शिवस्तोत्रम् (बाणकृतं २ स्कन्दपुराणान्तर्गतम् शिव शङ्कर सर्वहराय नमो भवभीतभयार्तिहराय नमः) Banakritam 2 Shiva Stotram

बाण उवाच ।शिव शङ्कर सर्वहराय नमो भवभीतभयार्तिहराय नमः ।कुसुमायुधदेहविनाशकर प्रमदाप्रियकामुक देव नमः ॥ ८४॥

bāṇa uvāca |śiva śaṅkara sarvaharāya namo bhavabhītabhayārtiharāya namaḥ |kusumāyudhadehavināśakara pramadāpriyakāmuka deva namaḥ || 84||

जय पार्वतीश परमार्थसार जय विरचितभीमभुजङ्गहार ।जय निर्मलभस्मविलिप्तगात्र जय मन्त्रमूल जगदेकपात्र ॥ ८५॥

jaya pārvatīśa paramārthasāra jaya viracitabhīmabhujaṅgahāra |jaya nirmalabhasmaviliptagātra jaya mantramūla jagadekapātra || 85||

जय विषधर कपिलजटाकलाप जय भैरवविधृतपिनाकचाप ।जय विषमनयनपरिमुक्तसङ्ग जय शङ्कर धृतगाङ्गतरङ्ग ॥ ८६॥

jaya viṣadhara kapilajaṭākalāpa jaya bhairavavidhṛtapinākacāpa |jaya viṣamanayanaparimuktasaṅga jaya śaṅkara dhṛtagāṅgataraṅga || 86||

जय भीमरूप खट्वाङ्गहस्त जय शशिशेखर जगतां प्रशस्त ।जय सुरवरेश सुरलोकसार जय सर्वसकलनिर्दग्धसार ॥ ८७॥

jaya bhīmarūpa khaṭvāṅgahasta jaya śaśiśekhara jagatāṃ praśasta |jaya suravareśa suralokasāra jaya sarvasakalanirdagdhasāra || 87||

जय कीर्तनीय जगतां पवित्र जय वृषाङ्क बहुविधचरित्र ।जय विरचितनरकङ्कालमाल अघासुरदेहकङ्कालकाल ॥ ८८॥

jaya kīrtanīya jagatāṃ pavitra jaya vṛṣāṅka bahuvidhacaritra |jaya viracitanarakaṅkālamāla aghāsuradehakaṅkālakāla || 88||

जय नीलकण्ठ वरवृषभगमन जय सकललोकदुरितानुशमन ।जय सिद्धसुरासुरविनतचरण जय रुद्र रौद्रभवजलधितरण ॥ ८९॥

jaya nīlakaṇṭha varavṛṣabhagamana jaya sakalalokaduritānuśamana |jaya siddhasurāsuravinatacaraṇa jaya rudra raudrabhavajaladhitaraṇa || 89||

जय गिरिश सुरेश्वरमाननीय जय सूक्ष्मरूप सञ्चितनीय ।जय दग्धत्रिपुर विश्वसत्त्व जय सकलशास्त्रपरमार्थतत्त्व ॥ ९०॥

jaya giriśa sureśvaramānanīya jaya sūkṣmarūpa sañcitanīya |jaya dagdhatripura viśvasattva jaya sakalaśāstraparamārthatattva || 90||

जय दुरवबोध संसारतार कलिकलुषमहार्णवघोरतार ।जय सुरासुरदेवगणेश नमो हयवानरसिंहगजेन्द्रमुख ॥ ९१॥

jaya duravabodha saṃsāratāra kalikaluṣamahārṇavaghoratāra |jaya surāsuradevagaṇeśa namo hayavānarasiṃhagajendramukha || 91||

अतिह्रस्वस्थूलसुदीर्घतम उपलब्धिर्न शक्यते ते ह्यमरैः ।प्रणतोऽस्मि निरञ्जन ते चरणौ जय साम्ब सुलोचन कान्तिहर ॥ ९२॥

atihrasvasthūlasudīrghatama upalabdhirna śakyate te hyamaraiḥ |praṇato'smi nirañjana te caraṇau jaya sāmba sulocana kāntihara || 92||

