गणेशबाह्यपूजा गृत्समदकृता Shri Ganesha Bahyapuja

श्रीगणेशाय नमः ॥ऐल उवाच ॥बाह्यपूजां वद विभो! गृत्समदप्रकीर्तिताम् ।येन मार्गेण विघ्नेशं भजिष्यसि निरन्तरम् ॥ १॥

śrīgaṇeśāya namaḥ ||aila uvāca ||bāhyapūjāṃ vada vibho! gṛtsamadaprakīrtitām |yena mārgeṇa vighneśaṃ bhajiṣyasi nirantaram || 1||

गार्ग्य उवाच ॥आदौ च मानसीं पूजां कृत्वा गृत्समदो मुनिः ।बाह्यां चकार विधिवत्तां शृणुष्व सुखप्रदाम् ॥ २॥

gārgya uvāca ||ādau ca mānasīṃ pūjāṃ kṛtvā gṛtsamado muniḥ |bāhyāṃ cakāra vidhivattāṃ śṛṇuṣva sukhapradām || 2||

हृदि ध्यात्त्वा गणेशानं परिवारादिसंयुतम् ।नासिकारन्ध्रमार्गेण तं बाह्यांग चकार ह ॥ ३॥

hṛdi dhyāttvā gaṇeśānaṃ parivārādisaṃyutam |nāsikārandhramārgeṇa taṃ bāhyāṃga cakāra ha || 3||

आदौ वैदिकमन्त्रं स गणानां त्वेति सम्पठन् ।पश्चाच्छ्लोक समुच्चार्य पूजयामास विघ्नपम् ॥ ४॥

ādau vaidikamantraṃ sa gaṇānāṃ tveti sampaṭhan |paścācchloka samuccārya pūjayāmāsa vighnapam || 4||

गृत्समद उवाच ॥चतुर्बाहुं त्रिनेत्रं च गजास्यं रक्त वर्णकम् ।पाशांकुशादिसंयुक्तं मायायुक्त प्रचिन्तयेत् ॥ ५॥

gṛtsamada uvāca ||caturbāhuṃ trinetraṃ ca gajāsyaṃ rakta varṇakam |pāśāṃkuśādisaṃyuktaṃ māyāyukta pracintayet || 5||

आगच्छ ब्रह्मणां नाथ सुराऽसुरवरार्चित ।सिद्धिबुद्ध्यादिसंयुक्त! भक्तिग्रहणलालस!॥ ६॥

āgaccha brahmaṇāṃ nātha surā'suravarārcita |siddhibuddhyādisaṃyukta! bhaktigrahaṇalālasa!|| 6||

कृतार्थोऽहं कृतार्थोऽहं तवागमनतः प्रभो ।विघ्नेशाऽनुगृहीतोऽहं सफलो मे भवोऽभवत् ॥ ७॥

kṛtārtho'haṃ kṛtārtho'haṃ tavāgamanataḥ prabho |vighneśā'nugṛhīto'haṃ saphalo me bhavo'bhavat || 7||

रत्नसिंहासनं स्वामिन् गृहाण गणनायक ।तत्रोपविश्य विघ्नेश रक्ष भक्तान् विशेषतः ॥ ८॥

ratnasiṃhāsanaṃ svāmin gṛhāṇa gaṇanāyaka |tatropaviśya vighneśa rakṣa bhaktān viśeṣataḥ || 8||

सुवासिताभिरद्भिश्च पादप्रक्षालनं प्रभो!।शीतोष्णाम्भः करोमि ते गृहाण पाद्यमुत्तमम् ॥ ९॥

suvāsitābhiradbhiśca pādaprakṣālanaṃ prabho!|śītoṣṇāmbhaḥ karomi te gṛhāṇa pādyamuttamam || 9||

सर्वतीर्थाहृतं तोयं सुवासितं सुवस्तुभिः ।आचमनं च तेनैव कुरूष्व गणनायक ॥ १०॥

sarvatīrthāhṛtaṃ toyaṃ suvāsitaṃ suvastubhiḥ |ācamanaṃ ca tenaiva kurūṣva gaṇanāyaka || 10||

