सदाशिवेन्द्रस्तवः Shri Sadashivendrastavah

परतत्त्वलीनमनसे प्रणमद्भवबन्धमोचनायाशु ।प्रकटितपरतत्त्वाय प्रणतिं कुर्मः सदाशिवेन्द्राय ॥ १॥

paratattvalīnamanase praṇamadbhavabandhamocanāyāśu |prakaṭitaparatattvāya praṇatiṃ kurmaḥ sadāśivendrāya || 1||

परमशिवेन्द्रकराम्बुजसम्भूताय प्रणम्रवरदाय ।पदधूतपङ्कजाय प्रणतिं कुर्मः सदाशिवेन्द्राय ॥ २॥

paramaśivendrakarāmbujasambhūtāya praṇamravaradāya |padadhūtapaṅkajāya praṇatiṃ kurmaḥ sadāśivendrāya || 2||

विजननदीकुञ्जगृहे मञ्जुलपुलिनैकमञ्जुतरतल्पे ।शयनं कुर्वाणाय प्रणतिं कुर्मः सदाशिवेन्द्राय ॥ ३॥

vijananadīkuñjagṛhe mañjulapulinaikamañjutaratalpe |śayanaṃ kurvāṇāya praṇatiṃ kurmaḥ sadāśivendrāya || 3||

कामाहिद्विजपतये शमदममुखदिव्यरत्नवारिधये ।शमनाय मोहविततेः प्रणतिं कुर्म सदाशिवेन्द्राय ॥ ४॥

kāmāhidvijapataye śamadamamukhadivyaratnavāridhaye |śamanāya mohavitateḥ praṇatiṃ kurma sadāśivendrāya || 4||

नमदात्मबोधदायारमते परमात्मतत्त्वसौधाग्रे ।समबुद्धयेऽश्महेम्नोः प्रणतिं कुर्मः सदाशिवेन्द्राय ॥ ५॥

namadātmabodhadāyāramate paramātmatattvasaudhāgre |samabuddhaye'śmahemnoḥ praṇatiṃ kurmaḥ sadāśivendrāya || 5||

गिलिताविद्याहालाहलहतपुर्यष्टकाय बोधेन ।मोहान्धकाररवये प्रणतिं कुर्मः सदाशिवेन्द्राय ॥ ६॥

gilitāvidyāhālāhalahatapuryaṣṭakāya bodhena |mohāndhakāraravaye praṇatiṃ kurmaḥ sadāśivendrāya || 6||

शममुखषट्पदमुमुक्षाविवेकवैराग्यदाननिरतायतरसा नतजनततये प्रणतिं कुर्मः सदाशिवेन्द्राय ॥ ७॥

śamamukhaṣaṭpadamumukṣāvivekavairāgyadānaniratāyatarasā natajanatataye praṇatiṃ kurmaḥ sadāśivendrāya || 7||

सिद्धान्तकल्पवल्लीमुखकृतिकर्त्रे कपालिभक्तिकृते ।करतलमुक्तिफलाय प्रणतिं कुर्मः सदाशिवेन्द्राय ॥ ८॥

siddhāntakalpavallīmukhakṛtikartre kapālibhaktikṛte |karatalamuktiphalāya praṇatiṃ kurmaḥ sadāśivendrāya || 8||

तृणपङ्कलिप्तवपुषे तृणतोऽप्यधरं जगद्विलोकयते ।वनमध्यविहरणाय प्रणतिं कुर्मः सदाशिवेन्द्राय ॥ ९॥

tṛṇapaṅkaliptavapuṣe tṛṇato'pyadharaṃ jagadvilokayate |vanamadhyaviharaṇāya praṇatiṃ kurmaḥ sadāśivendrāya || 9||

निगृहीतहृदयहरये प्रगृहीतात्मस्वरूपरत्नाय ।प्रणताब्धिपूर्णशशिने प्रणतिं कुर्मः सदाशिवेन्द्राय ॥ १०॥

nigṛhītahṛdayaharaye pragṛhītātmasvarūparatnāya |praṇatābdhipūrṇaśaśine praṇatiṃ kurmaḥ sadāśivendrāya || 10||

