भैरवस्तवः अथवा भैरवस्तोत्रम् Bhairava Stavah

(भैरवस्तोत्रम्)व्याप्तचराचरभावविशेषं चिन्मयमेकमनन्तमनादिम् ।भैरवनाथमनाथशरण्यं त्वन्मयचित्ततया हृदि वन्दे ॥ १॥

(bhairavastotram)vyāptacarācarabhāvaviśeṣaṃ cinmayamekamanantamanādim |bhairavanāthamanāthaśaraṇyaṃ tvanmayacittatayā hṛdi vande || 1||

त्वन्मयमेतदशेषमिदानीं भाति मम त्वदनुग्रहशक्त्या ।त्वं च महेश सदैव ममात्मा स्वात्ममयं मम तेन समस्तम् ॥ २॥

tvanmayametadaśeṣamidānīṃ bhāti mama tvadanugrahaśaktyā |tvaṃ ca maheśa sadaiva mamātmā svātmamayaṃ mama tena samastam || 2||

स्वात्मनि विश्वगते त्वयि नाथे तेन न संसृतिभीतिकथास्ति । (संसृतिभीतिकथाऽस्ति)सत्स्वपि दुर्धरदुःखविमोहत्रासविधायिषु कर्मगणेषु ॥ ३॥

svātmani viśvagate tvayi nāthe tena na saṃsṛtibhītikathāsti | (saṃsṛtibhītikathā'sti)satsvapi durdharaduḥkhavimohatrāsavidhāyiṣu karmagaṇeṣu || 3||

अन्तक मां प्रति मा दृशमेनां क्रोधकरालतमां विनिधेहि ।शङ्करसेवनचिन्तनधीरो भीषणभैरवशक्तिमयोऽस्मि ॥ ४॥

antaka māṃ prati mā dṛśamenāṃ krodhakarālatamāṃ vinidhehi |śaṅkarasevanacintanadhīro bhīṣaṇabhairavaśaktimayo'smi || 4||

इत्थमुपोढभवन्मयसंविद्दीधितिदारितभूरितमिस्रः ।मृत्युयमान्तककर्मपिशाचैर्नाथ नमोऽस्तु न जातु बिभेमि ॥ ५॥

itthamupoḍhabhavanmayasaṃviddīdhitidāritabhūritamisraḥ |mṛtyuyamāntakakarmapiśācairnātha namo'stu na jātu bibhemi || 5||

प्रोदितसत्यविबोधमरीचिः प्रेक्षितविश्वपदार्थसतत्त्वः ।(प्रोदितसत्यविबोधमरीचिप्रेक्षितविश्वपदार्थसतत्त्वः ।)भावपरामृतनिर्भरपूर्णे त्वय्यहमात्मनि निर्वृतिमेमि ॥ ६॥

proditasatyavibodhamarīciḥ prekṣitaviśvapadārthasatattvaḥ |(proditasatyavibodhamarīciprekṣitaviśvapadārthasatattvaḥ |)bhāvaparāmṛtanirbharapūrṇe tvayyahamātmani nirvṛtimemi || 6||

मानसगोचरमेति यदैव क्लेशदशा तनुतापविधात्री ।(क्लेशदशाऽतनुतापविधात्री, क्लेशदशा तनुतामविधाय)नाथ तदैव मम त्वदभेदस्तोत्रपरामृतवृष्टिरुदेति ॥ ७॥

mānasagocarameti yadaiva kleśadaśā tanutāpavidhātrī |(kleśadaśā'tanutāpavidhātrī, kleśadaśā tanutāmavidhāya)nātha tadaiva mama tvadabhedastotraparāmṛtavṛṣṭirudeti || 7||

शङ्कर सत्यमिदं व्रतदानस्नानतपो भवतापविदारि ।तावकशास्त्रपरामृतचिन्ता स्यन्दति चेतसि निर्वृतिधाराम् ॥ ८॥

śaṅkara satyamidaṃ vratadānasnānatapo bhavatāpavidāri |tāvakaśāstraparāmṛtacintā syandati cetasi nirvṛtidhārām || 8||

नृत्यति गायति हृष्यति गाढं संविदियं मम भैरवनाथ ।त्वां प्रियमाप्य सुदर्शनमेकं दुर्लभमन्यजनैः समयज्ञम् ॥ ९॥

nṛtyati gāyati hṛṣyati gāḍhaṃ saṃvidiyaṃ mama bhairavanātha |tvāṃ priyamāpya sudarśanamekaṃ durlabhamanyajanaiḥ samayajñam || 9||

वसुरसपौषे कृष्णदशम्यामभिनवगुप्तः स्तवमिममकरोत् ।येन विभुर्भवमरुसन्तापं शमयति (स्व)जनस्य झटिति दयालुः ॥ १०॥

vasurasapauṣe kṛṣṇadaśamyāmabhinavaguptaḥ stavamimamakarot |yena vibhurbhavamarusantāpaṃ śamayati (sva)janasya jhaṭiti dayāluḥ || 10||

(पौषरसाष्टगकृष्णदशम्यामभिनवगुप्तः स्तवमिमकरोत् ।येन विभुर्भवमरुसन्तापं नाशयति स्वजनस्य झटिति दयालुः ॥ १०॥)

(pauṣarasāṣṭagakṛṣṇadaśamyāmabhinavaguptaḥ stavamimakarot |yena vibhurbhavamarusantāpaṃ nāśayati svajanasya jhaṭiti dayāluḥ || 10||)

॥ इति श्रीअभिनवगुप्तपादाचार्यकृतः भैरवस्तवः सम्पूर्णः ॥(॥ समाप्तं स्तवमिदमभिनवाख्यं पद्यनवकम् ॥)

|| iti śrīabhinavaguptapādācāryakṛtaḥ bhairavastavaḥ sampūrṇaḥ ||(|| samāptaṃ stavamidamabhinavākhyaṃ padyanavakam ||)