रत्नप्रवालमुक्ताद्यैरनर्ध्यैः संस्कृतं प्रभो ।अर्ध्यं गृहाण हेरम्ब द्विरदानन तोषकम् ॥ ११॥

ratnapravālamuktādyairanardhyaiḥ saṃskṛtaṃ prabho |ardhyaṃ gṛhāṇa heramba dviradānana toṣakam || 11||

दधिमधुघृतैर्युक्तं मधुपर्कं गजानन ।गृहाण भावसंयुक्तं मया दत्तं नमोऽस्तु ते ॥ १२॥

dadhimadhughṛtairyuktaṃ madhuparkaṃ gajānana |gṛhāṇa bhāvasaṃyuktaṃ mayā dattaṃ namo'stu te || 12||

पाद्ये च मधुपर्के च स्नाने वस्त्रोपधारणे ।उपवीते भोजनान्ते पुनराचमनं कुरू ॥ १३॥

pādye ca madhuparke ca snāne vastropadhāraṇe |upavīte bhojanānte punarācamanaṃ kurū || 13||

चम्पकाद्यैर्गणाध्यक्ष वासितं तैलमुत्तमम् ।अभ्यंगं कुरू सर्वेश! लम्बोदर! नमोऽस्तु ते ॥ १४॥

campakādyairgaṇādhyakṣa vāsitaṃ tailamuttamam |abhyaṃgaṃ kurū sarveśa! lambodara! namo'stu te || 14||

यक्षकर्दमकाद्यैश्च विघ्नेश भक्तवत्सल!।उद्वर्तनं कुरुष्व त्वं मया दत्तैर्महाप्रभो ॥ १५॥

yakṣakardamakādyaiśca vighneśa bhaktavatsala!|udvartanaṃ kuruṣva tvaṃ mayā dattairmahāprabho || 15||

नानातीर्थजलैर्ढुण्ढे! सुखोष्णभावरूपकैः ।कमण्डलूद्भवैः स्नानं कुरू ढुण्ढे समर्पितैः ॥ १६॥

nānātīrthajalairḍhuṇḍhe! sukhoṣṇabhāvarūpakaiḥ |kamaṇḍalūdbhavaiḥ snānaṃ kurū ḍhuṇḍhe samarpitaiḥ || 16||

कामधेनु समद्भूतं पयः परमपावनम् ।तेन स्नानं कुरुष्व त्वं हेरंब परमार्थवित् ॥ १७॥

kāmadhenu samadbhūtaṃ payaḥ paramapāvanam |tena snānaṃ kuruṣva tvaṃ heraṃba paramārthavit || 17||

पंचामृतानां मध्ये तु जलैः स्नानं पुनः पुनः ।कुरु त्वं सर्वतीर्थेभ्यो गंगादिभ्यः समाहृतैः ॥ १८॥

paṃcāmṛtānāṃ madhye tu jalaiḥ snānaṃ punaḥ punaḥ |kuru tvaṃ sarvatīrthebhyo gaṃgādibhyaḥ samāhṛtaiḥ || 18||

दधि धेनुपयोद्भूतं मलापहरणं परम् ।गृहाण स्नानकार्यार्थं विनायक दयानिधे ॥ १९॥

dadhi dhenupayodbhūtaṃ malāpaharaṇaṃ param |gṛhāṇa snānakāryārthaṃ vināyaka dayānidhe || 19||

धेनुदुग्धोद्भवं ढुण्ढे घृतं सन्तोषकारकम् ।महामलापघातार्थं तेन स्नानं कुरू प्रभो ॥ २०॥

dhenudugdhodbhavaṃ ḍhuṇḍhe ghṛtaṃ santoṣakārakam |mahāmalāpaghātārthaṃ tena snānaṃ kurū prabho || 20||

