वामनस्तोत्रम् (ब्रह्मकृतम् विष्णुधर्मोपपुराणान्तर्गतम् जयाद्येश जयाजेय जय सर्वात्मकात्मक) Brahmakritam Vamana Stotram

तं जातमात्रं भगवान्ब्रह्मा लोकपितामहः ।जातकर्मादिकाः कृत्वा क्रियास्तुष्टाव पार्थिव ॥ ६७॥

taṃ jātamātraṃ bhagavānbrahmā lokapitāmahaḥ |jātakarmādikāḥ kṛtvā kriyāstuṣṭāva pārthiva || 67||

ब्रह्मोवाचजयाद्येश जयाजेय जय सर्वात्मकात्मक ।जय जन्मजरापेत जयानन्त जयाच्युत ॥ ६८॥

brahmovācajayādyeśa jayājeya jaya sarvātmakātmaka |jaya janmajarāpeta jayānanta jayācyuta || 68||

जयाजित जयाशेष जयाव्यक्तस्थिते जय ।परमार्थार्थ सर्वज्ञ ज्ञानज्ञेयात्मनिःसृत ॥ ६९॥

jayājita jayāśeṣa jayāvyaktasthite jaya |paramārthārtha sarvajña jñānajñeyātmaniḥsṛta || 69||

जयाशेषजगत्साक्षिञ्जय कर्तर्जगद्गुरो ।जगतो जगदन्तेऽन्तःस्थितौ पालयिता जय ॥ ७०॥

jayāśeṣajagatsākṣiñjaya kartarjagadguro |jagato jagadante'ntaḥsthitau pālayitā jaya || 70||

जयाखिल जयाशेष जयाखिलहृदि स्थित ।जयादिमध्यान्तमय सर्वज्ञानमयोत्तम ॥ ७१॥

jayākhila jayāśeṣa jayākhilahṛdi sthita |jayādimadhyāntamaya sarvajñānamayottama || 71||

मुमुक्षुभिरनिर्देश्य स्वयन्दृष्ट जयेश्वर ।योगिभिर्मुक्तिफलद दमादिगुणभूषणैः ॥ ७२॥

mumukṣubhiranirdeśya svayandṛṣṭa jayeśvara |yogibhirmuktiphalada damādiguṇabhūṣaṇaiḥ || 72||

जयातिसूक्ष्म दुर्ज्ञेय जगत्स्थूल जगन्मय ।जय स्थूलातिसूक्ष्म त्वं जयातीन्द्रिय सेन्द्रिय ॥ ७३॥

jayātisūkṣma durjñeya jagatsthūla jaganmaya |jaya sthūlātisūkṣma tvaṃ jayātīndriya sendriya || 73||

जय स्वमाया योगस्थ शेषभोगशयाक्षर ।जयैकदंष्ट्राप्रान्तान्त समुद्धृतवसुन्धर ॥ ७४॥

jaya svamāyā yogastha śeṣabhogaśayākṣara |jayaikadaṃṣṭrāprāntānta samuddhṛtavasundhara || 74||

नृकेसरिञ्जयारातिवक्षःस्थलविदारण ।साम्प्रतं जय विश्वात्मन्मायावामन केशव ॥ ७५॥

nṛkesariñjayārātivakṣaḥsthalavidāraṇa |sāmprataṃ jaya viśvātmanmāyāvāmana keśava || 75||

निजमायापटच्छन्न जगद्धातर्जनार्दन ।जयाचिन्त्य जयानेकस्वरूपैकविध प्रभो ॥ ७६॥

nijamāyāpaṭacchanna jagaddhātarjanārdana |jayācintya jayānekasvarūpaikavidha prabho || 76||

वर्धस्व वर्धितानेकविकारप्रकृते हरे ।त्वय्येषा जगतामीश संस्थिता धर्मपद्धतिः ॥ ७७॥

vardhasva vardhitānekavikāraprakṛte hare |tvayyeṣā jagatāmīśa saṃsthitā dharmapaddhatiḥ || 77||

न त्वामहं न चेशानो नेन्द्राद्यास्त्रिदशा हरे ।ज्ञातुमीशा न मुनयः सनकाद्या न योगिनः ॥ ७८॥

na tvāmahaṃ na ceśāno nendrādyāstridaśā hare |jñātumīśā na munayaḥ sanakādyā na yoginaḥ || 78||

त्वन्मायापटसंवीते जगत्यत्र जगत्पते ।कस्त्वां वेत्स्यति सर्वेशं त्वत्प्रसादं विना नरः ॥ ७९॥

tvanmāyāpaṭasaṃvīte jagatyatra jagatpate |kastvāṃ vetsyati sarveśaṃ tvatprasādaṃ vinā naraḥ || 79||

त्वमेवाराधितो यस्य प्रसादसुमुखः प्रभो ।स एव केवलं देव वेत्ति त्वां नेतरो जनः ॥ ८०॥

tvamevārādhito yasya prasādasumukhaḥ prabho |sa eva kevalaṃ deva vetti tvāṃ netaro janaḥ || 80||

तदीश्वरेश्वरेशान विभो वर्धस्व भावन ।प्रभावायास्य विश्वस्य विश्वात्मन्पृथुलोचन ॥ ८१॥

tadīśvareśvareśāna vibho vardhasva bhāvana |prabhāvāyāsya viśvasya viśvātmanpṛthulocana || 81||

इति विष्णुधर्मेषु षट्सप्ततितमोऽध्यायान्तर्गतंब्रह्मकृतं वामनस्तोत्रं सम्पूर्णम् ।

iti viṣṇudharmeṣu ṣaṭsaptatitamo'dhyāyāntargataṃbrahmakṛtaṃ vāmanastotraṃ sampūrṇam |