शिवविद्यामहिमावर्णनम् १ सानन्दनप्रोक्तम् Sanandanaproktam Shivavidyamahimavarnanam

सत्यव्रतःसनन्दनापूर्वमिदं प्रपश्य ज्योतिः कदाचिन्न विलोकितं च ।न वा श्रितं किञ्चिदिदं वदाशु लोकस्य तत्त्वं विदितं त्वया तु ॥ ५॥

satyavrataḥsanandanāpūrvamidaṃ prapaśya jyotiḥ kadācinna vilokitaṃ ca |na vā śritaṃ kiñcididaṃ vadāśu lokasya tattvaṃ viditaṃ tvayā tu || 5||

सनन्दनःश्रीपञ्चाक्षरविद्यया स्थिरमतिर्नित्यं शिवाराधकोभस्मोद्धूलितविग्रहः श्रुतिलसद्भूतित्रिपुण्ड्राङ्कितः ।त्यक्त्वा देवमुमासहायचरणध्यानातिपूतोऽधुनागौरीनाथपदारविन्दभजनं कर्तुं प्रयाति ध्रुवम् ॥ ६॥

sanandanaḥśrīpañcākṣaravidyayā sthiramatirnityaṃ śivārādhakobhasmoddhūlitavigrahaḥ śrutilasadbhūtitripuṇḍrāṅkitaḥ |tyaktvā devamumāsahāyacaraṇadhyānātipūto'dhunāgaurīnāthapadāravindabhajanaṃ kartuṃ prayāti dhruvam || 6||

अयं पुण्यपुञ्जस्वरूपोप्यपापो विघूताधितापो विशेषेण दृष्टः ।अदृष्टं समुद्भूतमेवाद्य सत्यं किमेतादृशालोकने शोकशूकम् ॥ ७॥

ayaṃ puṇyapuñjasvarūpopyapāpo vighūtādhitāpo viśeṣeṇa dṛṣṭaḥ |adṛṣṭaṃ samudbhūtamevādya satyaṃ kimetādṛśālokane śokaśūkam || 7||

अपाररविमण्डलप्रकरमालिकासन्निभंप्रयाति शिवमन्दिरं सकललोकशोकापहम् ।विलोकय विलोकय स्मरहरोरुविद्यानिधिंपुनर्नयनगोचरः किमयमद्य भूयो नृप ॥ ८॥

apāraravimaṇḍalaprakaramālikāsannibhaṃprayāti śivamandiraṃ sakalalokaśokāpaham |vilokaya vilokaya smaraharoruvidyānidhiṃpunarnayanagocaraḥ kimayamadya bhūyo nṛpa || 8||

विभाति शिवविद्यया तरणिमण्डलस्याप्ययंनिरोधकतया मितोप्यमितभानुमालायितः ।इदं खलु महत्तरं भवति भाग्यमीशार्चनादयं भवति शङ्करप्रवणमानसः सर्वदा ॥ ९॥

vibhāti śivavidyayā taraṇimaṇḍalasyāpyayaṃnirodhakatayā mitopyamitabhānumālāyitaḥ |idaṃ khalu mahattaraṃ bhavati bhāgyamīśārcanādayaṃ bhavati śaṅkarapravaṇamānasaḥ sarvadā || 9||

शिवार्चनफलं परं भवति तावदेतादृशंप्रभूतबहुपुण्यवानयमुमासहायार्चकः ।अयं गुरुरिति श्रुतः शिवपरायणानां परंप्रदर्शनमयं करोत्यनघशैवमार्गस्य किम् ॥ १०॥

śivārcanaphalaṃ paraṃ bhavati tāvadetādṛśaṃprabhūtabahupuṇyavānayamumāsahāyārcakaḥ |ayaṃ gururiti śrutaḥ śivaparāyaṇānāṃ paraṃpradarśanamayaṃ karotyanaghaśaivamārgasya kim || 10||

महान् खलु शिवार्चको भुवनमण्डलाखण्डलःप्रचण्डतरपातकप्रचलपर्वतानां पविः ।किमेवमिदमद्भुतं शिवपदाम्बुजाराधनंमहाघवनपावकं सकललोकसन्तोषदम् ॥ ११॥

mahān khalu śivārcako bhuvanamaṇḍalākhaṇḍalaḥpracaṇḍatarapātakapracalaparvatānāṃ paviḥ |kimevamidamadbhutaṃ śivapadāmbujārādhanaṃmahāghavanapāvakaṃ sakalalokasantoṣadam || 11||

स याति शिवमन्दिरं शिवपदाम्बुजाराधनादिहैतदवलोकनाद्भवति पुण्यराशिः स्थिता ।सुखाम्बुनिधिरुत्थितः शिवजनेष्टचन्द्रोदयादहो भवति देहिनां शिवपदार्चनं पुण्यतः ॥ १२॥

sa yāti śivamandiraṃ śivapadāmbujārādhanādihaitadavalokanādbhavati puṇyarāśiḥ sthitā |sukhāmbunidhirutthitaḥ śivajaneṣṭacandrodayādaho bhavati dehināṃ śivapadārcanaṃ puṇyataḥ || 12||

स किं मम सखा पिता किमुत सोदरो वा हितस्त्वयापि शिवपूजकः सकृदवेक्षितो वा भृशम् ।प्रयच्छति कथं सुरप्रवरशङ्कराराधकःकदम्बवनभूरुहो भवति दुर्लभो दुर्लभः ॥ १३॥

sa kiṃ mama sakhā pitā kimuta sodaro vā hitastvayāpi śivapūjakaḥ sakṛdavekṣito vā bhṛśam |prayacchati kathaṃ surapravaraśaṅkarārādhakaḥkadambavanabhūruho bhavati durlabho durlabhaḥ || 13||