सारघं सस्कृतं पूर्णं मधु मधुरसोद्भवम् ।गृहाण स्नानकार्यार्थं विनायक नमोऽस्तु ते ॥ २१॥

sāraghaṃ saskṛtaṃ pūrṇaṃ madhu madhurasodbhavam |gṛhāṇa snānakāryārthaṃ vināyaka namo'stu te || 21||

इक्षुदण्डसमुद्भूतां शर्करां मलनाशिनीम् ।गृहाण गणनाथ त्वं तया स्नानं समाचर ॥ २२॥

ikṣudaṇḍasamudbhūtāṃ śarkarāṃ malanāśinīm |gṛhāṇa gaṇanātha tvaṃ tayā snānaṃ samācara || 22||

यक्षकर्दमकाद्यैश्च स्नानं कुरू गणेश्वर ।अन्त्यं मलहरं शुद्धं सर्वसौगन्ध्यकारकम् ॥ २३॥

yakṣakardamakādyaiśca snānaṃ kurū gaṇeśvara |antyaṃ malaharaṃ śuddhaṃ sarvasaugandhyakārakam || 23||

ततो गन्धाक्षतादींश्च दूर्वांकुरान् गजानन ।समर्पयामि स्वल्पांस्त्वं गृहाण परमेश्वर ॥ २४॥

tato gandhākṣatādīṃśca dūrvāṃkurān gajānana |samarpayāmi svalpāṃstvaṃ gṛhāṇa parameśvara || 24||

ब्रह्मणस्पत्यसूक्तैश्च ह्येकविंशतिवारकैः ।अभिषेकं करोमि ते गृहाण द्विरदानन ॥ २५॥

brahmaṇaspatyasūktaiśca hyekaviṃśativārakaiḥ |abhiṣekaṃ karomi te gṛhāṇa dviradānana || 25||

तत आचमनं देव सुवासितजलेन च ।कुरुष्व गणनाथ त्वं सर्वतीर्थभवेन वै ॥ २६॥

tata ācamanaṃ deva suvāsitajalena ca |kuruṣva gaṇanātha tvaṃ sarvatīrthabhavena vai || 26||

वस्त्रयुग्मं गृहाण त्वमनर्घ्यं रक्तवर्णकम् ।लोकलज्जाहरं चैव विघ्ननाथ नमोऽस्तु ते ॥ २७॥

vastrayugmaṃ gṛhāṇa tvamanarghyaṃ raktavarṇakam |lokalajjāharaṃ caiva vighnanātha namo'stu te || 27||

उत्तरीयं सुचित्रं वै नभस्तारांकितं यथा ।गृहाण सर्वसिद्धीश मया दत्तं सुभक्तितः ॥ २८॥

uttarīyaṃ sucitraṃ vai nabhastārāṃkitaṃ yathā |gṛhāṇa sarvasiddhīśa mayā dattaṃ subhaktitaḥ || 28||

उपवीतं गणाध्यक्ष गृहाण च ततः परम् ।त्रैगुण्यमयरूपं तु प्रणवग्रन्थिबन्धनम् ॥ २९॥

upavītaṃ gaṇādhyakṣa gṛhāṇa ca tataḥ param |traiguṇyamayarūpaṃ tu praṇavagranthibandhanam || 29||

ततः सिन्दूरकं देव गृहाण गणनायक ।अंगलेपनभावार्थं सदानन्दविवर्धनम् ॥ ३०॥

tataḥ sindūrakaṃ deva gṛhāṇa gaṇanāyaka |aṃgalepanabhāvārthaṃ sadānandavivardhanam || 30||

नानाभूषणकानि त्वमंगेषु विविधेषु च ।भासुरस्वर्णरत्नैश्च निर्मितानि गृहाण भो ॥ ३१॥

nānābhūṣaṇakāni tvamaṃgeṣu vividheṣu ca |bhāsurasvarṇaratnaiśca nirmitāni gṛhāṇa bho || 31||

