देवीस्तोत्रम् २ Ratrisuktatmakam Devistotram

श्रीगणेशाय नमः ॥रात्रिदेवीं प्रपद्येऽहं शरणागतवत्सलाम् ।करालवदनां कृष्णां दुष्टग्रहविनाशिनीम् ॥ १॥

śrīgaṇeśāya namaḥ ||rātridevīṃ prapadye'haṃ śaraṇāgatavatsalām |karālavadanāṃ kṛṣṇāṃ duṣṭagrahavināśinīm || 1||

नमामि खड्गहस्तां तां खेटहस्तां भयानकाम् ।वरदाभयहस्तां च भक्तलोकभयापहाम् ॥ २॥

namāmi khaḍgahastāṃ tāṃ kheṭahastāṃ bhayānakām |varadābhayahastāṃ ca bhaktalokabhayāpahām || 2||

शूलहस्तां शङ्खचक्रगदाचापेषुधारिणीम् ।चतुर्भुजामष्टभुजां द्विभुजामरिमर्दिनीम् ॥ ३॥

śūlahastāṃ śaṅkhacakragadācāpeṣudhāriṇīm |caturbhujāmaṣṭabhujāṃ dvibhujāmarimardinīm || 3||

अष्टादशभुजां लक्ष्मीं दशहस्तां सरस्वतीम् ।सर्वसम्पत्प्रदात्रीं च सर्वविद्याप्रदायिनीम् ॥ ४॥

aṣṭādaśabhujāṃ lakṣmīṃ daśahastāṃ sarasvatīm |sarvasampatpradātrīṃ ca sarvavidyāpradāyinīm || 4||

सहस्रबाहुचरणां सहस्रमुखलोचनाम् ।सहस्रमुकुटोपेतां सहस्रचरणाम्बुजाम् ॥ ५॥

sahasrabāhucaraṇāṃ sahasramukhalocanām |sahasramukuṭopetāṃ sahasracaraṇāmbujām || 5||

पद्मयोनिमुखाब्जस्थां विष्णुवक्षःस्थलस्थिताम् ।शिवाङ्कनिलयां गौरीं वन्दे मूर्तित्रयात्मिकाम् ॥ ६॥

padmayonimukhābjasthāṃ viṣṇuvakṣaḥsthalasthitām |śivāṅkanilayāṃ gaurīṃ vande mūrtitrayātmikām || 6||

आर्भट्या वैष्णवी चोग्रा कुलानि विबुधद्विषाम् ।या निर्दहति रक्ताक्षी तां वन्दे सिंहवाहनाम् ॥ ७॥

ārbhaṭyā vaiṣṇavī cogrā kulāni vibudhadviṣām |yā nirdahati raktākṣī tāṃ vande siṃhavāhanām || 7||

मधुकैटभसंहारं महिषासुरमर्दनम् ।याऽकरोन्नौमि दुर्गां तां वधं शुम्भनिशुम्भयोः ॥ ८॥

madhukaiṭabhasaṃhāraṃ mahiṣāsuramardanam |yā'karonnaumi durgāṃ tāṃ vadhaṃ śumbhaniśumbhayoḥ || 8||

इन्द्रादिसर्वदेवानां सूर्यादिज्योतिषामपि ।सर्वशक्तिस्वरूपा या रात्रीं तां प्रणमाम्यहम् ॥ ९॥

indrādisarvadevānāṃ sūryādijyotiṣāmapi |sarvaśaktisvarūpā yā rātrīṃ tāṃ praṇamāmyaham || 9||

रात्रिसूक्तं जपेद्रात्रौ त्रिवारं च दिने दिने ।भूतप्रेतपिशाचादिचोरसर्पादिनाशनम् ॥ १०॥

rātrisūktaṃ japedrātrau trivāraṃ ca dine dine |bhūtapretapiśācādicorasarpādināśanam || 10||

इति श्रीरात्रिसूक्तात्मकदेवीस्तोत्रं सम्पूर्णम् ॥

iti śrīrātrisūktātmakadevīstotraṃ sampūrṇam ||