अप्राप्य त्वां किमत्यन्तमुच्छ्रयी न विनाशयेत् ।अतिप्रमाथि च तदा तपो महत्सुदारुणम् ॥ ९३॥

aprāpya tvāṃ kimatyantamucchrayī na vināśayet |atipramāthi ca tadā tapo mahatsudāruṇam || 93||

न पुत्रबान्धवा दारा न समस्तसुहृज्जनः ।सङ्कटेऽभ्युपगच्छन्ति व्रजन्तमेकगामिनम् ॥ ९४॥

na putrabāndhavā dārā na samastasuhṛjjanaḥ |saṅkaṭe'bhyupagacchanti vrajantamekagāminam || 94||

यदेव कर्म कैवल्यं कृतं तेन शुभाशुभम् ।तदेव सार्थवत्तस्य भवत्यग्रे तु गच्छतः ॥ ९५॥

yadeva karma kaivalyaṃ kṛtaṃ tena śubhāśubham |tadeva sārthavattasya bhavatyagre tu gacchataḥ || 95||

निर्धनस्यैव चरतो न भयं विद्यते क्वचित् ।धनी भयैर्न मुच्येत धनं तस्मात्त्यजाम्यहम् ॥ ९६॥

nirdhanasyaiva carato na bhayaṃ vidyate kvacit |dhanī bhayairna mucyeta dhanaṃ tasmāttyajāmyaham || 96||

लुब्धाः पापानि कुर्वन्ति शुद्धांशा नैव मानवाः ।श्रुत्वा धर्मस्य सर्वस्वं श्रुत्वा चैवावधार्य तत् ॥ ९७॥

lubdhāḥ pāpāni kurvanti śuddhāṃśā naiva mānavāḥ |śrutvā dharmasya sarvasvaṃ śrutvā caivāvadhārya tat || 97||

त्वं विष्णुस्त्वं जगन्नाथो ब्रह्मरूपः सनातनः ।इन्द्रस्त्वं देवदेवेश सुरनाथ नमोऽस्तु ते ॥ ९८॥

tvaṃ viṣṇustvaṃ jagannātho brahmarūpaḥ sanātanaḥ |indrastvaṃ devadeveśa suranātha namo'stu te || 98||

त्वं क्षितिर्वरुणश्चैव पवनस्त्वं हुताशनः ।त्वं दीक्षा यजमानश्च आकाशं सोम एव च ॥ ९९॥

tvaṃ kṣitirvaruṇaścaiva pavanastvaṃ hutāśanaḥ |tvaṃ dīkṣā yajamānaśca ākāśaṃ soma eva ca || 99||

त्वं सूर्यस्त्वं तु वित्तेशो यमस्त्वं गुरुरेव च ।त्वया व्याप्तं जगत्सर्वं त्रैलोक्यं भास्वता यथा ॥ १००॥

tvaṃ sūryastvaṃ tu vitteśo yamastvaṃ gurureva ca |tvayā vyāptaṃ jagatsarvaṃ trailokyaṃ bhāsvatā yathā || 100||

इति श्रीस्कन्दपुराणे आवन्त्यखण्डे रेवाखण्डे अष्टाविंशा ध्यायान्तर्गतंबाणकृतं शिवस्तोत्रं समाप्तम् ।स्कन्दपुराण । आवन्त्यखण्ड । रेवाखण्ड । अध्याय २८/८४१००॥स्कन्दपुराण । आवन्त्यखण्ड । रेवाखण्ड । अध्याय २८/८४-१००॥

iti śrīskandapurāṇe āvantyakhaṇḍe revākhaṇḍe aṣṭāviṃśā dhyāyāntargataṃbāṇakṛtaṃ śivastotraṃ samāptam |skandapurāṇa | āvantyakhaṇḍa | revākhaṇḍa | adhyāya 28/84100||skandapurāṇa | āvantyakhaṇḍa | revākhaṇḍa | adhyāya 28/84-100||