अष्टगन्धसमायुक्तं गन्धं रक्तं गजानन ।द्वादशांगेषु ते ढुण्ढे लेपयामि सुचित्रवत् ॥ ३२॥

aṣṭagandhasamāyuktaṃ gandhaṃ raktaṃ gajānana |dvādaśāṃgeṣu te ḍhuṇḍhe lepayāmi sucitravat || 32||

रक्तचन्दनसंयुक्तानथ वा कुंकुमैर्युतान् ।अक्षतान् विघ्नराज त्वं गृहाण भालमण्डले ॥ ३३॥

raktacandanasaṃyuktānatha vā kuṃkumairyutān |akṣatān vighnarāja tvaṃ gṛhāṇa bhālamaṇḍale || 33||

चम्पकादिसुवृक्षेभ्यः सम्भूतानि गजानन ।पुष्पाणि शमीमन्दारदूर्वादीनि गृहाण च ॥ ३४॥

campakādisuvṛkṣebhyaḥ sambhūtāni gajānana |puṣpāṇi śamīmandāradūrvādīni gṛhāṇa ca || 34||

दशांग गुग्गुलं धूपं सर्वसौरभकारकम् ।गृहाण त्वं मया दत्तं विनायक महोदर ॥ ३५॥

daśāṃga guggulaṃ dhūpaṃ sarvasaurabhakārakam |gṛhāṇa tvaṃ mayā dattaṃ vināyaka mahodara || 35||

नानाजातिभवं दीप गृहाण गणनायक ।अज्ञानमलजं दोषं हरन्तं ज्योतिरूपकम् ॥ ३६॥

nānājātibhavaṃ dīpa gṛhāṇa gaṇanāyaka |ajñānamalajaṃ doṣaṃ harantaṃ jyotirūpakam || 36||

चतुर्विधान्नसम्पन्नं मधुरं लड्डुकादिकम् ।नैवेद्यं ते मया दत्त भोजनं कुरू विघ्नप ॥ ३७॥

caturvidhānnasampannaṃ madhuraṃ laḍḍukādikam |naivedyaṃ te mayā datta bhojanaṃ kurū vighnapa || 37||

सुवासितं गृहाणेदं जलं तीर्थ समाहृतम् ।भुक्तिमध्ये च पानार्थं देवदेवेश ते नमः ॥ ३८॥

suvāsitaṃ gṛhāṇedaṃ jalaṃ tīrtha samāhṛtam |bhuktimadhye ca pānārthaṃ devadeveśa te namaḥ || 38||

भोजनान्ते करोद्वर्तं यक्षकर्दमकेन च ।कुरुष्व त्वं गणाध्यक्ष पिब तोयं सुवासितम् ॥ ३९॥

bhojanānte karodvartaṃ yakṣakardamakena ca |kuruṣva tvaṃ gaṇādhyakṣa piba toyaṃ suvāsitam || 39||

दाडिमं खर्जुरं द्राक्षां रम्भादीनि फलानि वै ।गृहाण देवदेवेश नानामधुरकाणि तु ॥ ४०॥

dāḍimaṃ kharjuraṃ drākṣāṃ rambhādīni phalāni vai |gṛhāṇa devadeveśa nānāmadhurakāṇi tu || 40||

अष्टांग देव ताम्बूलं गृहाण मुखवासनम् ।असकृद्विघ्नराज त्वं मया दत्तं विशेषतः ॥ ४१॥

aṣṭāṃga deva tāmbūlaṃ gṛhāṇa mukhavāsanam |asakṛdvighnarāja tvaṃ mayā dattaṃ viśeṣataḥ || 41||

दक्षिणां कांचनाद्यां तु नानाधातुसमुद्भवाम् ।रत्नाद्यैः संयुतां ढुंढे गृहाण सकलप्रिय ॥ ४२॥

dakṣiṇāṃ kāṃcanādyāṃ tu nānādhātusamudbhavām |ratnādyaiḥ saṃyutāṃ ḍhuṃḍhe gṛhāṇa sakalapriya || 42||

