लम्बोदरस्तुतिः देवर्षिभिः प्रोक्ता Lambodara Stuti by Devarshi

श्रीगणेशाय नमः ॥ब्रह्मोवाचएवं क्रोधासुरं शान्तं दृष्ट्वा देवर्षयोऽमलाः ।हर्षयुक्ता विशेषेण पुपूजुर्गणनायकम् ॥ १॥

śrīgaṇeśāya namaḥ ||brahmovācaevaṃ krodhāsuraṃ śāntaṃ dṛṣṭvā devarṣayo'malāḥ |harṣayuktā viśeṣeṇa pupūjurgaṇanāyakam || 1||

पूजयित्वा विधानेन नेमुर्लम्बोदरं पुनः ।ततस्तं तुष्टुवुः सर्वे भक्ति नम्रात्मकन्धराः ॥ २॥

pūjayitvā vidhānena nemurlambodaraṃ punaḥ |tatastaṃ tuṣṭuvuḥ sarve bhakti namrātmakandharāḥ || 2||

देवर्षय ऊचुःश्रेष्ठं प्रधानं सकलादिभूतं सर्वान्तगं पूर्णमनन्तभावम् ।नित्यं निजात्मानमचिन्त्यसंस्थं लम्बोदरं तं च वयं नताः स्मः ॥ ३॥

devarṣaya ūcuḥśreṣṭhaṃ pradhānaṃ sakalādibhūtaṃ sarvāntagaṃ pūrṇamanantabhāvam |nityaṃ nijātmānamacintyasaṃsthaṃ lambodaraṃ taṃ ca vayaṃ natāḥ smaḥ || 3||

बोधेन हीनं स्वसुखे निमग्नं बीजात्मकं साङ्ख्यमनन्तवेद्यम् ।वैदेहयोगेन च लभ्यमेवं लम्बोदरं तं च वयं नताः स्मः ॥ ४॥

bodhena hīnaṃ svasukhe nimagnaṃ bījātmakaṃ sāṅkhyamanantavedyam |vaidehayogena ca labhyamevaṃ lambodaraṃ taṃ ca vayaṃ natāḥ smaḥ || 4||

जीवं परानन्दमयं परेशं बोधस्वरूपं प्रकृतेर्लयस्थम् ।देहैर्विहीनं च तदात्महीनं लम्बोदरं तं च वयं नताः स्मः ॥ ५॥

jīvaṃ parānandamayaṃ pareśaṃ bodhasvarūpaṃ prakṛterlayastham |dehairvihīnaṃ ca tadātmahīnaṃ lambodaraṃ taṃ ca vayaṃ natāḥ smaḥ || 5||

सोऽहं सदा भेदविवर्जितं वै देहात्मयोगं सकलावभासम् ।नित्यं पुराणं पुरुषं गणेशं लम्बोदरं तं च वयं नताः स्मः ॥ ६॥

so'haṃ sadā bhedavivarjitaṃ vai dehātmayogaṃ sakalāvabhāsam |nityaṃ purāṇaṃ puruṣaṃ gaṇeśaṃ lambodaraṃ taṃ ca vayaṃ natāḥ smaḥ || 6||

बिन्दुस्वरूपं मनसाऽथ गम्यं पादैर्विहीनं च चतुष्पदं यम् ।नानात्मभेदाश्रितमेकदन्तं लम्बोदरं तं च वयं नताः स्मः ॥ ७॥

bindusvarūpaṃ manasā'tha gamyaṃ pādairvihīnaṃ ca catuṣpadaṃ yam |nānātmabhedāśritamekadantaṃ lambodaraṃ taṃ ca vayaṃ natāḥ smaḥ || 7||

