शिवराज्ञिश्रीहृदयस्तोत्रम् Purushottamaproktam Shivarajnishri Hridaya Stotram

श्रीनारायणीश्रीरुवाच ।ललिताख्यमहालक्ष्म्या नामान्यसङ्ख्यकानि वै ।तथाप्यष्टोत्तरशतं सपादं श्रावय प्रभो ॥ १॥

śrīnārāyaṇīśrīruvāca |lalitākhyamahālakṣmyā nāmānyasaṅkhyakāni vai |tathāpyaṣṭottaraśataṃ sapādaṃ śrāvaya prabho || 1||

श्रीपुरुषोत्तम उवाच ।मुख्यनाम्नां प्रपाठेन फलं सर्वाभिधानजम् ।भवेदेवेति मुख्यानि तत्र वक्ष्यामि संशृणु ॥ २॥

śrīpuruṣottama uvāca |mukhyanāmnāṃ prapāṭhena phalaṃ sarvābhidhānajam |bhavedeveti mukhyāni tatra vakṣyāmi saṃśṛṇu || 2||

ललिता श्रीर्महालक्ष्मीर्लक्ष्मीः रमा च पद्मिनी ।कमला सम्पदीशा च पद्मालयेन्दिरेश्वरी ॥ ३॥

lalitā śrīrmahālakṣmīrlakṣmīḥ ramā ca padminī |kamalā sampadīśā ca padmālayendireśvarī || 3||

परमेशी सती ब्राह्मी नारायणी च वैष्णवी ।परेश्वरी महेशानी शक्तीशा पुरुषोत्तमी ॥ ४॥

parameśī satī brāhmī nārāyaṇī ca vaiṣṇavī |pareśvarī maheśānī śaktīśā puruṣottamī || 4||

विभ्वी माया महामाया मूलप्रकृतिरच्युती ।वासुदेवी हिरण्या च हरिणी च हिरण्मयी ॥ ५॥

vibhvī māyā mahāmāyā mūlaprakṛtiracyutī |vāsudevī hiraṇyā ca hariṇī ca hiraṇmayī || 5||

कार्ष्णी कामेश्वरी कामाक्षी चापि भगमालिनी ।वह्निवासा सुन्दरी च संविच्च विजया जया ॥ ६॥

kārṣṇī kāmeśvarī kāmākṣī cāpi bhagamālinī |vahnivāsā sundarī ca saṃvicca vijayā jayā || 6||

मङ्गला मोहिनी तापी वाराही सिद्धिरीशिता ।भुक्तिः कौमारिकी बुद्धिश्चामृता दुःखहा प्रसूः ॥ ७॥

maṅgalā mohinī tāpī vārāhī siddhirīśitā |bhuktiḥ kaumārikī buddhiścāmṛtā duḥkhahā prasūḥ || 7||

सुभाग्याऽऽनन्दिनी सम्पद्विमला बिन्द्विकाऽभिधा ।माता मूर्तिर्योगिनी च चक्रिकाऽर्चा रतिर्धृतिः ॥ ८॥

subhāgyā''nandinī sampadvimalā bindvikā'bhidhā |mātā mūrtiryoginī ca cakrikā'rcā ratirdhṛtiḥ || 8||

श्यामा मनोरमा प्रीतिः ऋद्धिः छाया च पूर्णिमा ।तुष्टिः प्रज्ञा पद्मावती दुर्गा लीला च माणिकी ॥ ९॥

śyāmā manoramā prītiḥ ṛddhiḥ chāyā ca pūrṇimā |tuṣṭiḥ prajñā padmāvatī durgā līlā ca māṇikī || 9||

उद्यमा भारती विश्वा विभूतिर्विनता शुभा ।कीर्तिः क्रिया च कल्याणी विद्या कला च कुङ्कुमा ॥ १०॥

udyamā bhāratī viśvā vibhūtirvinatā śubhā |kīrtiḥ kriyā ca kalyāṇī vidyā kalā ca kuṅkumā || 10||

