विष्णुस्तोत्रम् (ब्रह्मकृतम् ०१ विष्णुधर्मोपपुराणान्तर्गतम्) Brahmakritam Vishnu Stotram

ततः प्रणम्य देवेशमजमार्तिहरं हरिम् ।पितामहः प्रह्वतनुर्वाक्यमेतदुवाच ह ॥ २३॥

tataḥ praṇamya deveśamajamārtiharaṃ harim |pitāmahaḥ prahvatanurvākyametaduvāca ha || 23||

ज्ञातं स्वरूपमज्ञातस्वरूप भगवंस्तव ।मया न यद्वाग्विषये तत्रस्थं चाखिलं जगत् ॥ २४॥

jñātaṃ svarūpamajñātasvarūpa bhagavaṃstava |mayā na yadvāgviṣaye tatrasthaṃ cākhilaṃ jagat || 24||

धन्योऽस्म्यनुगृहीतोऽस्मि स्वरूपं यन्मया तव ।भगवञ्ज्ञातमज्ञातमनन्ताज नमोऽस्तु ते ॥ २५॥

dhanyo'smyanugṛhīto'smi svarūpaṃ yanmayā tava |bhagavañjñātamajñātamanantāja namo'stu te || 25||

यदि प्रसादं देव त्वं प्रकरोषि ममापरम् ।परमं चावतारेषु यद्रूपं तद्वदस्व मे ॥ २६॥

yadi prasādaṃ deva tvaṃ prakaroṣi mamāparam |paramaṃ cāvatāreṣu yadrūpaṃ tadvadasva me || 26||

केषु केषु मया ज्ञेयः स्थानेषु त्वमधोक्षज ।सम्भूतयो ममाचक्ष्व या भविष्यन्ति ते भुवि ॥ २७॥

keṣu keṣu mayā jñeyaḥ sthāneṣu tvamadhokṣaja |sambhūtayo mamācakṣva yā bhaviṣyanti te bhuvi || 27||

देवलोके नृलोके वा पाताले खेऽन्यतोऽपि वा ।सम्भूतयो यास्तु भवान्करिष्यति वदस्व ताः ॥ २८॥

devaloke nṛloke vā pātāle khe'nyato'pi vā |sambhūtayo yāstu bhavānkariṣyati vadasva tāḥ || 28||

त्वं कर्ता सर्वभूतानां संहर्ता चेश्वरेश्वरःतवापि कर्ता नान्योऽस्ति स्वेच्छया क्रीडते भवान् ।अहं वेद्मि भवन्तं हि न तवान्योऽस्ति वेदिता ॥ २९॥

tvaṃ kartā sarvabhūtānāṃ saṃhartā ceśvareśvaraḥtavāpi kartā nānyo'sti svecchayā krīḍate bhavān |ahaṃ vedmi bhavantaṃ hi na tavānyo'sti veditā || 29||

इति विष्णुधर्मेषु षट्षष्टितमोऽध्यायान्तर्गतंब्रह्मकृतं विष्णुस्तोत्रं सम्पूर्णम् ।

iti viṣṇudharmeṣu ṣaṭṣaṣṭitamo'dhyāyāntargataṃbrahmakṛtaṃ viṣṇustotraṃ sampūrṇam |