नादस्वरूपं च गुणेशमेकं सर्वत्र चक्षुःश्रुतितुण्डभूतम् ।सर्वत्र हस्तोदरपादपद्मं लम्बोदरं तं च वयं नताः स्मः ॥ ८॥

nādasvarūpaṃ ca guṇeśamekaṃ sarvatra cakṣuḥśrutituṇḍabhūtam |sarvatra hastodarapādapadmaṃ lambodaraṃ taṃ ca vayaṃ natāḥ smaḥ || 8||

संस्थं सुषुप्तौ समभावदं वै द्वन्द्वज्ञमाद्यं द्विविधावभासम् ।आनन्दकन्दं तमसा विभान्तं लम्बोदरं तं च वयं नताः स्मः ॥ ९॥

saṃsthaṃ suṣuptau samabhāvadaṃ vai dvandvajñamādyaṃ dvividhāvabhāsam |ānandakandaṃ tamasā vibhāntaṃ lambodaraṃ taṃ ca vayaṃ natāḥ smaḥ || 9||

सूक्ष्मस्वरूपं च तथान्तरस्थं सर्वज्ञमाद्यं गणनायकं यम् ।विज्ञानकोशस्थविहारकारं लम्बोदरं तं च वयं नताः स्मः ॥ १०॥

sūkṣmasvarūpaṃ ca tathāntarasthaṃ sarvajñamādyaṃ gaṇanāyakaṃ yam |vijñānakośasthavihārakāraṃ lambodaraṃ taṃ ca vayaṃ natāḥ smaḥ || 10||

स्थूलस्वरूपं सकलाभिमानं श्रेष्ठं रजोयुक्तमनन्तमाद्यम् ।अन्नात्मभोगेषु विहारसिद्धं लम्बोदरं तं च वयं नताः स्मः ॥ ११॥

sthūlasvarūpaṃ sakalābhimānaṃ śreṣṭhaṃ rajoyuktamanantamādyam |annātmabhogeṣu vihārasiddhaṃ lambodaraṃ taṃ ca vayaṃ natāḥ smaḥ || 11||

अध्यात्मरूपं तमसा चरन्तं द्रव्यप्रकाशं परमार्थभूतम् ।देहेन्द्रियज्ञानमयं च ढुण्ढिं लम्बोदरं तं च वयं नताः स्मः ॥ १२॥

adhyātmarūpaṃ tamasā carantaṃ dravyaprakāśaṃ paramārthabhūtam |dehendriyajñānamayaṃ ca ḍhuṇḍhiṃ lambodaraṃ taṃ ca vayaṃ natāḥ smaḥ || 12||

नित्यं रजोदेहविकारगं वै कर्मस्वरूपं विविधेन्द्रियस्थम् ।तज्जाधिभूतात्मकमप्रमेयं लम्बोदरं तं च वयं नताः स्मः ॥ १३॥

nityaṃ rajodehavikāragaṃ vai karmasvarūpaṃ vividhendriyastham |tajjādhibhūtātmakamaprameyaṃ lambodaraṃ taṃ ca vayaṃ natāḥ smaḥ || 13||

ज्ञानस्वरूपं सकलामरस्थं सर्वेन्द्रियज्ञानकरं प्रभुं वै ।तज्जाधिदैवप्रचुरं महान्तं लम्बोदरं तं च वयं नताः स्मः ॥ १४॥

jñānasvarūpaṃ sakalāmarasthaṃ sarvendriyajñānakaraṃ prabhuṃ vai |tajjādhidaivapracuraṃ mahāntaṃ lambodaraṃ taṃ ca vayaṃ natāḥ smaḥ || 14||

आकाशरूपं सकलावभासं नादप्रपूरं सकलाभिभूतम् ।भूतैः सदा खेलकमादिनाथं लम्बोदरं तं च वयं नताः स्मः ॥ १५॥

ākāśarūpaṃ sakalāvabhāsaṃ nādaprapūraṃ sakalābhibhūtam |bhūtaiḥ sadā khelakamādināthaṃ lambodaraṃ taṃ ca vayaṃ natāḥ smaḥ || 15||

