त्रिविक्रमस्तोत्रम् Shritrivikramastotram

श्रीगणेशाय नमः ॥विदारितारिसङ्घातं पदाक्रान्तजगत्त्रयम् ।गदाचक्रधरं धीरं सदा वन्दे त्रिविक्रमम् ॥ १॥

śrīgaṇeśāya namaḥ ||vidāritārisaṅghātaṃ padākrāntajagattrayam |gadācakradharaṃ dhīraṃ sadā vande trivikramam || 1||

शङ्खाम्भोजकरद्वन्द्वहुङ्कारार्दितदानव ।शङ्काऽऽतङ्कहराहं ते किङ्करोऽस्मि त्रिविक्रम ॥ २॥

śaṅkhāmbhojakaradvandvahuṅkārārditadānava |śaṅkā''taṅkaharāhaṃ te kiṅkaro'smi trivikrama || 2||

क्षमाकरोल्लसच्चक्रं कृपाविपुललोचनम् ।अपारसुगुणस्तोममुपासे तं त्रिविक्रमम् ॥ ३॥

kṣamākarollasaccakraṃ kṛpāvipulalocanam |apārasuguṇastomamupāse taṃ trivikramam || 3||

रमाधराश्लिष्टपार्श्वं समस्तसुरसेवितम् ।भ्रमादिदोषहरं तं नमामि त्रिविक्रमम् ॥ ४॥

ramādharāśliṣṭapārśvaṃ samastasurasevitam |bhramādidoṣaharaṃ taṃ namāmi trivikramam || 4||

योगादङ्गमजस्राक्षीद्गङ्गामङ्गुष्ठतोऽसृजत् ।तुङ्गामरचया तुङ्गं तङ्गयामि त्रिविक्रमम् ॥ ५॥

yogādaṅgamajasrākṣīdgaṅgāmaṅguṣṭhato'sṛjat |tuṅgāmaracayā tuṅgaṃ taṅgayāmi trivikramam || 5||

नानालङ्कारभरितं पीनावयवमोहनम् ।ज्ञानानन्दमयं वन्दे श्रीनाथं तं त्रिविक्रमम् ॥ ६॥

nānālaṅkārabharitaṃ pīnāvayavamohanam |jñānānandamayaṃ vande śrīnāthaṃ taṃ trivikramam || 6||

वृन्दारकेन्द्रवन्द्याङ्घ्रिं नन्दितीर्थमुनेः प्रियम् ।कन्दर्पकोटिलावण्यं तं ध्यायामि त्रिविक्रमम् ॥ ७॥

vṛndārakendravandyāṅghriṃ nanditīrthamuneḥ priyam |kandarpakoṭilāvaṇyaṃ taṃ dhyāyāmi trivikramam || 7||

सुधाकुन्देन्दुधवलमधःकृतचराचरम् ।उदारमादरद्वन्द्वे त्रिधामानं त्रिविक्रमम् ॥ ८॥

sudhākundendudhavalamadhaḥkṛtacarācaram |udāramādaradvandve tridhāmānaṃ trivikramam || 8||

वेदान्तवेदितगुणं बोधप्रदमहर्निशम् ।आधारं नौमि जगतां श्रीधामानं त्रिविक्रमम् ॥ ९॥

vedāntaveditaguṇaṃ bodhapradamaharniśam |ādhāraṃ naumi jagatāṃ śrīdhāmānaṃ trivikramam || 9||

अनुयागेन बलिना मनुना मननेन च ।दिने दिनेऽर्चितं वन्दे मनसा तं त्रिविक्रमम् ॥ १०॥

anuyāgena balinā manunā mananena ca |dine dine'rcitaṃ vande manasā taṃ trivikramam || 10||

सर्पिःपायसनैवेद्यैर्भक्ष्यैश्च विविधैः सदा ।नृत्यवादित्रगीतैश्च तर्पयामि त्रिविक्रमम् ॥ ११॥

sarpiḥpāyasanaivedyairbhakṣyaiśca vividhaiḥ sadā |nṛtyavāditragītaiśca tarpayāmi trivikramam || 11||

वादिराजेन्द्रवरदं सोदापुरनिवासिनम् ।मोदप्रदं सदा वन्दे माधवं तं त्रिविक्रमम् ॥ १२॥

vādirājendravaradaṃ sodāpuranivāsinam |modapradaṃ sadā vande mādhavaṃ taṃ trivikramam || 12||

धूपैर्गन्धानुलेपैश्च दीपैरपि मनःप्रियैः ।तापसैः पूजितं वन्दे श्रीपतिं तं त्रिविक्रमम् ॥ १३॥

dhūpairgandhānulepaiśca dīpairapi manaḥpriyaiḥ |tāpasaiḥ pūjitaṃ vande śrīpatiṃ taṃ trivikramam || 13||

योऽसौ धवलगङ्गायाः पार्श्वे तिष्ठति सर्वदा ।देशे देशे च विख्यातमासेवे तं त्रिविक्रमम् ॥ १४॥

yo'sau dhavalagaṅgāyāḥ pārśve tiṣṭhati sarvadā |deśe deśe ca vikhyātamāseve taṃ trivikramam || 14||

अग्रे निधाय श्रीदेवीं पृष्ठे पार्श्वे च सज्जनान् ।स्वर्गिभिः परितः सेव्या मध्ये भाति त्रिविक्रमः ॥ १५॥

agre nidhāya śrīdevīṃ pṛṣṭhe pārśve ca sajjanān |svargibhiḥ paritaḥ sevyā madhye bhāti trivikramaḥ || 15||

शिलामयै रम्यतमशालावलभिमण्डपैः ।कलशैश्चोल्लसद्देवालये भाति त्रिविक्रमः ॥ १६॥

śilāmayai ramyatamaśālāvalabhimaṇḍapaiḥ |kalaśaiścollasaddevālaye bhāti trivikramaḥ || 16||

यावच्चद्रश्च सूर्यश्च यावत्तिष्ठति मेदिनी ।तावत्त्रिविक्रमः सोऽयं पूज्यस्तिष्ठतु सज्जनैः ॥ १७॥

yāvaccadraśca sūryaśca yāvattiṣṭhati medinī |tāvattrivikramaḥ so'yaṃ pūjyastiṣṭhatu sajjanaiḥ || 17||

इदं स्तोत्रं वादिराजो मुदे सज्जनसन्ततेः ।व्यधत्त तेन प्रीतोऽस्तु सदा श्रीदस्त्रिविक्रमः ॥ १८॥

idaṃ stotraṃ vādirājo mude sajjanasantateḥ |vyadhatta tena prīto'stu sadā śrīdastrivikramaḥ || 18||

इति श्रीवादिराजकृतं त्रिविक्रमस्तोत्रं सम्पूर्णम् ।

iti śrīvādirājakṛtaṃ trivikramastotraṃ sampūrṇam |