राजोपचारकाद्यानि गृहाण गणनायक ।दानानि तु विचित्राणि मया दत्तानि विघ्नप ॥ ४३॥

rājopacārakādyāni gṛhāṇa gaṇanāyaka |dānāni tu vicitrāṇi mayā dattāni vighnapa || 43||

तत आभरणं तेऽहमर्पयामि विधानतः ।विविधैरूपचारैश्च तेन तुष्टो भव प्रभो ॥ ४४॥

tata ābharaṇaṃ te'hamarpayāmi vidhānataḥ |vividhairūpacāraiśca tena tuṣṭo bhava prabho || 44||

ततो दूर्वांकुरान् ढुंढे एकविंशतिसंख्यकान् ।गृहाण कार्यसिद्ध्यर्थं भक्तवात्सल्यकारणात् ॥ ४५॥

tato dūrvāṃkurān ḍhuṃḍhe ekaviṃśatisaṃkhyakān |gṛhāṇa kāryasiddhyarthaṃ bhaktavātsalyakāraṇāt || 45||

नानादीपसमायुक्तं नीराजनं गजानन ।गृहाण भावसंयुक्तं सर्वाज्ञानादिनाशन ॥ ४६॥

nānādīpasamāyuktaṃ nīrājanaṃ gajānana |gṛhāṇa bhāvasaṃyuktaṃ sarvājñānādināśana || 46||

गणानां त्वेति मन्त्रस्य जपं साहस्रकं परम् ।गृहाण गणनाथ त्वं सर्वसिद्धिप्रदो भव ॥ ४७॥

gaṇānāṃ tveti mantrasya japaṃ sāhasrakaṃ param |gṛhāṇa gaṇanātha tvaṃ sarvasiddhiprado bhava || 47||

आर्तिक्यं च सुकर्पूरं नानादीपमयं प्रभो ।गृहाण ज्योतिषां नाथ तथा नीराजयाम्यहम् ॥ ४८॥

ārtikyaṃ ca sukarpūraṃ nānādīpamayaṃ prabho |gṛhāṇa jyotiṣāṃ nātha tathā nīrājayāmyaham || 48||

पादयोस्ते तु चत्वारि नाभौ द्वे वदने प्रभो ।एकं तु सप्तवारं वै सर्वांगेषु निरंजनम् ॥ ४९॥

pādayoste tu catvāri nābhau dve vadane prabho |ekaṃ tu saptavāraṃ vai sarvāṃgeṣu niraṃjanam || 49||

चतुर्वेदभवैर्मन्त्रैर्गाणपत्यैर्गजानन ।मन्त्रितानि गृहाण त्वं पुष्पपत्राणि विघ्नप ॥ ५०॥

caturvedabhavairmantrairgāṇapatyairgajānana |mantritāni gṛhāṇa tvaṃ puṣpapatrāṇi vighnapa || 50||

पंचप्रकारकैः स्तोत्रैर्गाणपत्यैर्गणाधिप ।स्तौमि त्वां तेन सन्तुष्टो भव भक्तिप्रदायक ॥ ५१॥

paṃcaprakārakaiḥ stotrairgāṇapatyairgaṇādhipa |staumi tvāṃ tena santuṣṭo bhava bhaktipradāyaka || 51||

एकविंशतिसंख्यं वा त्रिसंख्यं वा गजानन ।प्रादक्षिण्यं गृहाण त्वं ब्रह्मन् ब्रह्मेशभावन ॥ ५२॥

ekaviṃśatisaṃkhyaṃ vā trisaṃkhyaṃ vā gajānana |prādakṣiṇyaṃ gṛhāṇa tvaṃ brahman brahmeśabhāvana || 52||

साष्टांगा प्रणतिं नाथ एकविंशतिसम्मिताम् ।हेरम्ब सर्वपूज्य त्वं गृहाण तु मया कृताम् ॥ ५३॥

sāṣṭāṃgā praṇatiṃ nātha ekaviṃśatisammitām |heramba sarvapūjya tvaṃ gṛhāṇa tu mayā kṛtām || 53||