वायुस्वरूपं जगदेकचालं प्राणादिसंस्थं स्वविभागदं यम् ।देहप्रचारं दशनामभिश्च लम्बोदरं तं च वयं नताः स्मः ॥ १६॥

vāyusvarūpaṃ jagadekacālaṃ prāṇādisaṃsthaṃ svavibhāgadaṃ yam |dehapracāraṃ daśanāmabhiśca lambodaraṃ taṃ ca vayaṃ natāḥ smaḥ || 16||

तेजःस्वरूपं सकलावभासं द्वन्द्वप्रचारं जठरे सुसंस्थम् ।सन्धौ सदा व्याप्य विभागकारं लम्बोदरं तं च वयं नताः स्मः । १७जलस्वरूपं रसयुक्तमेव पुष्टिप्रदं षड्रसगं परेशम् ।नित्यार्द्रभावस्य प्रकाशदं यं लम्बोदरं तं च वयं नताः स्मः ॥ १८॥

tejaḥsvarūpaṃ sakalāvabhāsaṃ dvandvapracāraṃ jaṭhare susaṃstham |sandhau sadā vyāpya vibhāgakāraṃ lambodaraṃ taṃ ca vayaṃ natāḥ smaḥ | 17jalasvarūpaṃ rasayuktameva puṣṭipradaṃ ṣaḍrasagaṃ pareśam |nityārdrabhāvasya prakāśadaṃ yaṃ lambodaraṃ taṃ ca vayaṃ natāḥ smaḥ || 18||

पृथ्वीस्वरूपं च धराधरेशं सर्वान्नमूलं विविधौषधिस्थम् ।आकाररूपं च गजाननं वै लम्बोदरं तं च वयं नताः स्मः ॥ १९॥

pṛthvīsvarūpaṃ ca dharādhareśaṃ sarvānnamūlaṃ vividhauṣadhistham |ākārarūpaṃ ca gajānanaṃ vai lambodaraṃ taṃ ca vayaṃ natāḥ smaḥ || 19||

विराट्स्वरूपस्थमनन्तपारं सर्वत्र नेत्रं च सहस्रशीर्षम् ।सर्वत्र हस्ताननपादकादिं लम्बोदरं तं च वयं नताः स्मः ॥ २०॥

virāṭsvarūpasthamanantapāraṃ sarvatra netraṃ ca sahasraśīrṣam |sarvatra hastānanapādakādiṃ lambodaraṃ taṃ ca vayaṃ natāḥ smaḥ || 20||

रजोयुतं सृष्टिकरं द्विजेशं आदिस्वरूपं प्रपितामहं यम् ।समानभावेन सुरासुरस्थं लम्बोदरं तं च वयं नताः स्मः ॥ २१॥

rajoyutaṃ sṛṣṭikaraṃ dvijeśaṃ ādisvarūpaṃ prapitāmahaṃ yam |samānabhāvena surāsurasthaṃ lambodaraṃ taṃ ca vayaṃ natāḥ smaḥ || 21||

सत्वप्रचारं हरिरूपधारं यं तामसं शङ्करवेषसंस्थम् ।सूर्यप्रचारं जगदम्बिकागं लम्बोदरं तं च वयं नताः स्मः ॥ २२॥

satvapracāraṃ harirūpadhāraṃ yaṃ tāmasaṃ śaṅkaraveṣasaṃstham |sūryapracāraṃ jagadambikāgaṃ lambodaraṃ taṃ ca vayaṃ natāḥ smaḥ || 22||

इत्यादिभेदैः सुविराजमानं सर्वैर्विहीनं तु कथं वयं स्तुमः ।देवाः शिवाद्याश्च विकुण्ठिता वै लम्बोदरं तं च वयं नताः स्मः ॥ २३॥

ityādibhedaiḥ suvirājamānaṃ sarvairvihīnaṃ tu kathaṃ vayaṃ stumaḥ |devāḥ śivādyāśca vikuṇṭhitā vai lambodaraṃ taṃ ca vayaṃ natāḥ smaḥ || 23||

