वीरभद्रप्रति शिवाज्ञाकथनम् Virabhadraprati Shivajnakathanam

(शिवरहस्यान्तर्गते ईशाख्ये)भैरव (वीरभद्र) उवाच ।देव देव महादेव कल्याणवरुणालय ।मरुत्पारणहाराढयकन्धरानन्तविक्रम ॥ १२॥

(śivarahasyāntargate īśākhye)bhairava (vīrabhadra) uvāca |deva deva mahādeva kalyāṇavaruṇālaya |marutpāraṇahārāḍhayakandharānantavikrama || 12||

मामाज्ञापय देवेश किमत्र करवाणि ते ।किं पिबाम्यम्बुधीन् सप्त तरङ्गावलिघूर्णितान् ॥ १३॥

māmājñāpaya deveśa kimatra karavāṇi te |kiṃ pibāmyambudhīn sapta taraṅgāvalighūrṇitān || 13||

चूर्णितं किं गिरिव्रातं करोमि पदघाततः ।किं ब्रह्माण्डं महापिण्डं करोम्यद्य चराचरैः ॥ १४॥

cūrṇitaṃ kiṃ girivrātaṃ karomi padaghātataḥ |kiṃ brahmāṇḍaṃ mahāpiṇḍaṃ karomyadya carācaraiḥ || 14||

भूचक्रमखिलं चात्र चित्रनेत्राग्निना दहन् ।किं वा सुरासुरव्रातं पातयामि मृतं पुरः ॥ १५॥

bhūcakramakhilaṃ cātra citranetrāgninā dahan |kiṃ vā surāsuravrātaṃ pātayāmi mṛtaṃ puraḥ || 15||

शीघ्रमाज्ञापयेदानीं मा विलम्बितुमर्हसि ।तद्भैरवोरुरभसा वचसा परमेश्वरः ॥ १६॥

śīghramājñāpayedānīṃ mā vilambitumarhasi |tadbhairavorurabhasā vacasā parameśvaraḥ || 16||

विप्रयोगेण वै देव्या दुःसहेनैव सुव्रताः ।तदा तीव्रतरं स्वाङ्गात्ससर्ज भुवि तर्जकान् ॥ १७॥

viprayogeṇa vai devyā duḥsahenaiva suvratāḥ |tadā tīvrataraṃ svāṅgātsasarja bhuvi tarjakān || 17||

सौम्यानथ गणश्रेष्ठानसौम्यान् शिवभावनान् ।तुरङ्गवरमातङ्गसारङ्गास्यान् मनोहरान् ॥ १८॥

saumyānatha gaṇaśreṣṭhānasaumyān śivabhāvanān |turaṅgavaramātaṅgasāraṅgāsyān manoharān || 18||

काकोलूकबकाभास्यान् वृकभेकास्यकांस्तथा ।भल्लूकसृमराभास्यान् चामरास्यांस्तथा गणान् ॥ १९॥

kākolūkabakābhāsyān vṛkabhekāsyakāṃstathā |bhallūkasṛmarābhāsyān cāmarāsyāṃstathā gaṇān || 19||

शेषमाहिषवक्त्रांश्च खड्गगोमायुवक्त्रकान्वृषभास्यान् रासभास्यान् इभास्यान् कोकिलास्यकान् ।एवं गणगणं तत्र दृष्ट्वेशः पुरतः स्थितम् ।कोटित्रयातिगणितं नानावेषैकभूषितम् ॥ २०॥

śeṣamāhiṣavaktrāṃśca khaḍgagomāyuvaktrakānvṛṣabhāsyān rāsabhāsyān ibhāsyān kokilāsyakān |evaṃ gaṇagaṇaṃ tatra dṛṣṭveśaḥ purataḥ sthitam |koṭitrayātigaṇitaṃ nānāveṣaikabhūṣitam || 20||

रूषितं भसितेनैव घोषमाणं मुहुर्मुहुः ।त्रिपुण्ड्रभालं रुद्राक्षफणिहारविभूषितम् ॥ २१॥

rūṣitaṃ bhasitenaiva ghoṣamāṇaṃ muhurmuhuḥ |tripuṇḍrabhālaṃ rudrākṣaphaṇihāravibhūṣitam || 21||

असिकार्मुकनिस्त्रिंसखड्गखेटधरं तदा ।बाणबाणासनधरं करवालसत्कटिम् ॥ २२॥

asikārmukanistriṃsakhaḍgakheṭadharaṃ tadā |bāṇabāṇāsanadharaṃ karavālasatkaṭim || 22||

कुन्तशातारिमुत्कृष्टं प्रणतं पुरतः स्थितम् ।सास्राविलाक्षस्त्र्यक्षस्तान् मुहुरीक्षन्नुवाचह ॥ २३॥

kuntaśātārimutkṛṣṭaṃ praṇataṃ purataḥ sthitam |sāsrāvilākṣastryakṣastān muhurīkṣannuvācaha || 23||