अज्ञानतिमिररवये प्रज्ञानाम्भोधिपूर्णचन्द्राय ।प्रणताघविपिनशुचये प्रणतिं कुर्मः सदाशिवेन्द्राय ॥ ११॥

ajñānatimiraravaye prajñānāmbhodhipūrṇacandrāya |praṇatāghavipinaśucaye praṇatiṃ kurmaḥ sadāśivendrāya || 11||

मतिमलमोचनदक्षप्रत्यग्ब्रह्मैक्यदाननिरताय ।स्मृतिमात्रतुष्टमनसे प्रणतिं कुर्मः सदाशिवेन्द्राय ॥ १२॥

matimalamocanadakṣapratyagbrahmaikyadānaniratāya |smṛtimātratuṣṭamanase praṇatiṃ kurmaḥ sadāśivendrāya || 12||

निजगुरुपरमशिवेन्द्रश्लाघितविज्ञानकाष्ठाय ।निजतत्त्वनिश्चलहृदे प्रणतिं कुर्मः सदाशिवेन्द्राय ॥ १३॥

nijaguruparamaśivendraślāghitavijñānakāṣṭhāya |nijatattvaniścalahṛde praṇatiṃ kurmaḥ sadāśivendrāya || 13||

प्रविलाप्य जगदशेषं परिशिष्टाखण्डवस्तुनिरताय ।आस्यप्राप्तान्नभुजे प्रणतिं कुर्मः सदाशिवेद्राय ॥ १४॥

pravilāpya jagadaśeṣaṃ pariśiṣṭākhaṇḍavastuniratāya |āsyaprāptānnabhuje praṇatiṃ kurmaḥ sadāśivedrāya || 14||

उपधानीकृतबाहुः परिरब्धविरक्तिरामो यः ।वसनीकृतखायास्मै प्रणतिं कुर्मः सदाशिवेन्द्राय ॥ १५॥

upadhānīkṛtabāhuḥ parirabdhaviraktirāmo yaḥ |vasanīkṛtakhāyāsmai praṇatiṃ kurmaḥ sadāśivendrāya || 15||

सकलागमान्तसारप्रकटनदक्षाय नम्रपक्षाय ।सच्चित्सुखरूपाय प्रणतिं कुर्मः सदाशिवेन्द्राय ॥ १६॥

sakalāgamāntasāraprakaṭanadakṣāya namrapakṣāya |saccitsukharūpāya praṇatiṃ kurmaḥ sadāśivendrāya || 16||

द्राक्षाशिक्षणचतुरव्याहाराय प्रभूतकरुणाय ।वीक्षापावितजगते प्रणतिं कुर्मः सदाशिवेन्द्राय ॥ १७॥

drākṣāśikṣaṇacaturavyāhārāya prabhūtakaruṇāya |vīkṣāpāvitajagate praṇatiṃ kurmaḥ sadāśivendrāya || 17||

योऽनुत्पन्नविकारो बाहौ म्लेच्छेन च्छिन्नपतितेऽपि ।अविदितममतायास्मै प्रणतिं कुर्मः सदाशिवेन्द्राय ॥ १८॥

yo'nutpannavikāro bāhau mlecchena cchinnapatite'pi |aviditamamatāyāsmai praṇatiṃ kurmaḥ sadāśivendrāya || 18||

न्यपतन्सुमानि मूर्धनि येनोच्चरितेषु नामसूग्रस्य ।तस्मै सिद्धवराय प्रणतिं कुर्मः सदाशिवेन्द्राय ॥ १९॥

nyapatansumāni mūrdhani yenoccariteṣu nāmasūgrasya |tasmai siddhavarāya praṇatiṃ kurmaḥ sadāśivendrāya || 19||

