वेदव्यासाष्टकम् (स्वामिब्रह्मानन्दविरचितम्) Shri Veda Vyasashtakam

(दृतविलम्बितं छन्दः)कलिमलास्तविवेकदिवाकरं समवलोक्य तमोवलितं जनम् ।करुणया भुवि दर्शितविग्रहं मुनिवरं तमहं सततं भजे ॥ १॥ (मुनिवरं तमहं सततं भजे

(dṛtavilambitaṃ chandaḥ)kalimalāstavivekadivākaraṃ samavalokya tamovalitaṃ janam |karuṇayā bhuvi darśitavigrahaṃ munivaraṃ tamahaṃ satataṃ bhaje || 1|| (munivaraṃ tamahaṃ satataṃ bhaje

भरतवंशसमुद्धरणेच्छया स्वजननीवचसा परिनोदितः ।अजनयत्तनयत्रितयं प्रभुः शुकनुतं तमहं सततं भजे ॥ २॥

bharatavaṃśasamuddharaṇecchayā svajananīvacasā parinoditaḥ |ajanayattanayatritayaṃ prabhuḥ śukanutaṃ tamahaṃ satataṃ bhaje || 2||

मतिबलादि निरीक्ष्य कलौ नृणां लघुतरं कृपया निगमाम्बुधेः ।समकरोदिह भागमनेकधा श्रुतिपतिं तमहं सततं भजे ॥ ३॥

matibalādi nirīkṣya kalau nṛṇāṃ laghutaraṃ kṛpayā nigamāmbudheḥ |samakarodiha bhāgamanekadhā śrutipatiṃ tamahaṃ satataṃ bhaje || 3||

सकलधर्मनिरूपणसागरं विविधचित्रकथासमलङ्कृतम् ।व्यरचयच्च पुराणकदम्बकं कविवरं तमहं सततं भजे ॥ ४॥

sakaladharmanirūpaṇasāgaraṃ vividhacitrakathāsamalaṅkṛtam |vyaracayacca purāṇakadambakaṃ kavivaraṃ tamahaṃ satataṃ bhaje || 4||

श्रुतिविरोधसमन्वयदर्पणं निखिलवादिमतान्ध्यविदारणम् ।ग्रथितवानपि सूत्रसमूहकं मुनिसुतं तमहं सततं भजे ॥ ५॥

śrutivirodhasamanvayadarpaṇaṃ nikhilavādimatāndhyavidāraṇam |grathitavānapi sūtrasamūhakaṃ munisutaṃ tamahaṃ satataṃ bhaje || 5||

यदनुभाववशेन दिवं गतः समधिगम्य महास्त्रसमुच्चयम् ।कुरूचमूमजयद्विजयो(१) द्रुतं द्युतिधरं तमहं सततं भजे ॥ ६॥

yadanubhāvavaśena divaṃ gataḥ samadhigamya mahāstrasamuccayam |kurūcamūmajayadvijayo(1) drutaṃ dyutidharaṃ tamahaṃ satataṃ bhaje || 6||

समरवृत्तविबोधसमीहया कुरुवरेण(२) मुदा कृतयाचनः ।सपदि सूतमदादमलेक्षणं(३) कलिहरं तमहं सततं भजे ॥ ७॥

samaravṛttavibodhasamīhayā kuruvareṇa(2) mudā kṛtayācanaḥ |sapadi sūtamadādamalekṣaṇaṃ(3) kaliharaṃ tamahaṃ satataṃ bhaje || 7||

वननिवासपरौ कुरुदम्पति सुतशुचा तपसा च विकर्षितौ ।मृततनूजगणं समदर्शयत् शरणदं तमहं सततं भजे ॥ ८॥

vananivāsaparau kurudampati sutaśucā tapasā ca vikarṣitau |mṛtatanūjagaṇaṃ samadarśayat śaraṇadaṃ tamahaṃ satataṃ bhaje || 8||

व्यासाष्टकमिदं पुण्यं ब्रह्मानन्देन कीर्तितम् ।यः पठेन्मनुजो नित्यं स भवेच्छास्त्रपारगः ॥इति श्रीमत्परमहंसस्वामिब्रह्मानन्दविरचितंश्रीवेदव्यासाष्टकं सम्पूर्णम् ।इन् सोमे प्रिन्त्स्।

vyāsāṣṭakamidaṃ puṇyaṃ brahmānandena kīrtitam |yaḥ paṭhenmanujo nityaṃ sa bhavecchāstrapāragaḥ ||iti śrīmatparamahaṃsasvāmibrahmānandaviracitaṃśrīvedavyāsāṣṭakaṃ sampūrṇam |in some prints|