भुवनेश्वरीस्तोत्रम् ३ Shri Bhuvaneshvari Stotram 3

रहस्यं पार्वतीनाथवक्त्रात् श्रुत्वा च पार्वती ।महादेवं महेशानमीशमाह महेश्वरी ॥ १॥

rahasyaṃ pārvatīnāthavaktrāt śrutvā ca pārvatī |mahādevaṃ maheśānamīśamāha maheśvarī || 1||

पार्वत्युवाचत्रिलोकेश! जगन्नाथ ! देवदेव! सदाशिव ! ।त्वत् प्रसादान्महादेव ! श्रुतं तन्त्रं पृथग्विधम् ॥ २॥

pārvatyuvācatrilokeśa! jagannātha ! devadeva! sadāśiva ! |tvat prasādānmahādeva ! śrutaṃ tantraṃ pṛthagvidham || 2||

इदानीं वर्तते श्रद्धागमशास्त्रे ममैव हि ।यदि प्रसन्नो भगवन् ! ब्रूह्युपायं महोदयम् ॥ ३॥

idānīṃ vartate śraddhāgamaśāstre mamaiva hi |yadi prasanno bhagavan ! brūhyupāyaṃ mahodayam || 3||

नानातन्त्रे महादेव ! श्रुतं नानाविधं मतम् ।कृतार्थास्मि कृतार्थास्मि कृतकार्यास्मि शङ्कर ! ॥ ४॥

nānātantre mahādeva ! śrutaṃ nānāvidhaṃ matam |kṛtārthāsmi kṛtārthāsmi kṛtakāryāsmi śaṅkara ! || 4||

प्रसन्ने शङ्करे नाथ! किं भयं जगतीतले ।विना शिवप्रसादेन न सिध्यति कदाचन ।इदानीं श्रोतुमिच्छामि भुवनाया रहस्यकम् ॥ ५॥

prasanne śaṅkare nātha! kiṃ bhayaṃ jagatītale |vinā śivaprasādena na sidhyati kadācana |idānīṃ śrotumicchāmi bhuvanāyā rahasyakam || 5||

श्री शङ्कर उवाचशृणु देवि ! प्रवक्ष्यामि गुह्याद्गुह्यतरं परम् ।पठित्वा परमेशानि मन्त्रसिद्धिमवाप्नुयात् ॥ ६॥

śrī śaṅkara uvācaśṛṇu devi ! pravakṣyāmi guhyādguhyataraṃ param |paṭhitvā parameśāni mantrasiddhimavāpnuyāt || 6||

ॐ आद्या श्रीभुवना भव्या भवबन्धविमोचनी ।नारायणी जगद्धात्री शिवा विश्वेश्वरी परा ॥ ७॥

oṃ ādyā śrībhuvanā bhavyā bhavabandhavimocanī |nārāyaṇī jagaddhātrī śivā viśveśvarī parā || 7||

गान्धारी परमा विद्या जगन्मोहनकारिणी ।सुरेश्वरी जगन्माता विश्वमोहनकारिणी ॥ ८॥

gāndhārī paramā vidyā jaganmohanakāriṇī |sureśvarī jaganmātā viśvamohanakāriṇī || 8||

भुवनेशी महामाया देवेशी हरवल्लभा ।कराला विकटाकारा महाबीजस्वरूपिणी ॥ ९॥

bhuvaneśī mahāmāyā deveśī haravallabhā |karālā vikaṭākārā mahābījasvarūpiṇī || 9||

त्रिपुरेशी त्रिलोकेशी दुर्गा त्रिभुवनेश्वरी ।माहेश्वरी शिवाराध्या शिवपूज्या सुरेश्वरी ॥ १०॥

tripureśī trilokeśī durgā tribhuvaneśvarī |māheśvarī śivārādhyā śivapūjyā sureśvarī || 10||

नित्या च निर्मला देवी सर्वमङ्गलकारिणी ।सदाशिवप्रिया गौरी सर्वमङ्गल शोभिनी ॥ ११॥

nityā ca nirmalā devī sarvamaṅgalakāriṇī |sadāśivapriyā gaurī sarvamaṅgala śobhinī || 11||

शिवदा सर्वसौभाग्यदायिनी मङ्गलात्मिका ।घोरदंष्ट्राकरालास्या मधुमांसबलिप्रिया ॥ १२॥