यः पापिनोऽपि लोकांस्तरसा प्रकरोति पुण्यनिष्ठाग्र्यान् ।करुणाम्बुराशयेऽस्मै प्रणतिं कुर्मः सदाशिवेन्द्राय ॥ २०॥

yaḥ pāpino'pi lokāṃstarasā prakaroti puṇyaniṣṭhāgryān |karuṇāmburāśaye'smai praṇatiṃ kurmaḥ sadāśivendrāya || 20||

सिद्धेश्वराय बुद्धेः शुद्धिप्रदपादपद्मनमनाय ।बद्धौघमोचकाय प्रणतिं कुर्मः सदाशिवेन्द्राय ॥ २१॥

siddheśvarāya buddheḥ śuddhipradapādapadmanamanāya |baddhaughamocakāya praṇatiṃ kurmaḥ sadāśivendrāya || 21||

हृद्याय लोकविततेः पद्यावलिदाय जन्ममूकेभ्यः ।प्रणतेभ्यः पदयुगले प्रणतिं कुर्मः सदाशिवेन्द्राय ॥ २२॥

hṛdyāya lokavitateḥ padyāvalidāya janmamūkebhyaḥ |praṇatebhyaḥ padayugale praṇatiṃ kurmaḥ sadāśivendrāya || 22||

जिह्वोपस्थरतानप्याह्वोच्चारेण जातु नैजस्य ।कुर्वाणाय विरक्तान्प्रणतिं कुर्मः सदाशिवेन्द्राय ॥ २३॥

jihvopastharatānapyāhvoccāreṇa jātu naijasya |kurvāṇāya viraktānpraṇatiṃ kurmaḥ sadāśivendrāya || 23||

कमनीयकवनकर्त्रे शमनीयभयापहारचतुराय ।तपनीयसदृशवपुषे प्रणतिं कुर्मः सदाशिवेन्द्राय ॥ २४॥

kamanīyakavanakartre śamanīyabhayāpahāracaturāya |tapanīyasadṛśavapuṣe praṇatiṃ kurmaḥ sadāśivendrāya || 24||

तारकविद्यादात्रे तारापतिगर्ववारकास्याय ।तारजपप्रवणाय प्रणतिं कुर्मः सदाशिवेन्द्राय ॥ २५॥

tārakavidyādātre tārāpatigarvavārakāsyāya |tārajapapravaṇāya praṇatiṃ kurmaḥ sadāśivendrāya || 25||

मूकोऽपि यत्कृपा चेल्लोकोत्तरकीर्तिराशु जायेत ।अद्भुतचरितायास्मै प्रणतिं कुर्मः सदाशिवेन्द्राय ॥ २६॥

mūko'pi yatkṛpā cellokottarakīrtirāśu jāyeta |adbhutacaritāyāsmai praṇatiṃ kurmaḥ sadāśivendrāya || 26||

दुर्जनदूरायतरां सज्जनसुलभाय पात्रहस्ताय ।तरुतलनिकेतनाय प्रणतिं कुर्मः सदाशिवेन्द्राय ॥ २७॥

durjanadūrāyatarāṃ sajjanasulabhāya pātrahastāya |tarutalaniketanāya praṇatiṃ kurmaḥ sadāśivendrāya || 27||

भवसिन्धुतारयित्रे भवभक्ताय प्रणम्रवश्याय ।भवबन्धविरहिताय प्रणतिं कुर्मः सदाशिवेन्द्राय ॥ २८॥

bhavasindhutārayitre bhavabhaktāya praṇamravaśyāya |bhavabandhavirahitāya praṇatiṃ kurmaḥ sadāśivendrāya || 28||

त्रिविधस्यापि त्यागं वपुषः कर्तुं स्थलत्रये य इव ।अकरोत्समाधिमस्मै प्रणतिं कुर्मः सदाशिवेन्द्राय ॥ २९॥

trividhasyāpi tyāgaṃ vapuṣaḥ kartuṃ sthalatraye ya iva |akarotsamādhimasmai praṇatiṃ kurmaḥ sadāśivendrāya || 29||

