देवीक्षमापणस्तोत्रम् Devikshamapanastotram

श्रीगणेशाय नमः ।अपराधसहस्राणि क्रियन्तेऽहर्निशं मया ।दासोऽयमिति मां मत्त्वा क्षमस्व परमेश्वरि ॥ १॥

śrīgaṇeśāya namaḥ |aparādhasahasrāṇi kriyante'harniśaṃ mayā |dāso'yamiti māṃ mattvā kṣamasva parameśvari || 1||

आवाहनं न जानामि न जानामि विसर्जनम् ।पूजां चैव न जानामि क्षम्यतां परमेश्वरि ॥ २॥

āvāhanaṃ na jānāmi na jānāmi visarjanam |pūjāṃ caiva na jānāmi kṣamyatāṃ parameśvari || 2||

मन्त्रहीनं क्रियाहीनं भक्तिहीनं सुरेश्वरि ।यत्पूजितं मया देवि परिपूर्णं तदस्तु मे ॥ ३॥

mantrahīnaṃ kriyāhīnaṃ bhaktihīnaṃ sureśvari |yatpūjitaṃ mayā devi paripūrṇaṃ tadastu me || 3||

अपराधशतं कृत्वा जगदम्बेति चोच्चरेत् ।यां गतिं समवाप्नोति न तां ब्रह्मादयः सुराः ॥ ४॥

aparādhaśataṃ kṛtvā jagadambeti coccaret |yāṃ gatiṃ samavāpnoti na tāṃ brahmādayaḥ surāḥ || 4||

सापराधोऽस्मि शरणं प्राप्तस्त्वां जगदम्बिके ।इदानीमनुकम्प्योऽहं यथेच्छसि तथा कुरु ॥ ५॥

sāparādho'smi śaraṇaṃ prāptastvāṃ jagadambike |idānīmanukampyo'haṃ yathecchasi tathā kuru || 5||

अज्ञानाद्विस्मृतेर्भ्रान्त्या यन्न्यूनमधिकं कृतम् ।तत्सर्वं क्षम्यतां देवि प्रसीद परमेश्वरि ॥ ६॥

ajñānādvismṛterbhrāntyā yannyūnamadhikaṃ kṛtam |tatsarvaṃ kṣamyatāṃ devi prasīda parameśvari || 6||

कामेश्वरि जगन्मातः सच्चिदानन्दविग्रहे ।गृहाणार्चामिमां प्रीत्या प्रसीद परमेश्वरि ॥ ७॥

kāmeśvari jaganmātaḥ saccidānandavigrahe |gṛhāṇārcāmimāṃ prītyā prasīda parameśvari || 7||

गुह्यातिगुह्यगोप्त्री त्वं गृहाणास्मत्कृतं जपम् ।सिद्धिर्भवतु मे देवि त्वप्रसादात्सुरेश्वरि ॥ ८॥

guhyātiguhyagoptrī tvaṃ gṛhāṇāsmatkṛtaṃ japam |siddhirbhavatu me devi tvaprasādātsureśvari || 8||

॥ इति देवीक्षमापणस्तोत्रं सम्पूर्णम् ॥

|| iti devīkṣamāpaṇastotraṃ sampūrṇam ||