न्यूनातिरिक्तभावार्थं किंचिद् दुर्वांकुरान् प्रभो ।समर्पयामि तेन त्वं सांगां पूजां कुरूष्व ताम् ॥ ५४॥

nyūnātiriktabhāvārthaṃ kiṃcid durvāṃkurān prabho |samarpayāmi tena tvaṃ sāṃgāṃ pūjāṃ kurūṣva tām || 54||

त्वया दत्तं स्वहस्तेन निर्माल्यं चिन्तयाम्यहम् ।शिखायां धारयाम्येव सदा सर्वप्रदं च तत् ॥ ५५॥

tvayā dattaṃ svahastena nirmālyaṃ cintayāmyaham |śikhāyāṃ dhārayāmyeva sadā sarvapradaṃ ca tat || 55||

अपराधानसंख्यातान् क्षमस्व गणनायक ।भक्तं कुरु च मां ढुंढे तव पादप्रियं सदा ॥ ५६॥

aparādhānasaṃkhyātān kṣamasva gaṇanāyaka |bhaktaṃ kuru ca māṃ ḍhuṃḍhe tava pādapriyaṃ sadā || 56||

त्वं माता त्वं पिता मे वै सुहृत्सम्बन्धिकादयः ।त्वमेव कुलदेवश्च सर्वं त्वं मे न संशयः ॥ ५७॥

tvaṃ mātā tvaṃ pitā me vai suhṛtsambandhikādayaḥ |tvameva kuladevaśca sarvaṃ tvaṃ me na saṃśayaḥ || 57||

जाग्रत्स्वप्नसुषुप्तिभिर्देहवांग्मनसैः कृतम् ।सांसर्गिकेण यत्कर्म गणेशाय समर्पये ॥ ५८॥

jāgratsvapnasuṣuptibhirdehavāṃgmanasaiḥ kṛtam |sāṃsargikeṇa yatkarma gaṇeśāya samarpaye || 58||

ब्राह्यं नानाविधं पापं महोग्रं तल्लयं व्रजेत् ।गणेशपादतीर्थस्य मस्तके धारणात् किल ॥ ५९॥

brāhyaṃ nānāvidhaṃ pāpaṃ mahograṃ tallayaṃ vrajet |gaṇeśapādatīrthasya mastake dhāraṇāt kila || 59||

पादोदकं गणेशस्य पीतं मर्त्येण तत्क्षणात् ।सर्वांतर्गतजं पापं नश्यति गणनातिगम् ॥ ६०॥

pādodakaṃ gaṇeśasya pītaṃ martyeṇa tatkṣaṇāt |sarvāṃtargatajaṃ pāpaṃ naśyati gaṇanātigam || 60||

गणेशूच्छिष्टगन्धं वै द्वादशांगेषु चर्चयेत् ।गणेशतुल्यरूपः स दर्शनात् सर्वपापहा ॥ ६१॥

gaṇeśūcchiṣṭagandhaṃ vai dvādaśāṃgeṣu carcayet |gaṇeśatulyarūpaḥ sa darśanāt sarvapāpahā || 61||

यदि गणेशपूजादौ गन्धभस्मादिकं चरेत् ।अथवोच्छिष्टगन्धं तु नो चेत्तत्र विधिं चरेत् ॥ ६२॥

yadi gaṇeśapūjādau gandhabhasmādikaṃ caret |athavocchiṣṭagandhaṃ tu no cettatra vidhiṃ caret || 62||

द्वादशांगेषु विघ्नेशं नाममन्त्रेण चाऽर्चयेत् ।तेन सोऽपि गणेशेन समो भवति भूतले ॥ ६३॥

dvādaśāṃgeṣu vighneśaṃ nāmamantreṇa cā'rcayet |tena so'pi gaṇeśena samo bhavati bhūtale || 63||

आदौ गणेश्वरं मूर्ध्नि ललाटे विघ्ननायकम् ।दक्षिणे कर्णमूले तु वक्रतुण्डं समर्चयेत् ॥ ६४॥

