुर्गमागमसंवृतः ।क्षुल्लपेशीपिनद्धोरुगोपेष्ट्याश्लिष्टजानुकः ॥ १२॥

durgāśritottaradvāro durgamāgamasaṃvṛtaḥ |kṣullapeśīpinaddhorugopeṣṭyāśliṣṭajānukaḥ || 12||

कटिस्थितकरद्वन्द्वो वरदाभयमुद्रितः ।त्रेतातोरणपालस्थत्रिविक्रम इतीरितः ॥ १३॥

kaṭisthitakaradvandvo varadābhayamudritaḥ |tretātoraṇapālasthatrivikrama itīritaḥ || 13||

तितऊक्षेत्रपोऽश्वत्थकोटीश्वरवरप्रदः ।स एव करवीरस्थो नारीनारयणेति च ॥ १४॥

titaūkṣetrapo'śvatthakoṭīśvaravarapradaḥ |sa eva karavīrastho nārīnārayaṇeti ca || 14||

नीरासङ्गमसंस्थश्च सैकतप्रतिमार्चितः ।वेणुनादेन देवानां मनः श्रवणमङ्गलः ॥ १५॥

nīrāsaṅgamasaṃsthaśca saikatapratimārcitaḥ |veṇunādena devānāṃ manaḥ śravaṇamaṅgalaḥ || 15||

देवकन्याकोटिकोटिनीराजितपदाम्बुजः ।पद्मतीर्थस्थिताश्वत्थो नरो नारायणो महान् ॥ १६॥

devakanyākoṭikoṭinīrājitapadāmbujaḥ |padmatīrthasthitāśvattho naro nārāyaṇo mahān || 16||

चन्द्रभागासरोनीरकेलिलोलदिगम्बरः ।ससध्रीचीत्सवीषूचीरितिश्रुत्यर्थरूपधृक् ॥ १७॥

candrabhāgāsaronīrakeliloladigambaraḥ |sasadhrīcītsavīṣūcīritiśrutyartharūpadhṛk || 17||

ज्योतिर्मयक्षेत्रवासी सर्वोत्कृष्टत्रयात्मकः ।स्वकुण्डलप्रतिष्ठाता पञ्चायुधजलप्रियः ॥ १८॥

jyotirmayakṣetravāsī sarvotkṛṣṭatrayātmakaḥ |svakuṇḍalapratiṣṭhātā pañcāyudhajalapriyaḥ || 18||

क्षेत्रपालाग्रपूजार्थी पार्वतीपतिपूजितः ।चतुर्मुखस्तुतो विष्णुर्जगन्मोहनरूपधृक् ॥ १९॥

kṣetrapālāgrapūjārthī pārvatīpatipūjitaḥ |caturmukhastuto viṣṇurjaganmohanarūpadhṛk || 19||

मन्त्राक्षरावलीहृत्स्थकौस्तुभोरःस्थलप्रियः ।स्वमन्त्रोज्जीवितजनः सर्वकीर्तनवल्लभः ॥ २०॥

mantrākṣarāvalīhṛtsthakaustubhoraḥsthalapriyaḥ |svamantrojjīvitajanaḥ sarvakīrtanavallabhaḥ || 20||

वासुदेवो दयासिन्धुर्गोगोपीपरिवारितः ।युधिष्ठिरहतारातिर्मुक्तकेशी वरप्रदः ॥ २१॥

vāsudevo dayāsindhurgogopīparivāritaḥ |yudhiṣṭhirahatārātirmuktakeśī varapradaḥ || 21||

बलदेवोपदेष्टा च रुक्मिणीपुत्रनायकः ।गुरुपुत्रप्रदो नित्यमहिमा भक्तवत्सलः ॥ २२॥

baladevopadeṣṭā ca rukmiṇīputranāyakaḥ |guruputraprado nityamahimā bhaktavatsalaḥ || 22||

भक्तारिहा महादेवो भक्ताभिलषितप्रदः ।सव्यसाची ब्रह्मविद्यागुरुर्मोहापकारकः ॥ २३॥

bhaktārihā mahādevo bhaktābhilaṣitapradaḥ |savyasācī brahmavidyāgururmohāpakārakaḥ || 23||

भीमामार्गप्रदाता च भीमसेनमतानुगः ।गन्धर्वानुग्रहकरो ह्यपराधसहो हरिः ॥ २४॥

bhīmāmārgapradātā ca bhīmasenamatānugaḥ |gandharvānugrahakaro hyaparādhasaho hariḥ || 24||

स्वप्नदर्शी स्वप्नदृश्यो भक्तदुःस्वप्नशान्तिकृत् ।आपत्कालानुपेक्षी चानपेक्षेऽपेक्षितो जनैः ॥ २५॥

svapnadarśī svapnadṛśyo bhaktaduḥsvapnaśāntikṛt |āpatkālānupekṣī cānapekṣe'pekṣito janaiḥ || 25||

सत्योपयाचनः सत्यसन्धः सत्याभितारकः ।सत्याजानी रमाजानी राधाजानी रथाङ्गभाक् ॥ २६॥

satyopayācanaḥ satyasandhaḥ satyābhitārakaḥ |satyājānī ramājānī rādhājānī rathāṅgabhāk || 26||

सिञ्चनः क्रीडनो गोपैर्दधिदुग्धापहारकः ।बोधिन्युत्सवयुक् तीर्थः शयन्युत्सवभूमिभाक् ॥ २७॥

siñcanaḥ krīḍano gopairdadhidugdhāpahārakaḥ |bodhinyutsavayuk tīrthaḥ śayanyutsavabhūmibhāk || 27||