वीरभद्रं पुरस्कृत्य रुद्रकोटिसमन्वितम् ।ईश्वर उवाच ।वीरभद्र सदाभद्र तवास्तु विजयो गणैः ॥ २४॥

vīrabhadraṃ puraskṛtya rudrakoṭisamanvitam |īśvara uvāca |vīrabhadra sadābhadra tavāstu vijayo gaṇaiḥ || 24||

तूर्णं प्रयाहि दक्षस्य यज्ञवाटं सुरैर्वृतम् ।विष्णुब्रह्मादिविबुधैः क्षणाद्विध्वंसयाधुना ॥ २५॥

tūrṇaṃ prayāhi dakṣasya yajñavāṭaṃ surairvṛtam |viṣṇubrahmādivibudhaiḥ kṣaṇādvidhvaṃsayādhunā || 25||

तेन मे प्रीतिरतुला मा ते विघ्नोऽत्र सम्प्रति ।(स्कन्द उवाच)इत्युक्तोऽथ महेशेन वीरभद्रो गणैः सह ॥ २६॥

tena me prītiratulā mā te vighno'tra samprati |(skanda uvāca)ityukto'tha maheśena vīrabhadro gaṇaiḥ saha || 26||

मत्तवारणसङ्काशैर्ययौ गणगणैर्वृतः ।नत्वा तं श्रीमहादेवं वीरभद्रो नदंस्तदा ॥ २७॥

mattavāraṇasaṅkāśairyayau gaṇagaṇairvṛtaḥ |natvā taṃ śrīmahādevaṃ vīrabhadro nadaṃstadā || 27||

गणा जगर्जुश्च तदा भ्रामयन्तोऽस्त्रमण्डलम् ।गणेश्वरकृतारावबधिरीकृतदिङ्मुखम् ॥ २८॥

gaṇā jagarjuśca tadā bhrāmayanto'stramaṇḍalam |gaṇeśvarakṛtārāvabadhirīkṛtadiṅmukham || 28||

तन्मखं लेखकैः सार्धं दुर्मुखं समपद्यत ।तदा वाता ववुर्लोके तत्र वा भयशंसिनः ॥ २९॥

tanmakhaṃ lekhakaiḥ sārdhaṃ durmukhaṃ samapadyata |tadā vātā vavurloke tatra vā bhayaśaṃsinaḥ || 29||

पर्वताश्च व्यशीर्यन्त चकम्पे च वसुन्धरा ।मारुतैश्चाप्यघूर्णन्त चुक्षुभे वरुणालयः ॥ ३०॥

parvatāśca vyaśīryanta cakampe ca vasundharā |mārutaiścāpyaghūrṇanta cukṣubhe varuṇālayaḥ || 30||

अग्नयो नाप्यदीप्यन्त न च भाति प्रभाकरः ।ग्रहाश्च न प्रकाशन्ते पेतुर्नक्षत्रपङ्क्तयः ॥ ३१॥

agnayo nāpyadīpyanta na ca bhāti prabhākaraḥ |grahāśca na prakāśante peturnakṣatrapaṅktayaḥ || 31||

उल्का कबन्धसहिता पपात मखसंसदि ।गणेश्वरैः समारुह्य रथं भद्रो गिरिप्रभम् ॥ ३२॥

ulkā kabandhasahitā papāta makhasaṃsadi |gaṇeśvaraiḥ samāruhya rathaṃ bhadro giriprabham || 32||

सहस्राश्वं पताकाढ्यं कुम्भराजत्पताककम् ।गणास्तमन्वयुस्तत्र विविधायुधपाणयः ॥ ३३॥

sahasrāśvaṃ patākāḍhyaṃ kumbharājatpatākakam |gaṇāstamanvayustatra vividhāyudhapāṇayaḥ || 33||

गर्जन्तश्चातिहृष्यन्तो भिन्दन्तो गां शरावरैः ।शूलमूलैर्गिरिव्रातं धनुष्कोट्योत्सृजन्त्यपि ॥ ३४॥

garjantaścātihṛṣyanto bhindanto gāṃ śarāvaraiḥ |śūlamūlairgirivrātaṃ dhanuṣkoṭyotsṛjantyapi || 34||

॥ इति शिवरहस्यान्तर्गते वीरभद्रप्रति शिवाज्ञाकथनं सम्पूर्णम् ॥॥ श्रीशिवरहस्यम् । ईशाख्यः द्वादशमांशः । अध्यायः ६ वीरभद्रविष्णुयुद्धम् । १२३४ ॥

|| iti śivarahasyāntargate vīrabhadraprati śivājñākathanaṃ sampūrṇam |||| śrīśivarahasyam | īśākhyaḥ dvādaśamāṃśaḥ | adhyāyaḥ 6 vīrabhadraviṣṇuyuddham | 1234 ||

– ॥ श्रीशिवरहस्यम् ।ईशाख्यः द्वादशमांशः ।अध्यायः ६ वीरभद्रविष्णुयुद्धम् ।१२-३४ ॥

– || śrīśivarahasyam |īśākhyaḥ dvādaśamāṃśaḥ |adhyāyaḥ 6 vīrabhadraviṣṇuyuddham | 12-34 ||