पुण्या पुराणा वागीशी वरदा विभवाऽऽत्मिनी ।सरस्वती शिवा नादा प्रतिष्ठा संस्कृता त्रयी ॥ ११॥

puṇyā purāṇā vāgīśī varadā vibhavā''tminī |sarasvatī śivā nādā pratiṣṭhā saṃskṛtā trayī || 11||

आयुर्जीवा स्वर्णरेखा दक्षा वीरा च रागिणी ।चपला पण्डिता काली भद्राऽम्बिका च मानिनी ॥ १२॥

āyurjīvā svarṇarekhā dakṣā vīrā ca rāgiṇī |capalā paṇḍitā kālī bhadrā'mbikā ca māninī || 12||

विशालाक्षी वल्लभा च गोपी नारी नरायणी ।सन्तुष्टा च सुषुम्णा च क्षमा धात्री च वारुणी ॥ १३॥

viśālākṣī vallabhā ca gopī nārī narāyaṇī |santuṣṭā ca suṣumṇā ca kṣamā dhātrī ca vāruṇī || 13||

गुर्वी साध्वी च गायत्री दक्षिणा चान्नपूर्णिका ।राजलक्ष्मीः सिद्धमाता माधवी भार्गवी परी ॥ १४॥

gurvī sādhvī ca gāyatrī dakṣiṇā cānnapūrṇikā |rājalakṣmīḥ siddhamātā mādhavī bhārgavī parī || 14||

हारिती राशियानी च प्राचीनी गौरिका श्रुतिः ।इत्यष्टोत्तरशतकं सप्तविंशतिरित्यपि ॥ १५॥

hāritī rāśiyānī ca prācīnī gaurikā śrutiḥ |ityaṣṭottaraśatakaṃ saptaviṃśatirityapi || 15||

ललितामुख्यनामानि कथितानि तव प्रिये! ।नित्यं यः पठते तस्य भुक्तिर्मुक्तिः करस्थिता ॥ १६॥

lalitāmukhyanāmāni kathitāni tava priye! |nityaṃ yaḥ paṭhate tasya bhuktirmuktiḥ karasthitā || 16||

स्मृद्धिर्वंशस्य विस्तारः सर्वानन्दा भवन्ति वै ।ॐ श्रीललितामहालक्ष्म्यै नमः श्रींह्रीङ्क्लीं स्वाहा ॥ १७॥

smṛddhirvaṃśasya vistāraḥ sarvānandā bhavanti vai |oṃ śrīlalitāmahālakṣmyai namaḥ śrīṃhrīṅklīṃ svāhā || 17||

इति मन्त्रं जपेल्लक्षवारं सा दृश्यते ध्रुवम् ।अथ लक्ष्मि महामन्त्रं गुरुमन्त्रं वदामि ते ॥ १८॥

iti mantraṃ japellakṣavāraṃ sā dṛśyate dhruvam |atha lakṣmi mahāmantraṃ gurumantraṃ vadāmi te || 18||

ॐ अन्तर्लिङ्गाय गुरवे ललाटस्थायसर्वात्मने नमः स्वाहा ।इतिलक्षं जपेत् सिद्धिर्जायते ब्रह्मसादृशी ॥ १९॥

oṃ antarliṅgāya gurave lalāṭasthāyasarvātmane namaḥ svāhā |itilakṣaṃ japet siddhirjāyate brahmasādṛśī || 19||

गुरुं ध्यायेत् स्नापयेच्च पूजयेद्बहुवस्तुभिः ।भोजयेत्सम्प्रसेवेत तोषयेत्सर्वदानकैः ॥ २०॥

guruṃ dhyāyet snāpayecca pūjayedbahuvastubhiḥ |bhojayetsampraseveta toṣayetsarvadānakaiḥ || 20||

गुरुर्ब्रह्मा गुरुर्विष्णुर्गुरुः श्रीशङ्करः स्वयम् ।गुरुर्नारायणः कृष्णो गुरुर्ब्रह्मपरं प्रभुः ॥ २१॥

gururbrahmā gururviṣṇurguruḥ śrīśaṅkaraḥ svayam |gururnārāyaṇaḥ kṛṣṇo gururbrahmaparaṃ prabhuḥ || 21||