मार्गशीर्षोत्सवाक्रान्तवेणुनादपदाङ्कभूः ।दध्यन्नव्यञ्जनाभोक्ता दधिभुक्कामपूरकः ॥ २८॥

mārgaśīrṣotsavākrāntaveṇunādapadāṅkabhūḥ |dadhyannavyañjanābhoktā dadhibhukkāmapūrakaḥ || 28||

बिलान्तर्धानसत्केलिलोलुपो गोपवल्लभः ।सखिनेत्रे पिधायाशु कोऽहम्पृच्छाविशारदः ॥ २९॥

bilāntardhānasatkelilolupo gopavallabhaḥ |sakhinetre pidhāyāśu ko'hampṛcchāviśāradaḥ || 29||

समासमप्रश्नपूर्वमुष्टिमुष्टिप्रदर्शकः ।कुटिलीलासु कुशलः कुटिलालकमण्डितः ॥ ३०॥

samāsamapraśnapūrvamuṣṭimuṣṭipradarśakaḥ |kuṭilīlāsu kuśalaḥ kuṭilālakamaṇḍitaḥ || 30||

सारीलीलानुसारी च वाहक्रीडापरः सदा ।कार्णाटकीरतिरतो मङ्गलोपवनस्थितः ॥ ३१॥

sārīlīlānusārī ca vāhakrīḍāparaḥ sadā |kārṇāṭakīratirato maṅgalopavanasthitaḥ || 31||

माध्याह्नतीर्थपूरेक्षाविस्मायितजगत्त्रयः ।निवारितक्षेत्रविघ्नो दुष्टदुर्बुद्धिभञ्जनः ॥ ३२॥

mādhyāhnatīrthapūrekṣāvismāyitajagattrayaḥ |nivāritakṣetravighno duṣṭadurbuddhibhañjanaḥ || 32||

वालुकावृक्षपाषाणपशुपक्षिप्रतिष्ठितः ।आशुतोषो भक्तवशः पाण्डुरङ्गः सुपावनः ॥ ३३॥

vālukāvṛkṣapāṣāṇapaśupakṣipratiṣṭhitaḥ |āśutoṣo bhaktavaśaḥ pāṇḍuraṅgaḥ supāvanaḥ || 33||

पुण्यकीर्तिः परं ब्रह्म ब्रह्मण्यः कृष्ण एव च ।अष्टोत्तरशतं नाम्नां विठ्ठलस्य महात्मनः ॥ ३४॥

puṇyakīrtiḥ paraṃ brahma brahmaṇyaḥ kṛṣṇa eva ca |aṣṭottaraśataṃ nāmnāṃ viṭhṭhalasya mahātmanaḥ || 34||

इति ते कथितं देवि पवित्रं मङ्गलं महत् ।त्रिकालमेककालं वा यः पठेन्नियतः शुचिः ॥ ३५॥

iti te kathitaṃ devi pavitraṃ maṅgalaṃ mahat |trikālamekakālaṃ vā yaḥ paṭhenniyataḥ śuciḥ || 35||

करस्थाः सिद्धयस्तस्य सत्यं सत्यं वदाम्यहम् ।अपुत्रो बहुपुत्रः स्यादविद्यः सर्वविद्यते ॥ ३६॥

karasthāḥ siddhayastasya satyaṃ satyaṃ vadāmyaham |aputro bahuputraḥ syādavidyaḥ sarvavidyate || 36||

निर्धनो धनदो नूनं भवेदस्य निषेवणात् ।अविनाभूतभार्यश्च जितारातिर्निरामयः ॥ ३७॥

nirdhano dhanado nūnaṃ bhavedasya niṣevaṇāt |avinābhūtabhāryaśca jitārātirnirāmayaḥ || 37||

बहुनोक्तेन किं देवि हरिवल्लभतामियात् ।सूत उवाचश्रुत्वा तन्महदाश्वर्यमष्टोत्तरशां परम् ॥ ३८॥

bahunoktena kiṃ devi harivallabhatāmiyāt |sūta uvācaśrutvā tanmahadāśvaryamaṣṭottaraśāṃ param || 38||

पुनः पुनः प्रणम्येशं पार्वती वाक्यमब्रवीत् ।पार्वत्युवाचतत्क्षेत्रवसतिश्चैव तत्तीर्थस्यावगाहनम् ॥ ३९॥

punaḥ punaḥ praṇamyeśaṃ pārvatī vākyamabravīt |pārvatyuvācatatkṣetravasatiścaiva tattīrthasyāvagāhanam || 39||

तन्मूर्तिदर्शनं चैव तन्नामावलिकीर्तनम् ।देहि मे सर्वदा स्वामिन्नेकाग्रमनसा विभो ॥ ४०॥

tanmūrtidarśanaṃ caiva tannāmāvalikīrtanam |dehi me sarvadā svāminnekāgramanasā vibho || 40||

श्रीशङ्कर उवाचतदस्तु तव देवेशि ममाप्येतन्मनीषितम् ।इत्युक्त्वा प्रययौ तस्य निवासं परमादरात् ॥ ४१॥

śrīśaṅkara uvācatadastu tava deveśi mamāpyetanmanīṣitam |ityuktvā prayayau tasya nivāsaṃ paramādarāt || 41||

इति श्रीपद्ममुप्राणान्तर्गतं श्रीविठ्ठलाष्टोत्तरशतनामस्तोत्रं सम्पूर्णम् ।

iti śrīpadmamuprāṇāntargataṃ śrīviṭhṭhalāṣṭottaraśatanāmastotraṃ sampūrṇam |