जयेन्द्रगुरुपादुकापञ्चकम् Shri Jayendra Gurupaduka Panchakam

संसारसागरे घोरे तापत्रयनिवारणीम् ।प्रणौमि परया भक्त्या जयेन्द्रगुरुपादुकाम् ॥ १॥

saṃsārasāgare ghore tāpatrayanivāraṇīm |praṇaumi parayā bhaktyā jayendragurupādukām || 1||

समस्तदुःखशमनीं सर्वाभीष्टप्रदायिनीम् ।नमामि शिरसा नित्यं जयेन्द्रगुरुपादुकाम् ॥ २॥

samastaduḥkhaśamanīṃ sarvābhīṣṭapradāyinīm |namāmi śirasā nityaṃ jayendragurupādukām || 2||

अनन्तपुण्यफलदां आयुरारोग्यवर्धनीम् ।अज्ञाननाशिनीं वन्दे जयेन्द्रगुरुपादुकाम् ॥ ३॥

anantapuṇyaphaladāṃ āyurārogyavardhanīm |ajñānanāśinīṃ vande jayendragurupādukām || 3||

कल्याणगुणसम्पन्नां कलिदोषविमोचनीम् ।सर्वसिद्धिप्रदां वन्दे जयेन्द्रगुरुपादुकाम् ॥ ४॥

kalyāṇaguṇasampannāṃ kalidoṣavimocanīm |sarvasiddhipradāṃ vande jayendragurupādukām || 4||

रणे जले महारण्ये वह्निमध्ये च पर्वते ।आपत्काले च मां पातु जयेन्द्रगुरुपादुका ॥ ५॥

raṇe jale mahāraṇye vahnimadhye ca parvate |āpatkāle ca māṃ pātu jayendragurupādukā || 5||

इति जयेन्द्रगुरुपादुकापञ्चकं सम्पूर्णम् ।

iti jayendragurupādukāpañcakaṃ sampūrṇam |