दत्तस्तवस्तोत्रम् Shri Dattastava Stotram

भूतप्रेतपिशाचाद्या यस्य स्मरणमात्रतः ।दूरादेव पलायन्ते दत्तात्रेयं नमामि तम् ॥ १॥

bhūtapretapiśācādyā yasya smaraṇamātrataḥ |dūrādeva palāyante dattātreyaṃ namāmi tam || 1||

यन्नामस्मरणाद्दैन्यं पापं तापश्च नश्यति ।भीतिग्रहार्तिदुःस्वप्नं दत्तात्रेयं नमामि तम् ॥ २॥

yannāmasmaraṇāddainyaṃ pāpaṃ tāpaśca naśyati |bhītigrahārtiduḥsvapnaṃ dattātreyaṃ namāmi tam || 2||

दद्गुस्फोटककुष्ठादि महामारी विषूचिका ।नश्यन्त्यन्येऽपि रोगाश्च दत्तात्रेयं नमामि तम् ॥ ३॥

dadgusphoṭakakuṣṭhādi mahāmārī viṣūcikā |naśyantyanye'pi rogāśca dattātreyaṃ namāmi tam || 3||

सङ्गजा देशकालोत्था अपि साङ्क्रमिका गदाः ।शाम्यन्ति यत्स्मरणतो दत्तात्रेयं नमामि तम् ॥ ४॥

saṅgajā deśakālotthā api sāṅkramikā gadāḥ |śāmyanti yatsmaraṇato dattātreyaṃ namāmi tam || 4||

सर्पवृश्चिकदष्टानां विषार्तानां शरीरिणाम् ।यन्नाम शान्तिदं शीघ्रं दत्तात्रेयं नमामि तम् ॥ ५॥

sarpavṛścikadaṣṭānāṃ viṣārtānāṃ śarīriṇām |yannāma śāntidaṃ śīghraṃ dattātreyaṃ namāmi tam || 5||

त्रिविधोत्पातशमनं विविधारिष्टनाशनम् ।यन्नाम क्रूरभीतिघ्नं दत्तात्रेयं नमामि तम् ॥ ६॥

trividhotpātaśamanaṃ vividhāriṣṭanāśanam |yannāma krūrabhītighnaṃ dattātreyaṃ namāmi tam || 6||

वैर्यादिकृतमन्त्रादिप्रयोगा यस्य कीर्तनात् ।नश्यन्ति देवबाधाश्च दत्तात्रेयं नमामि तम् ॥ ७॥

vairyādikṛtamantrādiprayogā yasya kīrtanāt |naśyanti devabādhāśca dattātreyaṃ namāmi tam || 7||

यच्छिष्यस्मरणात्सद्यो गतनष्टादि लभ्यते ।य ईशः सर्वतस्त्राता दत्तात्रेयं नमामि तम् ॥ ८॥

yacchiṣyasmaraṇātsadyo gatanaṣṭādi labhyate |ya īśaḥ sarvatastrātā dattātreyaṃ namāmi tam || 8||

जयलाभयशःकामदातुर्दत्तस्य यः स्तवम् ।भोगमोक्षप्रदस्येमं पठेद्दत्तप्रियो भवेत् ॥ ९॥

jayalābhayaśaḥkāmadāturdattasya yaḥ stavam |bhogamokṣapradasyemaṃ paṭheddattapriyo bhavet || 9||

इति श्रीवासुदेवानन्दसरस्वतीविरचितं दत्तस्तवस्तोत्रं सम्पूर्णम् ।

iti śrīvāsudevānandasarasvatīviracitaṃ dattastavastotraṃ sampūrṇam |