यतिराजमङ्गलम् Shri Bhagavadacharyavirachitam Yatirajamangalam

पुण्यसद्यात्मजाय श्रीधन्यकन्याङ्कभूश्रिये ।राघवानन्दपुण्यश्रीभूषारत्नाय मङ्गलम् ॥ १॥

puṇyasadyātmajāya śrīdhanyakanyāṅkabhūśriye |rāghavānandapuṇyaśrībhūṣāratnāya maṅgalam || 1||

रामसीताञ्जनासूनुब्रह्मादिपरिरक्षिताम् ।श्रीसम्प्रदायसम्भूतिं वर्द्धयित्रेऽस्तु मङ्गलम् ॥ २॥

rāmasītāñjanāsūnubrahmādiparirakṣitām |śrīsampradāyasambhūtiṃ varddhayitre'stu maṅgalam || 2||

राममन्त्रमहाराजराज्यजीवातुरक्षिणे ।सर्वतन्त्रस्वतन्त्राय रामानन्दाय मङ्गलम् ॥ ३॥

rāmamantramahārājarājyajīvāturakṣiṇe |sarvatantrasvatantrāya rāmānandāya maṅgalam || 3||

सर्ववेदार्थसत्तत्त्वसत्त्वसद्रत्नराशये ।जगदानन्दनानन्दभाष्यकराय मङ्गलम् ॥ ४॥

sarvavedārthasattattvasattvasadratnarāśaye |jagadānandanānandabhāṣyakarāya maṅgalam || 4||

त्रिलोकीनाथताद्योति स्वात्मज्योतिः प्रकाशकम् ।त्रिदण्डं दधते यमिभूसार्वभौमाय मङ्गलम् ॥ ५॥

trilokīnāthatādyoti svātmajyotiḥ prakāśakam |tridaṇḍaṃ dadhate yamibhūsārvabhaumāya maṅgalam || 5||

कषायाभावसंसूचिकाषायाम्बरधारिणे ।श्रीमते यतिराजाय रामानन्दाय मङ्गलम् ॥ ६॥

kaṣāyābhāvasaṃsūcikāṣāyāmbaradhāriṇe |śrīmate yatirājāya rāmānandāya maṅgalam || 6||

उपदेशसुधावर्षिवचनारचनाश्रिया ।मङ्गलं दिशते नित्यं जीवजाताय मङ्गलम् ॥ ७॥

upadeśasudhāvarṣivacanāracanāśriyā |maṅgalaṃ diśate nityaṃ jīvajātāya maṅgalam || 7||

जगत्सन्त्राससन्त्रस्तजीवोद्धाराध्वकारिणे ।दिव्यसम्पत्तिसंशोभिमानसायास्तु मङ्गलम् ॥ ८॥

jagatsantrāsasantrastajīvoddhārādhvakāriṇe |divyasampattisaṃśobhimānasāyāstu maṅgalam || 8||

सर्वजीवमहामोहिमायाकायाभिभूतये ।सर्वशक्तिप्रदाय श्रीरामानन्दाय मङ्गलम् ॥ ९॥

sarvajīvamahāmohimāyākāyābhibhūtaye |sarvaśaktipradāya śrīrāmānandāya maṅgalam || 9||

विद्यामहीमहीपायाविद्यासन्तमसच्छिदे ।धर्मरूपाय भूपाय धर्मभूमेश्च मङ्गलम् ॥ १०॥

vidyāmahīmahīpāyāvidyāsantamasacchide |dharmarūpāya bhūpāya dharmabhūmeśca maṅgalam || 10||

इति त्रिवेदोपाह्नब्रह्मचारिश्रीभगवदाचार्यविरचितं यतिराजमङ्गलं समाप्तम् ।

iti trivedopāhnabrahmacāriśrībhagavadācāryaviracitaṃ yatirājamaṅgalaṃ samāptam |