शिवस्तोत्रम् (ब्रह्मणाकृतं ०७ लिङ्गपुराणान्तर्गतम् ओमीशान नमस्तेऽस्तु महादेव नमोऽस्तु ते) Brahmana Kritam 07 Shiva Stotram

शुद्धस्फटिकसङ्काशं सर्वाभरणभूषितम् ।अथ तं मनसा ध्यात्वा युक्तात्मा वै पितामहः ॥ ५॥

śuddhasphaṭikasaṅkāśaṃ sarvābharaṇabhūṣitam |atha taṃ manasā dhyātvā yuktātmā vai pitāmahaḥ || 5||

ववन्दे देवमीशानं सर्वेशं सर्वगं प्रभुम् ।ब्रह्मोवाच ।ओमीशान नमस्तेऽस्तु महादेव नमोऽस्तु ते ॥ ६॥

vavande devamīśānaṃ sarveśaṃ sarvagaṃ prabhum |brahmovāca |omīśāna namaste'stu mahādeva namo'stu te || 6||

नमोऽस्तु सर्वविद्यानामीशान परमेश्वर ।नमोऽस्तु सर्वभूतानामीशान वृषवाहन ॥ ७॥

namo'stu sarvavidyānāmīśāna parameśvara |namo'stu sarvabhūtānāmīśāna vṛṣavāhana || 7||

ब्रह्मणोऽधिपते तुभ्यं ब्रह्मणे ब्रह्मरूपिणे ।नमो ब्रह्माधिपतये शिवं मेऽस्तु सदाशिव ॥ ८॥

brahmaṇo'dhipate tubhyaṃ brahmaṇe brahmarūpiṇe |namo brahmādhipataye śivaṃ me'stu sadāśiva || 8||

ॐ कारमूर्ते देवेश सद्योजात नमो नमः ।प्रपद्ये त्वां प्रपन्नोऽस्मि सद्योजाताय वै नमः ॥ ९॥

oṃ kāramūrte deveśa sadyojāta namo namaḥ |prapadye tvāṃ prapanno'smi sadyojātāya vai namaḥ || 9||

अभवे च भवे तुभ्यं तथा नातिभवे नमः ।भवोद्भव भवेशान मां भजस्व महाद्युते ॥ १०॥

abhave ca bhave tubhyaṃ tathā nātibhave namaḥ |bhavodbhava bhaveśāna māṃ bhajasva mahādyute || 10||

वामदेव नमस्तुभ्यं ज्येष्ठाय वरदाय च ।नमो रुद्राय कालाय कलनाय नमो नमः ॥ ११॥

vāmadeva namastubhyaṃ jyeṣṭhāya varadāya ca |namo rudrāya kālāya kalanāya namo namaḥ || 11||

नमो विकरणायैव कालवर्णाय वर्णिने ।बलाय बलिनां नित्यं सदा विकरणाय ते ॥ १२॥

namo vikaraṇāyaiva kālavarṇāya varṇine |balāya balināṃ nityaṃ sadā vikaraṇāya te || 12||

बलप्रमथनायैव बलिने ब्रह्मरूपिणे ।सर्वभूतेश्वरेशाय भूतानां दमनाय च ॥ १३॥

balapramathanāyaiva baline brahmarūpiṇe |sarvabhūteśvareśāya bhūtānāṃ damanāya ca || 13||

मनोन्मनाय देवाय नमस्तुभ्यं महाद्युते ।वामदेवाय वामाय नमस्तुभ्यं महात्मने ॥ १४॥

manonmanāya devāya namastubhyaṃ mahādyute |vāmadevāya vāmāya namastubhyaṃ mahātmane || 14||

ज्येष्ठाय चैव श्रेष्ठाय रुद्राय वरदाय च ।कालहन्त्रे नमस्तुभ्यं नमस्तुभ्यं महात्मने ॥ १५॥

jyeṣṭhāya caiva śreṣṭhāya rudrāya varadāya ca |kālahantre namastubhyaṃ namastubhyaṃ mahātmane || 15||

इति स्तवेन देवेशं ननाम वृषभध्वजम् ।यः पठेत् सकृदेवेह ब्रह्मलोकं गमिष्यति ॥ १६॥

iti stavena deveśaṃ nanāma vṛṣabhadhvajam |yaḥ paṭhet sakṛdeveha brahmalokaṃ gamiṣyati || 16||

श्रावयेद्वा द्विजान् श्राद्धे स याति परमां गतिम् ।इति श्रीलिङ्गमहापुराणे पूर्वभागे षोडशाध्यायान्तर्गतंब्रह्मणा कृतं शिवस्तोत्रं समाप्तम् ।लिङ्गपुराण । पूर्वभाग । अध्याय १६/६१५॥लिन्गपुराण । पूर्वभाग । अध्याय १६/६-१५॥

śrāvayedvā dvijān śrāddhe sa yāti paramāṃ gatim |iti śrīliṅgamahāpurāṇe pūrvabhāge ṣoḍaśādhyāyāntargataṃbrahmaṇā kṛtaṃ śivastotraṃ samāptam |liṅgapurāṇa | pūrvabhāga | adhyāya 16/615||lingapurāṇa | pūrvabhāga | adhyāya 16/6-15||