कामिनमपि जितहृदयं क्रूरं शान्तं जडं सुधियम् ।कुरुते यत्करुणास्मै प्रणतिं कुर्मः सदाशिवेन्द्राय ॥ ३०॥

kāminamapi jitahṛdayaṃ krūraṃ śāntaṃ jaḍaṃ sudhiyam |kurute yatkaruṇāsmai praṇatiṃ kurmaḥ sadāśivendrāya || 30||

वेदस्मृतिस्थविद्वल्लक्षणलक्ष्येषु सन्दिहानानाम् ।निश्चयकृते विहर्त्रे प्रणतिं कुर्मः सदाशिवेन्द्राय ॥ ३१॥

vedasmṛtisthavidvallakṣaṇalakṣyeṣu sandihānānām |niścayakṛte vihartre praṇatiṃ kurmaḥ sadāśivendrāya || 31||

बालारुणनिभवपुषे लीलानिर्धूतकामगर्वाय ।लोलाय चिति परस्यां प्रणतिं कुर्मः सदाशिवेन्द्राय ॥ ३२॥

bālāruṇanibhavapuṣe līlānirdhūtakāmagarvāya |lolāya citi parasyāṃ praṇatiṃ kurmaḥ sadāśivendrāya || 32||

शरणीकृताय सुगुणैश्चरणीकृतरक्तपङ्कजाताय ।धरणीसदृक्क्षमाय प्रणतिं कुर्मः सदाशिवेन्द्राय ॥ ३३॥

śaraṇīkṛtāya suguṇaiścaraṇīkṛtaraktapaṅkajātāya |dharaṇīsadṛkkṣamāya praṇatiṃ kurmaḥ sadāśivendrāya || 33||

प्रणताय यतिवरेण्यैर्गणनाथेनाप्यहार्यविघ्नहृते ।गुणदासीकृतजगते प्रणतिं कुर्मः सदाशिवेन्द्राय ॥ ३४॥

praṇatāya yativareṇyairgaṇanāthenāpyahāryavighnahṛte |guṇadāsīkṛtajagate praṇatiṃ kurmaḥ sadāśivendrāya || 34||

सहमानाय सहस्राण्यप्यपराधान्प्रणम्रजनरचितान् ।सहसैव मोक्षदात्रे प्रणतिं कुर्मः सदाशिवेन्द्राय ॥ ३५॥

sahamānāya sahasrāṇyapyaparādhānpraṇamrajanaracitān |sahasaiva mokṣadātre praṇatiṃ kurmaḥ sadāśivendrāya || 35||

धृतदेहाय नतावलितूर्णप्रज्ञाप्रदानवाञ्छातः ।श्रीदक्षिणवक्त्राय प्रणतिं कुर्मः सदाशिवेन्द्राय ॥ ३६॥

dhṛtadehāya natāvalitūrṇaprajñāpradānavāñchātaḥ |śrīdakṣiṇavaktrāya praṇatiṃ kurmaḥ sadāśivendrāya || 36||

तापत्रयार्तहृदयस्तापत्रयहारदक्षनमनमहम् ।गुरुवरबोधितमहिमा शरणं यास्ये तवाङ्घ्रिकमलयुगम् ॥ ३७॥

tāpatrayārtahṛdayastāpatrayahāradakṣanamanamaham |guruvarabodhitamahimā śaraṇaṃ yāsye tavāṅghrikamalayugam || 37||

सदात्मनि विलीनहृत्सकलवेदशास्त्रार्थवित्सरित्तटविहारकृत्सकललोकहृत्तापहृत् ।सदाशिवपदाम्बुजप्रणतलोकलभ्य प्रभोसदाशिवयतीट् सदा मयि कृपामपारां कुरु ॥ ३८॥

sadātmani vilīnahṛtsakalavedaśāstrārthavitsarittaṭavihārakṛtsakalalokahṛttāpahṛt |sadāśivapadāmbujapraṇatalokalabhya prabhosadāśivayatīṭ sadā mayi kṛpāmapārāṃ kuru || 38||

