गणेशस्तुतिः प्रजापतिकृता विघ्ननाथस्तोत्रम् Shri Ganesha Stuti Prajapatikrita

॥ श्रीगणेशाय नमः ॥प्रजापतय ऊचुः ।नमस्ते विघ्ननाथाय नमस्ते सर्वसाक्षिणे ।सर्वात्मने स्वसंवेद्यरूपिणे ते नमो नमः ॥ ६॥

|| śrīgaṇeśāya namaḥ ||prajāpataya ūcuḥ |namaste vighnanāthāya namaste sarvasākṣiṇe |sarvātmane svasaṃvedyarūpiṇe te namo namaḥ || 6||

योगाय जगतां पात्रे ब्रह्मदात्रे नमो नमः ।योगिनां गम्यरूपाय शान्तियोगप्रदाय ते ॥ ७॥

yogāya jagatāṃ pātre brahmadātre namo namaḥ |yogināṃ gamyarūpāya śāntiyogapradāya te || 7||

स्रष्ट्रे पात्रे च संहर्त्रे नानारूपधराय ते ।अव्यक्ताय व्यक्तकाय व्यक्ताव्यक्ताय ते नमः ॥ ८॥

sraṣṭre pātre ca saṃhartre nānārūpadharāya te |avyaktāya vyaktakāya vyaktāvyaktāya te namaḥ || 8||

ब्रह्मणे विष्णवे चैव शङ्कराय च भानवे ।शक्तये चन्द्ररूपाय यमाय च नमो नमः ॥ ९॥

brahmaṇe viṣṇave caiva śaṅkarāya ca bhānave |śaktaye candrarūpāya yamāya ca namo namaḥ || 9||

अग्नये नैरृतायैव वारुणाय च वायवे ।कुबेराय च रुद्राय शेषाय च नमो नमः ॥ १०॥

agnaye nairṛtāyaiva vāruṇāya ca vāyave |kuberāya ca rudrāya śeṣāya ca namo namaḥ || 10||

ग्रहनक्षत्ररूपाय सिद्धसाध्यमयाय च ।पशवे नररूपाय वृक्षाकाराय ते नमः ॥ ११॥

grahanakṣatrarūpāya siddhasādhyamayāya ca |paśave nararūpāya vṛkṣākārāya te namaḥ || 11||

पर्वताय समुद्राय नदीनदसुरूपिणे ।दैत्याय दैत्यनाथाय राक्षसाय नमो नमः ॥ १२॥

parvatāya samudrāya nadīnadasurūpiṇe |daityāya daityanāthāya rākṣasāya namo namaḥ || 12||

अन्नाय फलरूपाय रसरूपाय ते नमः ।पञ्चभूतमयायैव सर्वाकाराय ते नमः ॥ १३॥

annāya phalarūpāya rasarūpāya te namaḥ |pañcabhūtamayāyaiva sarvākārāya te namaḥ || 13||

चिद्रूपाय च बोधाय विदेहाय नमो नमः ।असत्याय च सत्याय समरूपाय साधये ॥ १४॥

cidrūpāya ca bodhāya videhāya namo namaḥ |asatyāya ca satyāya samarūpāya sādhaye || 14||

स्वानन्दाय ह्ययोगाय योगाय गणधारिणे ।गणेशाय नमस्तुभ्यं सर्वशान्तिप्रदाय च ॥ १५॥

svānandāya hyayogāya yogāya gaṇadhāriṇe |gaṇeśāya namastubhyaṃ sarvaśāntipradāya ca || 15||

चिन्तामणिं त्वां कः स्तोतुं समर्थः स्यात्प्रकाशकम् ।चित्तस्य चित्तवृत्तीनामतस्त्वां प्रणमामहे ॥ १६॥

cintāmaṇiṃ tvāṃ kaḥ stotuṃ samarthaḥ syātprakāśakam |cittasya cittavṛttīnāmatastvāṃ praṇamāmahe || 16||