śivadā sarvasaubhāgyadāyinī maṅgalātmikā |ghoradaṃṣṭrākarālāsyā madhumāṃsabalipriyā || 12||

सर्वदुःखहरा चण्डी सर्वमङ्गलकारिणी ।पार्वती तारिणी देवी भीमा भयविनाशिनी ॥ १३॥

sarvaduḥkhaharā caṇḍī sarvamaṅgalakāriṇī |pārvatī tāriṇī devī bhīmā bhayavināśinī || 13||

त्रैलोक्यजननी तारा तारिणी तरुणा क्षमा ।भक्तिमुक्तिप्रदा भुक्तिप्रदा शङ्करवल्लभा ॥ १४॥

trailokyajananī tārā tāriṇī taruṇā kṣamā |bhaktimuktipradā bhuktipradā śaṅkaravallabhā || 14||

उमा गौरी प्रिया साध्वीप्रिया च वारुणप्रिया ।भैरवी भैरवानन्ददायिनी भैरवात्मिका ॥ १५॥

umā gaurī priyā sādhvīpriyā ca vāruṇapriyā |bhairavī bhairavānandadāyinī bhairavātmikā || 15||

ब्रह्मपूज्या च ब्रह्माणी रुद्राणी रुद्रपूजिता ।रुद्रेश्वरी रुद्ररूपा त्रिपुटा त्रिपुरा मता ॥ १६॥

brahmapūjyā ca brahmāṇī rudrāṇī rudrapūjitā |rudreśvarī rudrarūpā tripuṭā tripurā matā || 16||

वसुदा नाथरूपा च विश्वनाथप्रपूजिता ।आनन्दरूपिणी श्यामा रघुनाथवरप्रदा ॥ १७॥

vasudā nātharūpā ca viśvanāthaprapūjitā |ānandarūpiṇī śyāmā raghunāthavarapradā || 17||

आनन्दार्णवमग्ना सा राजराजेश्वरी मता ।भवानी च भवानन्ददायिनी भवगोहिनी ॥ १८॥

ānandārṇavamagnā sā rājarājeśvarī matā |bhavānī ca bhavānandadāyinī bhavagohinī || 18||

सुरराजेश्वरी चण्डी प्रचण्डा घोरनादिनी ।घनश्यामा घनवती महाघननिनादिनी ॥ १९॥

surarājeśvarī caṇḍī pracaṇḍā ghoranādinī |ghanaśyāmā ghanavatī mahāghananinādinī || 19||

घोरजिह्वा ललजिह्वा देवेशी नगनन्दिनी ।त्रैलोक्यमोहिनी विश्वमोहिनी विश्वरूपिणी ॥ २०॥

ghorajihvā lalajihvā deveśī naganandinī |trailokyamohinī viśvamohinī viśvarūpiṇī || 20||

षोडशी त्रिपुरा ब्रह्मदायिनी ब्रह्मदाऽनघा ।इत्येतत् परमं ब्रह्मस्तोत्रं परमकारणम् ॥ २१॥

ṣoḍaśī tripurā brahmadāyinī brahmadā'naghā |ityetat paramaṃ brahmastotraṃ paramakāraṇam || 21||

यः पठेत् परया भक्त्या जीवन्मुक्तः स एव हि ।ब्रह्माद्या देवताः सर्वा मुनयस्तन्त्रकोविदाः ।पठित्वा परया भक्त्या ब्रह्मसिद्धिमवाप्नुयात् ॥ २२॥

yaḥ paṭhet parayā bhaktyā jīvanmuktaḥ sa eva hi |brahmādyā devatāḥ sarvā munayastantrakovidāḥ |paṭhitvā parayā bhaktyā brahmasiddhimavāpnuyāt || 22||

इति मुण्डमालातन्त्रे पार्वतीश्वरसंवादे नवमपटालान्तर्गतंभुवनेश्वरीस्तोत्रं सम्पूर्णम् ।एवं चचतुर्दशपटलान्तर्गतं भुवनाशतनामस्तोत्रं सम्पूर्णम् ॥ १४॥

iti muṇḍamālātantre pārvatīśvarasaṃvāde navamapaṭālāntargataṃbhuvaneśvarīstotraṃ sampūrṇam |evaṃ cacaturdaśapaṭalāntargataṃ bhuvanāśatanāmastotraṃ sampūrṇam || 14||