यमस्तुतिः २ Savitrikrita Yama Stuti 2

सावित्र्युवाच ।धर्माधर्मविधानज्ञ सर्वधर्मप्रवर्तक ।त्वमेव जगतो नाथः प्रजासंयमनो यमः ॥ १॥

sāvitryuvāca |dharmādharmavidhānajña sarvadharmapravartaka |tvameva jagato nāthaḥ prajāsaṃyamano yamaḥ || 1||

कर्मणामनुरूपेण यस्माद्यमयसे प्रजाः ।तस्माद्वै प्रोच्यसे देव यम इत्येव नामतः ॥ २॥

karmaṇāmanurūpeṇa yasmādyamayase prajāḥ |tasmādvai procyase deva yama ityeva nāmataḥ || 2||

धर्मेणेमाः प्रजाः सर्वा यस्माद्र ञ्जयसे प्रभो ।तस्मात्ते धर्मराजेति नाम सद्भिर्निगद्यते ॥ ३॥

dharmeṇemāḥ prajāḥ sarvā yasmādra ñjayase prabho |tasmātte dharmarājeti nāma sadbhirnigadyate || 3||

सुकृतं दुष्कृतं चोभे पुरोधाय यदा जनाः ।त्वत्सकाशं मृता यान्ति तस्मात्त्वं मृत्युरुच्यसे ॥ ४॥

sukṛtaṃ duṣkṛtaṃ cobhe purodhāya yadā janāḥ |tvatsakāśaṃ mṛtā yānti tasmāttvaṃ mṛtyurucyase || 4||

कालं कलार्धं कलयन्सर्वेषां त्वं हि तिष्ठसि ।तस्मात्कालेति ते नाम प्रोच्यते तत्त्वदर्शिभिः ॥ ५॥

kālaṃ kalārdhaṃ kalayansarveṣāṃ tvaṃ hi tiṣṭhasi |tasmātkāleti te nāma procyate tattvadarśibhiḥ || 5||

सर्वेषामेव भूतानां यस्मादन्तकरो महान् ।तस्मात्त्वमन्तकः प्रोक्तः सर्वदेवैर्महाद्युते ॥ ६॥

sarveṣāmeva bhūtānāṃ yasmādantakaro mahān |tasmāttvamantakaḥ proktaḥ sarvadevairmahādyute || 6||

विवस्वतस्त्वं तनयः प्रथमः परिकीर्तितः ।तस्माद्वैवस्वतो नाम्ना सर्वलोकेषु कथ्यसे ॥ ७॥

vivasvatastvaṃ tanayaḥ prathamaḥ parikīrtitaḥ |tasmādvaivasvato nāmnā sarvalokeṣu kathyase || 7||

आयुष्ये कर्मणि क्षीणे गृह्णासि प्रसभं जनम् ।तदा त्वं कथ्यसे लोके सर्वप्राणहरेति वै ॥ ८॥

āyuṣye karmaṇi kṣīṇe gṛhṇāsi prasabhaṃ janam |tadā tvaṃ kathyase loke sarvaprāṇahareti vai || 8||

तव प्रसादाद्देवेश त्रयीधर्मो न नश्यति ।तव प्रसादाद्देवेश धर्मे तिष्ठन्ति जन्तवः ।तव प्रसादाद्देवेश सङ्करो न प्रजायते ॥ ९॥

tava prasādāddeveśa trayīdharmo na naśyati |tava prasādāddeveśa dharme tiṣṭhanti jantavaḥ |tava prasādāddeveśa saṅkaro na prajāyate || 9||

सतां सदा गतिर्देव त्वमेव परिकीर्तितः ।जगतोऽस्य जगन्नाथ मर्यादापरिपालकः ॥ १०॥

satāṃ sadā gatirdeva tvameva parikīrtitaḥ |jagato'sya jagannātha maryādāparipālakaḥ || 10||

पाहि मां त्रिदशश्रेष्ठ दुःखितां शरणागताम् ।पितरौ च तथैवास्य राजपुत्रस्य दुःखितौ ॥ ११॥

pāhi māṃ tridaśaśreṣṭha duḥkhitāṃ śaraṇāgatām |pitarau ca tathaivāsya rājaputrasya duḥkhitau || 11||

इति मत्स्यपुराणे त्रयोदशाधिकद्विशततमाध्यायान्तर्गतासावित्रिकृता यमस्तुतिः समाप्ता ।मत्स्यपुराण । अध्याय २१३/१११॥मत्स्यपुराण । अध्याय २१३/१-११॥

iti matsyapurāṇe trayodaśādhikadviśatatamādhyāyāntargatāsāvitrikṛtā yamastutiḥ samāptā |matsyapurāṇa | adhyāya 213/111||matsyapurāṇa | adhyāya 213/1-11||