(फलश्रुतिः)मुद्गल उवाच ।एवं स्तुत्वा गणेशं तं प्रणतास्ते प्रजापते ।तानुवाच गणाधीशो वृणुध्वं विविधान् वरान् ॥ १७॥

(phalaśrutiḥ)mudgala uvāca |evaṃ stutvā gaṇeśaṃ taṃ praṇatāste prajāpate |tānuvāca gaṇādhīśo vṛṇudhvaṃ vividhān varān || 17||

भवद्भिर्यत् कृतं स्तोत्रं मम मान्यं भविष्यति ।यः पठिष्यति भावेन श्रोष्यते सर्वसिद्धिदम् ॥ १८॥

bhavadbhiryat kṛtaṃ stotraṃ mama mānyaṃ bhaviṣyati |yaḥ paṭhiṣyati bhāvena śroṣyate sarvasiddhidam || 18||

पुत्रपौत्रकलत्रादिप्रदं तेभ्यो भविष्यति ।वन्ध्यदोषहरं धान्यधनदं पशुदं परम् ॥ १९॥

putrapautrakalatrādipradaṃ tebhyo bhaviṣyati |vandhyadoṣaharaṃ dhānyadhanadaṃ paśudaṃ param || 19||

भुक्तिमुक्तिप्रदं स्तोत्रं ब्रह्मभूयकरम्भवेत् ।मनईप्सितदं पुण्यं नराणां नात्र संशयः ॥ २०॥

bhuktimuktipradaṃ stotraṃ brahmabhūyakarambhavet |manaīpsitadaṃ puṇyaṃ narāṇāṃ nātra saṃśayaḥ || 20||

गणेशवचनं श्रुत्वा त एवं हर्षसंयुताः ।तं प्रणम्य महाभक्त्या ऊचुः प्राञ्जलयोऽभवन् ॥ २१॥

gaṇeśavacanaṃ śrutvā ta evaṃ harṣasaṃyutāḥ |taṃ praṇamya mahābhaktyā ūcuḥ prāñjalayo'bhavan || 21||

त ऊचुः ।यदि प्रसन्नतां यातस्तदा देहि गजानन ।त्वदीयामचलां भक्तिं यया मोहो विनश्यति ॥ २२॥

ta ūcuḥ |yadi prasannatāṃ yātastadā dehi gajānana |tvadīyāmacalāṃ bhaktiṃ yayā moho vinaśyati || 22||

सामर्थ्यमतुलं सृष्टेर्देहि नो विघ्ननायक ।यद्यदिच्छामहे ढुण्ढे तत्तत् सिध्यतु सर्वदा ॥ २३॥

sāmarthyamatulaṃ sṛṣṭerdehi no vighnanāyaka |yadyadicchāmahe ḍhuṇḍhe tattat sidhyatu sarvadā || 23||

ओमित्युक्त्वा गणाधीशोन्तर्धानं प्रचकार वै ।तेऽपि तं मनसा ध्यात्वा ययुः स्वस्वपदं ततः ॥ २४॥

omityuktvā gaṇādhīśontardhānaṃ pracakāra vai |te'pi taṃ manasā dhyātvā yayuḥ svasvapadaṃ tataḥ || 24||

इति प्रजापतिकृता श्रीगणेशस्तुतिः सम्पूर्णा ॥एकादशस्तोत्रंविघ्ननाथस्तोत्रम्॥ मुद्गलपुराणं द्वितीयः खण्डः । अध्यायः ५ । २\।५ ६२४॥– ॥ मुद्गलपुराणं द्वितीयः खण्डः । अध्यायः ५ । २।५ ६-२४॥

iti prajāpatikṛtā śrīgaṇeśastutiḥ sampūrṇā ||ekādaśastotraṃvighnanāthastotram|| mudgalapurāṇaṃ dvitīyaḥ khaṇḍaḥ | adhyāyaḥ 5 | 2\|5 624||– || mudgalapurāṇaṃ dvitīyaḥ khaṇḍaḥ | adhyāyaḥ 5 | 2|5 6-24||