गुरुः पिता पतिः पुत्रो बन्धुर्माता च रक्षकः ।मोक्षदस्तारकश्चापि महाऽऽनन्दप्रदो गुरुः ॥ २२॥

guruḥ pitā patiḥ putro bandhurmātā ca rakṣakaḥ |mokṣadastārakaścāpi mahā''nandaprado guruḥ || 22||

अनादिश्रीकृष्णनारायणः साक्षाद्गुरुर्हरिः ।इत्युक्त्वा प्रणमेतापि नीराजयेद्गुरुं ततः ॥ २३॥

anādiśrīkṛṣṇanārāyaṇaḥ sākṣādgururhariḥ |ityuktvā praṇametāpi nīrājayedguruṃ tataḥ || 23||

पुष्पाञ्जलिं दिशेच्चापि दण्डवद्वै समाचरेत् ।दानं दद्याच्च गुरवे स्वेष्टतमस्य वस्तुनः ॥ २४॥

puṣpāñjaliṃ diśeccāpi daṇḍavadvai samācaret |dānaṃ dadyācca gurave sveṣṭatamasya vastunaḥ || 24||

चेतनो वै भगवान् स गुरुरेव परेश्वरः ।त्रायते चापदां व्रातान्नयत्येवाऽक्षरं पदम् ॥ २५॥

cetano vai bhagavān sa gurureva pareśvaraḥ |trāyate cāpadāṃ vrātānnayatyevā'kṣaraṃ padam || 25||

नित्यं वै प्रथमं प्रातर्गुरोर्दर्शनमुत्तमम् ।गुरोः पादाङ्गुष्ठजलं पिबेत् पावनमुत्तमम् ॥ २६॥

nityaṃ vai prathamaṃ prātargurordarśanamuttamam |guroḥ pādāṅguṣṭhajalaṃ pibet pāvanamuttamam || 26||

अपि हत्यादिपापानां नाशकं चरणामृतम् ।अपि मायादिबन्धानां कर्तनं चरणौ गुरोः ॥ २७॥

api hatyādipāpānāṃ nāśakaṃ caraṇāmṛtam |api māyādibandhānāṃ kartanaṃ caraṇau guroḥ || 27||

यामपाशविमोक्षाय शक्तं वै स्मरणं गुरोः ।अनाथानां सदा नाथो नारायणो गुरुः परः ॥ २८॥

yāmapāśavimokṣāya śaktaṃ vai smaraṇaṃ guroḥ |anāthānāṃ sadā nātho nārāyaṇo guruḥ paraḥ || 28||

गं गाढं च तमो गुप्तं रुणद्धीतिगुरुर्मतः ।गुरोर्मूर्तिं शुभां कृत्वा गृहे कण्ठे प्ररक्षयेत् ॥ २९॥

gaṃ gāḍhaṃ ca tamo guptaṃ ruṇaddhītigururmataḥ |gurormūrtiṃ śubhāṃ kṛtvā gṛhe kaṇṭhe prarakṣayet || 29||

गुर्वद्वैतमुपासीताऽश्नुतेऽमृतमनुत्तमम् ।इत्येतत् कथितं लक्ष्मि सारात् सारतरं परम् ॥ ३०॥

gurvadvaitamupāsītā'śnute'mṛtamanuttamam |ityetat kathitaṃ lakṣmi sārāt sārataraṃ param || 30||

मातृतीर्थात् पितृतीर्थाद्गुरुतीर्थं महत्तमम् ।श्वश्रूतीर्थात्पतितीर्थाद्गुरुतीर्थं महत्तमम् ॥ ३१॥

mātṛtīrthāt pitṛtīrthādgurutīrthaṃ mahattamam |śvaśrūtīrthātpatitīrthādgurutīrthaṃ mahattamam || 31||