ब्रह्मोवाचस्तुत्वा देवर्षयस्त्वेवं प्रणेमुस्ते गजाननम् ।लम्बोदरस्तान् उवाच महाभागान् सुसिद्धिदः ॥ २४॥

brahmovācastutvā devarṣayastvevaṃ praṇemuste gajānanam |lambodarastān uvāca mahābhāgān susiddhidaḥ || 24||

भवत्कृतमिदं स्तोत्रं भवेन्मत्प्रीतिवर्धनम् ।पठतां शृण्वतां सद्यः सर्वसिद्धिप्रदायकम् ॥ २५॥

bhavatkṛtamidaṃ stotraṃ bhavenmatprītivardhanam |paṭhatāṃ śṛṇvatāṃ sadyaḥ sarvasiddhipradāyakam || 25||

धर्मार्थकाममोक्षाणां साधनं ब्रह्मदं परम् ।भविष्यति सदा मान्यं सर्वकार्येषु सर्वदा ॥ २६॥

dharmārthakāmamokṣāṇāṃ sādhanaṃ brahmadaṃ param |bhaviṣyati sadā mānyaṃ sarvakāryeṣu sarvadā || 26||

मारणोच्चातनादीनि स्तोत्रेणैव सुरर्षयः ।भविष्यति न सन्देहः परकृत्यविनाशनम् ॥ २७॥

māraṇoccātanādīni stotreṇaiva surarṣayaḥ |bhaviṣyati na sandehaḥ parakṛtyavināśanam || 27||

पुत्रपौत्रादिकं सर्वं लभते स्तोत्रपाठतः ।धनधान्यकलत्रादि सुखं विन्दति मानवः ॥ २८॥

putrapautrādikaṃ sarvaṃ labhate stotrapāṭhataḥ |dhanadhānyakalatrādi sukhaṃ vindati mānavaḥ || 28||

कारागृहगतं सद्यो मोचयेत् स्तोत्रपाठतः ।हृदीप्सितं लभेत् सर्वमेकविंशतिवारत ॥ २९॥

kārāgṛhagataṃ sadyo mocayet stotrapāṭhataḥ |hṛdīpsitaṃ labhet sarvamekaviṃśativārata || 29||

एकविंशतिपाठांश्च स्तोत्रस्यास्य करिष्यति ।स सद्यो हि फलं भुक्तं एकविंशद्दिनावधि ॥ ३०॥

ekaviṃśatipāṭhāṃśca stotrasyāsya kariṣyati |sa sadyo hi phalaṃ bhuktaṃ ekaviṃśaddināvadhi || 30||

प्रसन्नोऽहं प्रदास्यामि स्तोत्रेण मुनयोऽमराः ।वरं ब्रूत महाभागा यद्यपि स्यात् सुदुर्लभम् ॥ ३१॥

prasanno'haṃ pradāsyāmi stotreṇa munayo'marāḥ |varaṃ brūta mahābhāgā yadyapi syāt sudurlabham || 31||

इति देवर्षिभिर्प्रोक्ता लम्बोदरस्तुतिः समाप्ता ।॥ मुद्गलपुराणं पञ्चमः खण्डः । अध्यायः ९ । ५\।९। ३३१॥– ॥ मुद्गलपुराणं पञ्चमः खण्डः । अध्यायः ९ । ५।९। ३-३१॥

iti devarṣibhirproktā lambodarastutiḥ samāptā ||| mudgalapurāṇaṃ pañcamaḥ khaṇḍaḥ | adhyāyaḥ 9 | 5\|9| 331||– || mudgalapurāṇaṃ pañcamaḥ khaṇḍaḥ | adhyāyaḥ 9 | 5|9| 3-31||