ādau gaṇeśvaraṃ mūrdhni lalāṭe vighnanāyakam |dakṣiṇe karṇamūle tu vakratuṇḍaṃ samarcayet || 64||

वामे कर्णस्य मूले वै चैकदन्तं समर्चयेत् ।कण्ठे लम्बोदरं देवं हृदि चिन्तामणिं तथा ॥ ६५॥

vāme karṇasya mūle vai caikadantaṃ samarcayet |kaṇṭhe lambodaraṃ devaṃ hṛdi cintāmaṇiṃ tathā || 65||

बाहौ दक्षिणके चैव हेरंबं वामबाहुके ।विकटं नाभिदेशे तु विघ्ननाथं समर्चयेत् ॥ ६६॥

bāhau dakṣiṇake caiva heraṃbaṃ vāmabāhuke |vikaṭaṃ nābhideśe tu vighnanāthaṃ samarcayet || 66||

कुक्षौ दक्षिणगायां तु मयूरेशं समर्चयेत् ।वामकुक्षौ गजास्यं वै पृष्ठे स्वानन्दवासिनम् ॥ ६७॥

kukṣau dakṣiṇagāyāṃ tu mayūreśaṃ samarcayet |vāmakukṣau gajāsyaṃ vai pṛṣṭhe svānandavāsinam || 67||

सर्वांगलेपनं शस्तं चित्रितं चाऽष्टगन्धकैः ।गाणेशानां विशेषेण सर्वभद्रस्य कारणात् ॥ ६८॥

sarvāṃgalepanaṃ śastaṃ citritaṃ cā'ṣṭagandhakaiḥ |gāṇeśānāṃ viśeṣeṇa sarvabhadrasya kāraṇāt || 68||

ततोच्छिष्टं तु नैवेद्यं गणेशस्य भुनज्म्यहम् ।भुक्तिमुक्तिप्रदं पूर्णं नानापापनिकृन्तनम् ॥ ६९॥

tatocchiṣṭaṃ tu naivedyaṃ gaṇeśasya bhunajmyaham |bhuktimuktipradaṃ pūrṇaṃ nānāpāpanikṛntanam || 69||

गणेशस्मरणेनैव करोमि कालखण्डनम् ।गाणपत्यैश्च संवासः सदाऽस्तु मे गजानन ॥ ७०॥

gaṇeśasmaraṇenaiva karomi kālakhaṇḍanam |gāṇapatyaiśca saṃvāsaḥ sadā'stu me gajānana || 70||

गार्ग्य उवाच ॥एवं गृत्समदश्चैव चकार बाह्यपूजनम् ।त्रिकालेषु महायोगी सदा भक्तिसमन्वितः ॥ ७१॥

gārgya uvāca ||evaṃ gṛtsamadaścaiva cakāra bāhyapūjanam |trikāleṣu mahāyogī sadā bhaktisamanvitaḥ || 71||

तथा कुरु महीपाल गाणपत्यो भविष्यसि ।तथा गृत्समदः साक्षात्तथा त्वमपि निश्चितम् ॥ ७२॥

tathā kuru mahīpāla gāṇapatyo bhaviṣyasi |tathā gṛtsamadaḥ sākṣāttathā tvamapi niścitam || 72||

इति श्रीमदान्त्ये मुद्गलपुराणे गृत्समदकृता गणेशबाह्यपूजा समाप्ता ॥॥ मुद्गलपुराणं पञ्चमः खण्डः । अध्यायः ३९ । ५\।३९। ५७२॥– ॥ मुद्गलपुराणं पञ्चमः खण्डः । अध्यायः ३९ । ५।३९। ५-७२॥

iti śrīmadāntye mudgalapurāṇe gṛtsamadakṛtā gaṇeśabāhyapūjā samāptā |||| mudgalapurāṇaṃ pañcamaḥ khaṇḍaḥ | adhyāyaḥ 39 | 5\|39| 572||– || mudgalapurāṇaṃ pañcamaḥ khaṇḍaḥ | adhyāyaḥ 39 | 5|39| 5-72||