अष्टमहिषीयुक्तकृष्णस्तोत्रम् Ashtamahishiyuta Krishna Stotram

हृद्गुहाश्रितपक्षीन्द्रवल्गुवाक्यैः कृतस्तुते ।तद्गरुत्कन्धरारूढ रुक्मिणीश नमोऽस्तु ते ॥ १॥

hṛdguhāśritapakṣīndravalguvākyaiḥ kṛtastute |tadgarutkandharārūḍha rukmiṇīśa namo'stu te || 1||

अत्युन्नत्याऽखिलैः स्तुत्य श्रुत्यन्तात्यन्तकीर्तित ।सत्ययोजित सत्यात्मन् सत्यभामापते नमः ॥ २॥

atyunnatyā'khilaiḥ stutya śrutyantātyantakīrtita |satyayojita satyātman satyabhāmāpate namaḥ || 2||

जाम्बवत्याः कम्बुकण्ठालम्बिजृम्भिकराम्बुज ।शम्भुत्र्यम्बकसम्भाव्यं साम्बतात नमोऽस्तु ते ॥ ३॥

jāmbavatyāḥ kambukaṇṭhālambijṛmbhikarāmbuja |śambhutryambakasambhāvyaṃ sāmbatāta namo'stu te || 3||

नीलाय विलसद्भूषाजालायोज्ज्वलमालिने ।लोलालकोद्यत्फालाय कालिन्दीपतये नमः ॥ ४॥

nīlāya vilasadbhūṣājālāyojjvalamāline |lolālakodyatphālāya kālindīpataye namaḥ || 4||

जैत्रचित्रचरित्राय शात्रवानीकमृत्यवे ।मित्रप्रकाशाय नमो मित्रविन्दाप्रियाय ते ॥ ५॥

jaitracitracaritrāya śātravānīkamṛtyave |mitraprakāśāya namo mitravindāpriyāya te || 5||

बालानेत्रोत्सवानन्तलीलालावण्यमूर्तये ।नीलाकान्ताय ते भक्तावालायाऽस्तु नमोनमः ॥ ६॥

bālānetrotsavānantalīlālāvaṇyamūrtaye |nīlākāntāya te bhaktāvālāyā'stu namonamaḥ || 6||

भद्राय स्वजनाविद्यानिद्राविद्रावणाय वै ।रुद्राणीभद्रमूलाय भद्राकान्ताय ते नमः ॥ ७॥

bhadrāya svajanāvidyānidrāvidrāvaṇāya vai |rudrāṇībhadramūlāya bhadrākāntāya te namaḥ || 7||

रक्षिताखिलविश्वाय शिक्षिताखिलरक्षसे ।लक्षणापतये नित्यं भिक्षुश्लाघ्याय ते नमः ॥ ८॥

rakṣitākhilaviśvāya śikṣitākhilarakṣase |lakṣaṇāpataye nityaṃ bhikṣuślāghyāya te namaḥ || 8||

षोडशस्त्रीसहस्रेशं षोडशातीतमच्युतम् ।ईडेत वादिराजोक्तप्रौढस्तोत्रेण सन्ततम् ॥ ९॥

ṣoḍaśastrīsahasreśaṃ ṣoḍaśātītamacyutam |īḍeta vādirājoktaprauḍhastotreṇa santatam || 9||

इति श्रीमद्वादिराजयतिकृतं अष्टमहिषीयुतकृष्णस्तोत्रं सम्पूर्णम् ।भारतीरमणमुख्यप्राणान्तर्गत श्रीकृष्णार्पणमस्तु ।

iti śrīmadvādirājayatikṛtaṃ aṣṭamahiṣīyutakṛṣṇastotraṃ sampūrṇam |bhāratīramaṇamukhyaprāṇāntargata śrīkṛṣṇārpaṇamastu |