लक्ष्मीनृसिंहमङ्गलम् Shri Lakshminrisimha Mangalam

अपारकरुणासिन्धो निवारणपरानिमान् ।विदारय हिरण्याक्षविदारण नखाय धैः ॥ १॥

apārakaruṇāsindho nivāraṇaparānimān |vidāraya hiraṇyākṣavidāraṇa nakhāya dhaiḥ || 1||

सर्ववेदान्तवेद्याय कारणाय महात्मने ।सर्वलोकशरण्याय श्रीनृसिंहाय मङ्गलम् ॥ २॥

sarvavedāntavedyāya kāraṇāya mahātmane |sarvalokaśaraṇyāya śrīnṛsiṃhāya maṅgalam || 2||

शेषिणे सर्ववस्तूनां वाञ्छितार्थप्रदायिने ।संश्रितानां सदा भूयात् श्रीनृसिंहाय मङ्गलम् ॥ ३॥

śeṣiṇe sarvavastūnāṃ vāñchitārthapradāyine |saṃśritānāṃ sadā bhūyāt śrīnṛsiṃhāya maṅgalam || 3||

पवित्राणां पवित्राय प्रापकाय फलात्मने ।भद्राणामपि भद्राय श्रीनृसिंहाय मङ्गलम् ॥ ४॥

pavitrāṇāṃ pavitrāya prāpakāya phalātmane |bhadrāṇāmapi bhadrāya śrīnṛsiṃhāya maṅgalam || 4||

आदिवण् शठकोपाख्यैर्मुनिवर्यैर्महात्मभिः ।समर्चिताय नित्याय श्रीनृसिंहाय मङ्गलम् ॥ ५॥

ādivaṇ śaṭhakopākhyairmunivaryairmahātmabhiḥ |samarcitāya nityāya śrīnṛsiṃhāya maṅgalam || 5||

जगज्जन्मादिलक्ष्याय स्वेच्छास्वीकृतमूर्तये ।विध्वस्ताखिलहेयाय श्रीनृसिंहाय मङ्गलम् ॥ ६॥

jagajjanmādilakṣyāya svecchāsvīkṛtamūrtaye |vidhvastākhilaheyāya śrīnṛsiṃhāya maṅgalam || 6||

ज्ञानानन्दस्वरूपाय ज्ञानशक्त्यादिसिन्धवे ।बन्धवे सर्वलोकानां श्रीनृसिंहाय मङ्गलम् ॥ ७॥

jñānānandasvarūpāya jñānaśaktyādisindhave |bandhave sarvalokānāṃ śrīnṛsiṃhāya maṅgalam || 7||

कायाधवरित्राणभावितस्थम्भजन्मने ।ब्रह्मेन्द्रादिस्तुताय स्यात् श्रीनृसिंहाय मङ्गलम् ॥ ८॥

kāyādhavaritrāṇabhāvitasthambhajanmane |brahmendrādistutāya syāt śrīnṛsiṃhāya maṅgalam || 8||

गुणलेशविहीनस्य सर्वहेयास्पदस्य मे ।मन्तून् क्षन्त्रेऽप्यनन्तान् स्यात् श्रीनृसिंहाय मङ्गलम् ॥९॥

guṇaleśavihīnasya sarvaheyāspadasya me |mantūn kṣantre'pyanantān syāt śrīnṛsiṃhāya maṅgalam ||9||

श्रीनिवासयतीन्द्रोक्तं लक्ष्मीनृहरिमङ्गलम् ।ये पठन्ति महात्मानस्तेषां भूयात्तु मङ्गलम् ॥ १०॥

śrīnivāsayatīndroktaṃ lakṣmīnṛharimaṅgalam |ye paṭhanti mahātmānasteṣāṃ bhūyāttu maṅgalam || 10||

इति श्रीलक्ष्मीनृसिंहमङ्गलं सम्पूर्णम् ।

iti śrīlakṣmīnṛsiṃhamaṅgalaṃ sampūrṇam |