कृष्णस्तोत्रम् (शम्भुकृतम्, ब्रह्मवैवर्तपुराणान्तर्गतम्) Krishna Stotra by Shambhu (Brahmavaivarta Purana)

महादेव उवाच ।जयस्वरुपं जयदं जयेशं जयकारणम् ।प्रवरं जयदानां च वन्दे तमपराजितम् ॥ १॥

mahādeva uvāca |jayasvarupaṃ jayadaṃ jayeśaṃ jayakāraṇam |pravaraṃ jayadānāṃ ca vande tamaparājitam || 1||

विश्वं विश्वेश्वरेशं च विश्वेशं विश्वकारणम् ।विश्वाधारं च विश्वस्थं विश्वकारणकारणम् ॥ २॥

viśvaṃ viśveśvareśaṃ ca viśveśaṃ viśvakāraṇam |viśvādhāraṃ ca viśvasthaṃ viśvakāraṇakāraṇam || 2||

विश्वरक्षाकारणं च विश्वघ्नं विश्वजं परम् ।फलबीजं फलाधारं फलं च तत्फलप्रदम् ॥ ३॥

viśvarakṣākāraṇaṃ ca viśvaghnaṃ viśvajaṃ param |phalabījaṃ phalādhāraṃ phalaṃ ca tatphalapradam || 3||

तेजःस्वरुपं तेजोदं सर्वतेजस्विनां वरम् ।इत्येवमुक्त्वा तं नत्वा रत्नसिंहासने वरे ।नारायणं च संभाष्य उवास स तदाज्ञया ॥ ४॥

tejaḥsvarupaṃ tejodaṃ sarvatejasvināṃ varam |ityevamuktvā taṃ natvā ratnasiṃhāsane vare |nārāyaṇaṃ ca saṃbhāṣya uvāsa sa tadājñayā || 4||

इति शंभुकृतं स्तोत्रं यो जनः संयतः पठेत् ।सर्वसिद्धिर्भवेत्तस्य विजयं च पदे पदे ॥ ५॥

iti śaṃbhukṛtaṃ stotraṃ yo janaḥ saṃyataḥ paṭhet |sarvasiddhirbhavettasya vijayaṃ ca pade pade || 5||

संततं वर्धते मित्रं धनमैश्वर्यमेव च ।शत्रुसैन्यं क्षयं याति दुःखानि दुरितानि च ॥ ६॥

saṃtataṃ vardhate mitraṃ dhanamaiśvaryameva ca |śatrusainyaṃ kṣayaṃ yāti duḥkhāni duritāni ca || 6||

इति ब्रह्मावैवर्ते शम्भुकृतं श्रीकृष्णस्तोत्रम् ।ब्रह्मवैवर्तपुराण ब्रह्मखण्डम् अध्याय ३ श्लोक २४-२९

iti brahmāvaivarte śambhukṛtaṃ śrīkṛṣṇastotram |brahmavaivartapurāṇa brahmakhaṇḍam adhyāya 3 śloka 24-29