अनेन जननोत्तरं शिवपदाम्बुजाराधनादवाप्तमतुलं जगद्भवति भाग्यमानन्ददम् ।प्रयच्छति कथं सुरप्रवरशङ्कराराधकःस तेन शिवपूजनं पुनरपारभाग्यप्रदम् ॥ १४॥

anena jananottaraṃ śivapadāmbujārādhanādavāptamatulaṃ jagadbhavati bhāgyamānandadam |prayacchati kathaṃ surapravaraśaṅkarārādhakaḥsa tena śivapūjanaṃ punarapārabhāgyapradam || 14||

शिवव्रतरतः सदा शिवकथाविचारे रतःशिवप्रवणमानसः शिवकथानुमोदप्रियः ।शिवं वदति सन्ततं शिवशिवेति नाम स्मरन्शिवं भवति भावितं सुकृतराशिभिः केवलम् ॥ १५॥

śivavratarataḥ sadā śivakathāvicāre rataḥśivapravaṇamānasaḥ śivakathānumodapriyaḥ |śivaṃ vadati santataṃ śivaśiveti nāma smaranśivaṃ bhavati bhāvitaṃ sukṛtarāśibhiḥ kevalam || 15||

शिवं सुखकरं परं वदति साधु वीरेश्वरंशिवं भवति चेतसा कमलकुन्दबिल्वीदलैः ।समर्चयति सादरं गिरिकुमारिकावल्लभंपरं स्वकुलदैवतं सततमेव मेने मुदा ॥ १६॥

śivaṃ sukhakaraṃ paraṃ vadati sādhu vīreśvaraṃśivaṃ bhavati cetasā kamalakundabilvīdalaiḥ |samarcayati sādaraṃ girikumārikāvallabhaṃparaṃ svakuladaivataṃ satatameva mene mudā || 16||

शृणोति शिवविद्यया परमुदारकीर्तिं हरंमहेश्वरमहेश्वरेत्यमरसार्वभौमं हृदि ।विचिन्त्य पुनरादरात् कनककेतकीचम्पकैःकरोति विकटार्चनं समभिपूज्य वीरेश्वरम् ॥ १७॥

śṛṇoti śivavidyayā paramudārakīrtiṃ haraṃmaheśvaramaheśvaretyamarasārvabhaumaṃ hṛdi |vicintya punarādarāt kanakaketakīcampakaiḥkaroti vikaṭārcanaṃ samabhipūjya vīreśvaram || 17||

अपारजलधारया शिरसि चैकवीरेश्वरंचकार सुमुखं मुहुः स खलु कालकालार्चने ।चकार करणं वयो विरत एव संसारतोयुवापि युवतीं वधूमपि विहाय तन्मातरि ॥ १८॥

apārajaladhārayā śirasi caikavīreśvaraṃcakāra sumukhaṃ muhuḥ sa khalu kālakālārcane |cakāra karaṇaṃ vayo virata eva saṃsāratoyuvāpi yuvatīṃ vadhūmapi vihāya tanmātari || 18||

यदेव धनमार्जितं विविधशास्त्रविद्यात्मकंतदप्यगसुतापतिस्मरणकारणं केवलम् ।मनोऽपि शिवविद्यया परमपावनं तस्य वैप्रयाति शिवमन्दिरं सुरकृतार्यडिण्डीरवैः ॥ १९॥

yadeva dhanamārjitaṃ vividhaśāstravidyātmakaṃtadapyagasutāpatismaraṇakāraṇaṃ kevalam |mano'pi śivavidyayā paramapāvanaṃ tasya vaiprayāti śivamandiraṃ surakṛtāryaḍiṇḍīravaiḥ || 19||

न तेन सुखसाधनं शिवपदाम्बुजाराधनात्विभिन्नमपि निर्मितं नियमतोऽथवा निश्चितम् ।तदेव सकलार्थदं परममुक्तिदानक्षमंन हातुमपि वाञ्छित प्रबलसङ्कटेऽपि ध्रुवम् ॥ २०॥

na tena sukhasādhanaṃ śivapadāmbujārādhanātvibhinnamapi nirmitaṃ niyamato'thavā niścitam |tadeva sakalārthadaṃ paramamuktidānakṣamaṃna hātumapi vāñchita prabalasaṅkaṭe'pi dhruvam || 20||

॥ इति शिवरहस्यान्तर्गते सनन्दनप्रोक्तं शिवविद्यामहिमावर्णनं सम्पूर्णम् ॥॥ श्रीशिवरहस्यम् । हराख्यः तृतीयांशः । उत्तरार्धम् । अध्यायः २९। ५२०॥

|| iti śivarahasyāntargate sanandanaproktaṃ śivavidyāmahimāvarṇanaṃ sampūrṇam |||| śrīśivarahasyam | harākhyaḥ tṛtīyāṃśaḥ | uttarārdham | adhyāyaḥ 29| 520||

– ॥ श्रीशिवरहस्यम् ।हराख्यः तृतीयांशः ।उत्तरार्धम् ।अध्यायः २९। ५-२०॥

– || śrīśivarahasyam |harākhyaḥ tṛtīyāṃśaḥ |uttarārdham |adhyāyaḥ 29| 5-20||