पुरा यवनकर्तनस्रवदमन्दरक्तोऽपि यःपुनःपदसरोरुहप्रणतमेनमेनोनिधिम् ।कृपापरवशः पदं पतनवर्जितं प्रापयत्सदाशिवयतीट् स मय्यनवधिं कृपां सिञ्चतु ॥ ३९॥

purā yavanakartanasravadamandarakto'pi yaḥpunaḥpadasaroruhapraṇatamenamenonidhim |kṛpāparavaśaḥ padaṃ patanavarjitaṃ prāpayatsadāśivayatīṭ sa mayyanavadhiṃ kṛpāṃ siñcatu || 39||

हृषीकहृतचेतसि प्रहृतदेहके रोगकैरनेकवृजिनालये शमदमादिगन्धोज्झिते ।तवाङ्घ्रिपतिते यतौ यतिपते महायोगिराट्सदाशिव कृपां मयि प्रकुरु हेतुशून्यां द्रुतम् ॥ ४०॥

hṛṣīkahṛtacetasi prahṛtadehake rogakairanekavṛjinālaye śamadamādigandhojjhite |tavāṅghripatite yatau yatipate mahāyogirāṭsadāśiva kṛpāṃ mayi prakuru hetuśūnyāṃ drutam || 40||

न चाहमतिचातुरीरचितशब्दसङ्घैः स्तुतिंविधातुमपि च क्षमो न च जपादिकेऽप्यस्ति मे ।बलं बलवतां वर प्रकुरु हेतुशून्यां विभोसदाशिव कृपां मयि प्रवर योगिनां सत्वरम् ॥ ४१॥

na cāhamaticāturīracitaśabdasaṅghaiḥ stutiṃvidhātumapi ca kṣamo na ca japādike'pyasti me |balaṃ balavatāṃ vara prakuru hetuśūnyāṃ vibhosadāśiva kṛpāṃ mayi pravara yogināṃ satvaram || 41||

शब्दार्थविज्ञानयुता हि लोके वसन्ति लोका बहवः प्रकामम् ।निष्ठायुता न श्रुतदृष्टपूर्वा विना भवन्तं यतिराज नूनम् ॥ ४२॥

śabdārthavijñānayutā hi loke vasanti lokā bahavaḥ prakāmam |niṣṭhāyutā na śrutadṛṣṭapūrvā vinā bhavantaṃ yatirāja nūnam || 42||

स्तोकार्चनप्रीतहृदम्बुजाय पाकाब्जचूडापररूपधर्त्रे ।शोकापहर्त्रे तरसा नतानां पाकाय पुण्यस्य नमो यतीशे ॥ ४३॥

stokārcanaprītahṛdambujāya pākābjacūḍāpararūpadhartre |śokāpahartre tarasā natānāṃ pākāya puṇyasya namo yatīśe || 43||

नाहं हृषीकाणि विजेतुमीशो नाहं सपर्याभजनादि कर्तुम् ।निसर्गया त्वं दययैव पाहि सदाशिवेमं करुणापयोधे ॥ ४४॥

nāhaṃ hṛṣīkāṇi vijetumīśo nāhaṃ saparyābhajanādi kartum |nisargayā tvaṃ dayayaiva pāhi sadāśivemaṃ karuṇāpayodhe || 44||

कृतयानया नतावलिकोटिगतेनातिमन्दबोधेन ।मुदमेहि नित्यतृप्तप्रवर स्तुत्या सदाशिवाश्वाशु ॥ ४५॥

kṛtayānayā natāvalikoṭigatenātimandabodhena |mudamehi nityatṛptapravara stutyā sadāśivāśvāśu || 45||

इति शृङ्गेरि श्रीजगद्गुरु श्रीसच्चिदानन्दशिवाभिनवनृसिंहभारतीस्वामिभिः विरचितः श्रीसदाशिवेन्द्रस्तवः सम्पूर्णः ।

iti śṛṅgeri śrījagadguru śrīsaccidānandaśivābhinavanṛsiṃhabhāratīsvāmibhiḥ viracitaḥ śrīsadāśivendrastavaḥ sampūrṇaḥ |