सतीतीर्थात् प्रियातीर्थाद्गुरुतीर्थं महत्तमम् ।देवतीर्थाज्जडतीर्थाद्गुरुतीर्थं महत्तमम् ॥ ३२॥

satītīrthāt priyātīrthādgurutīrthaṃ mahattamam |devatīrthājjaḍatīrthādgurutīrthaṃ mahattamam || 32||

अर्चातीर्थान्मखतीर्थाद्गुरुतीर्थं महत्तमम् ।व्रततीर्थात्तपस्तीर्थाद्गुरुतीर्थं महत्तमम् ॥ ३३॥

arcātīrthānmakhatīrthādgurutīrthaṃ mahattamam |vratatīrthāttapastīrthādgurutīrthaṃ mahattamam || 33||

ज्ञानतीर्थाद्योगतीर्थाद्गुरुतीर्थं महत्तमम् ।परोपकारादितीर्थेभ्यो गुरुतीर्थं महत्तमम् ॥ ३४॥

jñānatīrthādyogatīrthādgurutīrthaṃ mahattamam |paropakārāditīrthebhyo gurutīrthaṃ mahattamam || 34||

अनादिश्रीकृष्णनारायणेन परमात्मना ।मया सन्दिश्यते त्वेतद्गुरुतीर्थं प्रमाणवत् ॥ ३५॥

anādiśrīkṛṣṇanārāyaṇena paramātmanā |mayā sandiśyate tvetadgurutīrthaṃ pramāṇavat || 35||

सत्यतीर्थं साधुतीर्थं तीर्थश्चाहं परेश्वरः ।त्रीणि तीर्थानि चैतानि गुरौ तीर्थे विशन्ति हि ॥ ३६॥

satyatīrthaṃ sādhutīrthaṃ tīrthaścāhaṃ pareśvaraḥ |trīṇi tīrthāni caitāni gurau tīrthe viśanti hi || 36||

इत्येतच्छिवराज्ञीश्रि हृदयं कथितं तव ।पठनाच्छ्रवणादस्य चतुःपुमर्थभाग् भवेत् ॥ ३७॥

ityetacchivarājñīśri hṛdayaṃ kathitaṃ tava |paṭhanācchravaṇādasya catuḥpumarthabhāg bhavet || 37||

इति श्रीलक्ष्मीनारायणीयसंहितायां तृतीये द्वापरसन्तानेललितामहालक्ष्म्याःपञ्चत्रिंशदुत्तरशतनामानि गुरुतीर्थमाहात्म्यं चेत्यादिनिरूपणनामैकविंशत्यधिकशततमोऽध्यायः ॥ १२१॥

iti śrīlakṣmīnārāyaṇīyasaṃhitāyāṃ tṛtīye dvāparasantānelalitāmahālakṣmyāḥpañcatriṃśaduttaraśatanāmāni gurutīrthamāhātmyaṃ cetyādinirūpaṇanāmaikaviṃśatyadhikaśatatamo'dhyāyaḥ || 121||

इति श्रीलक्ष्मीनारायणीयसंहितायाः द्वापरयुगसन्तानात्मकस्य तृतीयखण्डे१२१अध्यायान्तर्गतं पुरुषोत्तमप्रोक्तं शिवराज्ञिश्रीहृदयस्तोत्रं सम्पूर्णम् ।लक्ष्मीनारायणीयसंहिता । खण्ड ३। अध्याय १२१/१३७॥लक्ष्मीनारायणीयसंहिता । खण्ड ३। अध्याय १२१/१-३७॥

iti śrīlakṣmīnārāyaṇīyasaṃhitāyāḥ dvāparayugasantānātmakasya tṛtīyakhaṇḍe121adhyāyāntargataṃ puruṣottamaproktaṃ śivarājñiśrīhṛdayastotraṃ sampūrṇam |lakṣmīnārāyaṇīyasaṃhitā | khaṇḍa 3| adhyāya 121/137||lakṣmīnārāyaṇīyasaṃhitā | khaṇḍa 3| adhyāya 121/1-37||