शिवस्तोत्रम् (वेदव्यासकृतं शिवपुराणान्तर्गतम् देवदेव महाभाग शरणागतवत्सल) Vedavyasakritam Shiva Stotram

वेदव्यास उवाच ।देवदेव महाभाग शरणागतवत्सल ।वाङ्मनः कर्मदुष्प्राप योगिनामप्यगोचर ॥ १॥

vedavyāsa uvāca |devadeva mahābhāga śaraṇāgatavatsala |vāṅmanaḥ karmaduṣprāpa yogināmapyagocara || 1||

महिमानं न ते वेदा विदामासुरुमापते ।त्वमेव जगतः कर्ता धर्ता हर्ता तथैव च ॥ २॥

mahimānaṃ na te vedā vidāmāsurumāpate |tvameva jagataḥ kartā dhartā hartā tathaiva ca || 2||

त्वमाद्यः सर्वदेवानां सच्चिदानन्द ईश्वरः ।नामगोत्रे न वा ते स्तः सर्वज्ञोऽसि सदाशिव ॥ ३॥

tvamādyaḥ sarvadevānāṃ saccidānanda īśvaraḥ |nāmagotre na vā te staḥ sarvajño'si sadāśiva || 3||

त्वमेव परमं ब्रह्म मायापाशनिवर्तकः ।गुणत्रयैर्न लिप्तस्त्वं पद्मपत्रमिवाम्भसा ॥ ४॥

tvameva paramaṃ brahma māyāpāśanivartakaḥ |guṇatrayairna liptastvaṃ padmapatramivāmbhasā || 4||

न ते जन्म न वा शीलं न देशो न कुलं च ते ।इत्थं भूतोऽपीश्वरत्वं त्रिलोक्याः काममावहेः ॥ ५॥

na te janma na vā śīlaṃ na deśo na kulaṃ ca te |itthaṃ bhūto'pīśvaratvaṃ trilokyāḥ kāmamāvaheḥ || 5||

न च ब्रह्मा न लक्ष्मीशो न च सेन्द्रा दिवौकसः ।न योगीन्द्रा विदुस्तत्त्वं यस्य तं त्वामुपास्महे ॥ ६॥

na ca brahmā na lakṣmīśo na ca sendrā divaukasaḥ |na yogīndrā vidustattvaṃ yasya taṃ tvāmupāsmahe || 6||

त्वत्तः सर्वं त्वं हि सर्वं गौरीशस्त्वं पुरान्तकः ।त्वं बालस्त्वं युवा वृद्धस्तं त्वां हृदि युनज्म्यहम् ॥ ७॥

tvattaḥ sarvaṃ tvaṃ hi sarvaṃ gaurīśastvaṃ purāntakaḥ |tvaṃ bālastvaṃ yuvā vṛddhastaṃ tvāṃ hṛdi yunajmyaham || 7||

नमस्तस्मै महेशाय भक्तध्येयाय शम्भवे ।पुराणपुरुषायाद्धा शङ्कराय परात्मने ॥ ८॥

namastasmai maheśāya bhaktadhyeyāya śambhave |purāṇapuruṣāyāddhā śaṅkarāya parātmane || 8||

इति शिवपुराणे उमासंहितायां चतुश्चत्वारिंशाध्यायान्तर्गतंवेदव्यासकृतं शिवस्तोत्रं समाप्तम् ।शिवपुराण । उमासंहिता । अध्याय ४४/९९१०६॥शिवपुराण । उमासंहिता । अध्याय ४४/९९-१०६॥

iti śivapurāṇe umāsaṃhitāyāṃ catuścatvāriṃśādhyāyāntargataṃvedavyāsakṛtaṃ śivastotraṃ samāptam |śivapurāṇa | umāsaṃhitā | adhyāya 44/99106||śivapurāṇa | umāsaṃhitā | adhyāya 44/99-106||