दत्तात्रेयकवचम् Shri Dattatreyakavacham

ॐ श्रीपादः पातु मे पादावूरू सिद्धासनस्थितः ।पायाद्दिगम्बरो गुह्यं नृहरिः पातु मे कटिम् ॥ १॥

oṃ śrīpādaḥ pātu me pādāvūrū siddhāsanasthitaḥ |pāyāddigambaro guhyaṃ nṛhariḥ pātu me kaṭim || 1||

नाभिं पातु जगत्स्रष्टोदरं पातु दलोदरः ।कृपालुः पातु हृदयं षड्भुजः पातु मे भुजौ ॥ २॥

nābhiṃ pātu jagatsraṣṭodaraṃ pātu dalodaraḥ |kṛpāluḥ pātu hṛdayaṃ ṣaḍbhujaḥ pātu me bhujau || 2||

स्रक्कुण्डीशूलडमरुशङ्खचक्रधरः करान् ।पातु कण्ठं कम्बुकण्ठः सुमुखः पातु मे मुखम् ॥ ३॥

srakkuṇḍīśūlaḍamaruśaṅkhacakradharaḥ karān |pātu kaṇṭhaṃ kambukaṇṭhaḥ sumukhaḥ pātu me mukham || 3||

जिह्वां मे वेदवाक्पातु नेत्रे मे पातु दिव्यदृक् ।नासिकां पातु गन्धात्मा पातु पुण्यश्रवाः श्रुती ॥ ४॥

jihvāṃ me vedavākpātu netre me pātu divyadṛk |nāsikāṃ pātu gandhātmā pātu puṇyaśravāḥ śrutī || 4||

ललाटं पातु हंसात्मा शिरः पातु जटाधरः ।कर्मेन्द्रियाणि पात्वीशः पातु ज्ञानेन्द्रियाण्यजः ॥ ५॥

lalāṭaṃ pātu haṃsātmā śiraḥ pātu jaṭādharaḥ |karmendriyāṇi pātvīśaḥ pātu jñānendriyāṇyajaḥ || 5||

सर्वान्तरोऽन्तकरणं प्राणान्मे पातु योगिराट् ।उपरिष्टादधस्ताच्च पृष्ठतः पार्श्वतोऽग्रजः ॥ ६॥

sarvāntaro'ntakaraṇaṃ prāṇānme pātu yogirāṭ |upariṣṭādadhastācca pṛṣṭhataḥ pārśvato'grajaḥ || 6||

अन्तर्बहिश्च मां नित्यं नानारूपधरोऽवतु ।वर्जितं कवचेनाव्यात्स्थानं मे दिव्यदर्शनः ॥ ७॥

antarbahiśca māṃ nityaṃ nānārūpadharo'vatu |varjitaṃ kavacenāvyātsthānaṃ me divyadarśanaḥ || 7||

राजतः शत्रुतो हिंस्राद् दुष्प्रयोगादितोऽघतः ।आधिव्याधिभयार्तिभ्यो दत्तात्रेयः सदावतु ॥ ८॥

rājataḥ śatruto hiṃsrād duṣprayogādito'ghataḥ |ādhivyādhibhayārtibhyo dattātreyaḥ sadāvatu || 8||

धनधान्यगृहक्षेत्रस्त्रीपुत्रपशुकिङ्करान् ।ज्ञातींश्च पातु नित्यं मेऽनसूयानन्दवर्धनः ॥ ९॥

dhanadhānyagṛhakṣetrastrīputrapaśukiṅkarān |jñātīṃśca pātu nityaṃ me'nasūyānandavardhanaḥ || 9||

बालोन्मत्तपिशाचाभो द्युनिट्सन्धिषु पातु माम् ।भूतभौतिकमृत्युभ्यो हरिः पातु दिगम्बरः ॥ १०॥

bālonmattapiśācābho dyuniṭsandhiṣu pātu mām |bhūtabhautikamṛtyubhyo hariḥ pātu digambaraḥ || 10||

य एतद्दत्तकवचं सन्नह्याद्भक्तिभावितः ।सर्वानर्थविनिर्मुक्तो ग्रहपीडाविवर्जितः ॥ ११॥

ya etaddattakavacaṃ sannahyādbhaktibhāvitaḥ |sarvānarthavinirmukto grahapīḍāvivarjitaḥ || 11||

भूतप्रेतपिशाचाद्यैर्देवैरप्यपराजितः ।भुक्त्वात्र दिव्यभोगान्स देहान्ते तत्पदं व्रजेत् ॥ १२॥

bhūtapretapiśācādyairdevairapyaparājitaḥ |bhuktvātra divyabhogānsa dehānte tatpadaṃ vrajet || 12||

इति श्रीमद् परमपूजनीय श्रीवासुदेवानन्दसरस्वतीविरचितंश्रीदत्तात्रेयकवचं सम्पूर्णम् ।

iti śrīmad paramapūjanīya śrīvāsudevānandasarasvatīviracitaṃśrīdattātreyakavacaṃ sampūrṇam |